designed by: M. Aladdin & H. Fathy

Thursday, August 31, 2006

.. شمعة


إنا لله و إنا إليه لراجعون
المدونة محتجبة لثلاثة أيام

Tuesday, August 29, 2006

...عين


الرسمة دي اتنشرت النهاردة في جريدة الدستور، و رغم اني مختلف في تشبيه رمسيس بحسونة الفطاطري ابتداءً، بس انا احب اقول أن عين مجدي الشافعي الرهيفة الحقيقية قدرت تخلق --مش ح اقول لأول مرة علشان انا مش متأكد، و مش اكيد أني مطلع كفاية--استلهام فني متقن جدا للتراث الفرعوني و لنظرية التشكيل للفن المصري القديم، علشان تأكد الرابط القديم ما بين فن الكوميكس و فن الجداريات المصري القديم في تزواج بديع و يعتبر بداية خلاقة فعلا لتأصيل ده مستقبلا سواء عن طريق مجدي او غيره. انا مش بجامل، بس البحث عن الموتيف المصري القديم عاصر تجابر صعبة و تصل لحد الامتعاض، و اكبر دليل عليها الخيبة القوية في ايقونات حورس بتاع الدورة الافريقية و كاس العالم للشباب و مليون حاجة تانية انا و انتم عارفينها كويس.. تاني انا مش بجامل، و تاني انا متأكد أن مجدي نفسه ح يرفع سماعة التليفون علشان يشتمني علي اللي انا كاتبه، و ح يطلب اشيل الكلام.. لأ يا ابو الجود.. مش ح اشيل الكلام!

..رسالة تيمو إلي العالم


الرسم لـــ: حاتم فتحي

Monday, August 28, 2006

..وجوه








صورة 1: شريف مصطفي
صورة2: حاتم فتحي
صورة3: وائل سعد
صورة4: احمد خالد
صورة 5: مجدي الشافعي
صورة 6: محمد حماد
صورة7: وائل سعد

...............................
تصوير: محمد علاء الدين

Friday, August 25, 2006

..اول فرحة






امبارح كان العرض المحدود الاول لفيلم "حماد" سنترال. هاشم استضافنا بإريحيته في مقر ميريت لتلات عروض متتابعة--مش عرضين-- و ندوة حامية و جميلة كمان بعدهم. اتمني لحماد كل توفيق يتناسب مع شجاعته و اخلاصه، و اهم من كل ده: موهبته.
.........................................................
صورة1: محمد حماد مع قناة تلفزيونية عربية
صورة2: محمد حماد--محمد الشرقاوي--مهاب مصطفي عز اثناء ندوة ميريت عن سنترال.
صورة3: احمد العايدي--مجدي الشافعي (بالقميص الابيض) وسط الحضور.
صورة 4: عمر طاهر (بالقميص الاحمر) --خالد كساب و الحضور.
صورة 5: من اليمين: عمر طاهر--وائل سعد--محمد حماد--محمد علاء الدين--أحمد العايدي--خالد كساب.
( تصوير: شريف مصطفي--مجدي الشافعي--محمد علاء الدين).

Wednesday, August 23, 2006

...العرض الاول


بكرة العرض الاول الخاص لفيلم "سنترال" لمحمد حماد في مقر دار ميريت في تمام الساعة 9 مساءً، ثم عرض آخر في تمام الساعة 10 مساءً إن شاء الله. تشرفوا و تنوروا
:)

Monday, August 21, 2006

A Tribute........























Audrey Hebpurn
( May 4, 1929-- January 20, 1992)

Friday, August 18, 2006

...هو فيه ايه؟



هو فيه ايه بالظبط؟
انا قريت للسيد ابن عبد العزيز ، و من عند السيد عبد العزيز قريت للسيد عمرو عزت ، و انا اعرف أن الاستاذ عبد العزيز حاطط في بلوجه كلمة "من اجل تعريف جديد للأصولية"، و أن الاستاذ عمرو عزت--إن لم تخني الذاكرة--طلع في برنامج الجزيرة بتاع المدونين و قال علي نفسه يساري. فمش عارف هو اليأس بيلم النفوس بكل العنف ده؟ و لا هي خلفيات فكرية لاقت ليها منفذ خلال الكلام اللي اتقال؟
يعني الاستاذ عبد العزيز اصولي--و شكله كده مش ح يفضل اصولي من كتر اليأس.. يمكن--و طبيعي في البنا الاصولي كراهة التشيع، و الاستاذ عمرو يساري، و اصل من اصول الحركات العلمانية تحييد الكيانات الدينية بشكل عام. علي العموم لابد اني اوضح حاجتين مهمين:
1- انا متفق شخصيا مع كتير من تقريرات الاستاذ عبد العزيز هو و الاستاذ عمرو عزت.
2- انا راجل لا علاقة ليا بالتيارات الدينية و لا حسن نصر الله و لا اي حاجة و علي العموم برضه هي مش تهمة علشان ادفعها.
و لكن، و بصراحة، فالكلام اللي بيقوله السيدين من خلفيتين يكادوا يكونوا حديين--خلينا نقول النتايج، أو الاستخلاصات، أو العبر--هو كلام انهزامي و يائس و نروح نموت احسن بعدها. انا لا راجل مناضل و لا ثورجي و لا اي حاجة، و اقر و اجزم، و ده بشكل مطلق طبعا، بأن كل مواطن عربي--و انا منهم طبعا--متواطئ في استمرار الديكتاتورية مادامت الديكتاتورية موجودة، انا ما حاربتش في لبنان و ما بحبش اكون فنجري بق، لكن نتايج الاساتذة المشرفة، اللي كان مصدرها رومانسية مهزومة عند الاخر عبد العزيز، و محاولة انهزامية للعقلانة ايضَا عند الاخ عمرو عزت، لا تعني اي شيء غير أن التوابيت اللي كلنا بنهرب منها فيه ناس منها عايزين يلابسوهالنا بالعافية.. و ده شيء مشين، و سيولة فكرية مرعبة بصراحة ( و ارجو ملاحظة أن اي صفة أنا بقولها هنا هي لوصف الرأي، بعيد عن الاشخاص نفسهم طبعا).
و لأن الامر مش شخصي، حابب اني اقتبس فقرة كتبتها قبل تدوينة الاخ عمرو -- و عمرو بالذات لأنه بيعرف نفسه علي انه يساري:
"السياسة تعني فن الممكن، و حزب الله يفعل ما هو ممكن، و لا اظن أن السياسة التي تعني العمل الفعلي الملموس يمكنها الإلتفات إلي التنظيرات الفكرية السخيفة التي تبلغ درجة العهر من اشباه مثقفين: حزب الله و المد الديني. حزب الله و القهر الديني. حزب الله و ازمة الحرية. حزب الله و الدولة الدينية. بلغت درجة المرارة من كل هؤلاء. هؤلاء الذين كانوا سببا في كل نكسة و وراء كل هزيمة. سمعت بأذنيّ متثاقف يتمني ألا يحرر حزب الله الجنوب اللبناني لأنه ساعتها سيكتسب قوة عاتية. لا اجد سوى كلمتين لوصف ذلك: شيء حقيرلست متدينا، و لست من المؤيدين للدولة الدينية، و لست من طبالي النظام السوري (و الذي فعل في لبنان ما فعل) و لا الايراني و لا حتي لأي نظام عربي حالي، و لا من المؤمنين بالعقائدية في السياسة، و لكنني اعجز عن التفاهم مع اتجاهات مثل هذه. الانهزام و الاحتقار و المرارة و الاحتلال و المهانة مرضي عنهم، و لكن أن يفعل حزب الله شيئًا فلا و ألف لاو لمزيد من التوضيح: لا احد يرجو أن يقتل الناس و تحترق المباني و تشرد العائلات. لا احد يرجو ذلك و لا احد يتمناه، لبنانيين أو فلسطينيين أوعراقيين . لا احد يود أن يري لبنان منتهكًا ، و لا أن يساق زهرة شباب لبنان للحرب بالمجان. لا احد يطالب اللبنانيين بأن يكونوا ابطالًا و عرب صناديد. لا احد يطالب هؤلاء "اللبنانيين" غير أن يكونوا بالفعل لبنانيين. لست انا من يحكم و لا من ينتوي تعليم هؤلاء "اللبنانيين" الوطنية، و لكن الحكم هو كل ما تعلمناه و تربينا عليه و قاتل آباؤنا و اعمامنا و اخوتنا و قتلوا من اجله."
معلقتش عندهم لأن من الحق الطبيعي لأي بني آدم انه يقول اللي هو عايزه في مساحته، و فضلت انا كمان اني اقول اللي انا عايزه في مساحتي. يعني برش ميه قدام دكاني يعني.
و نقطة اخيرة: انا اسف جدا لأستخدام لفظ انهزامي، انا عن نفسي فعلا مش بحبه و لا باستظرفه، بس ما لاقيتش وصف افضل.

محفوظ




دعا موصول لرب العالمين انك تقوم بالسلامة يا عم محفوظ. دعا موصول بطول بعد طول في العمر يالي كتبك علمتني كتير، و مش كتير اللي القدر بيمنحهم بركة أنهم يضيفوا لعظمة مصر عظمة فوق عظمة، و انت يا عم محفوظ سيد في جماعة الاسياد دول. ربنا معاك و يقويك

Tuesday, August 15, 2006

العايقة بنت الزين

حسده علي العمر الطويل المزدحم بالحكايات، كل يوم حكاية، قّلب عمره بين كفيه فوجده فارغًا مثل قرش ممسوح من الناحيتين، لا ملك و لا كتابة، صارح سمعان بأفكاره، فقال له العجوز:

- اصبر يا بني، اصبر، ستمتلئ القربة حتى تفيض مرارتها علي رأسك.

- أعوذ بالله من الفأل السيئ، يا رجل أريد أن أملأها مثلك بالفرح و الغناء و النساء.

- و هل كنت أحدثك عن فرح؟!.. معذور يا بني، العبرة بالفهم.

محمد ناجي

العايقة بنت الزين

..ما قبل شروق الشمس و غروبها



قليلة هي الافلام اللي تخليك بتحس بشيء جواك. قليلة اوي الافلام اللي فيها لسمة سحر زي دي. و أقل لما يكون فيه جزئين من ذات الفيلم و الاتنين اجمل من بعض. كنت ببص علي ملفات الكومبيوتر و استغربت اني ما قلتش اني بحب الفيلمين طول الوقت ده. محاولة تافهة للتعبير عن الامتنان للي عملولي قصيدتين زي دول. شكرا.

Sunday, August 13, 2006

..أب من الجنوب


سيناريو و رسوم: مجدي الشافعي

(نشرت في جريدة الدستور)
..........................................
يمكن رؤية موضع مجدي الشخصي هنا

.. معكم لنهايتكم أو لنهايتنا


من شوية كنت قاعد علي "منه فيه" انا و العايدي و عبد الله احمد (مليجي و نونو--بوكا و سوكومونص) و مجدي الشافعي، و جه الحوار علي فكرة الأدمغة المريضة، و طبعا اكبر مجال تبان فيه للأدمغة المريضة و تلعلع-- و اكترها طرافة--هو الجنس. افتكرت موضوع الجنرال اللامؤاخذة في "خريف البطريرك"، و اللي ماركيز--ابن الـ****-- خلاه ينتحر بوضع الديناميت في إسته . ضحك و كركرة و فجأة جاني الخاطر، علي ذكر الاذهان المريضة: طب هو ليه الرجالة فيه منهم بيموت و هو بيمارس الجنس، مع اني عمري ما سمعت عن ست ماتت بالسبب ده؟!!! خد الخاطر الوجودي الخطير ده العايدي، اللي سرح للحظة و بعدين اجاب بلهجة تسليم: معلهش بقي.. اصلهم متعودين..

Saturday, August 12, 2006

..الشيطان يعظ


" و الله مصر وحشتني اوي يا رجاله"
"تلاقيك انت اللي واحشها يا خواجه"
هع هع هع هع هع هع هع هااااااااااااااااااااااااااااااااااااااع
*قوادين السلطان عن يمين و عن شمال*
................................................................
مع الاعتذار لعادل أدهم

Friday, August 11, 2006

اتش جي و مقاطعة ويلز


احتمال من اثنين، يمكن يكون ليهم تالت: المشكلة فيا، يا المشكلة في الزمن.
ليه مفيش نجمة في سحر اودري، و ليه مفيش نجم في جاذبية كاري؟
ليه كل شيء بيتعلب و يتغلف و يترمي و يطلع فضلات؟
ليه يا عم هربرت شكيت ام دماغنا بفانتازيا آلة الزمن؟
ربنا يسامحك...

Thursday, August 10, 2006

...الهامس


كيف يبدو الهامس لك؟ ملاك أم شيطان؟
.................................................
اللوحة لـ رمبرانت

Monday, August 07, 2006

.. سنترال حماد الجميل

الإخلاص صفة يمكن تكون سهلة بالبق، لكن مش سهلة، و مش سهلة ابدا، بالفعل.
صديقي العزيز جدا محمد حماد من اكتر الناس المخلصين للسينما اللي شفتهم في حياتي، و مش كفاية انه اقدم علي خطوة كتير منا ممكن يفتكرها جنونية، لما كتب و شارك في انتاج فيلمه القصير الأول كسيناريست "الجنيه الخامس"، و لكنه مشي خطوة ابعد، لما كتب و اخرج و انتج فيلم روائي قصير تاني اسمه : سنترال



بُعد الجنان المحتمل، و الأخلاص الاكيد في تجربة محمد، مش بس في انه يصرف فلوسه علي شيء بيحبه، و لكن كمان انه يواجه كل التعقيدات و العقبات و المشاكل في المجتمع اللي احنا عايشين فيه، ببساطة لأنه جرئ حبتين، و ببساطة اكتر لأنه صادق مع نفسه علي قد ما يقدر. الفيلم الجديد، "سنترال"، فيلم بيتكلم عن بنت مصرية عادية (أدت دورها ببراعة نهي فؤاد) شغالة في سنترال عادي جدا، و بيحصل انها، و عن طريق تنصتها علي المكالمات الهاتفية، بتشوف حاجات كتير اوي، من اللي بنشوفها كل يوم. حاجات احنا غالبا بنلمح بيها و ما بنقولهاش. طبعا النقد اللحظي علي الموضوع يبدأ من فكرة التشابه بينها و بين قصص زي "البوسطجي"، لكن الحقيقي--و اللي لازم يتقال--أن المعالجة هي المحك الأساسي لأي عمل فني، و مصدر جدته أو تميزه
.
فوت علي محمد خلال التصوير. كان شيء جميل اني اشوف زميل و صديق الجامعة في اول تجربة اخراجية ليه. محمد مر بمراحل كتير من حب حاجات يمكن تبان للوهلة الأولي متعارضة، زي المزيكا و الصحافة، و لكنها بالنسبة لي متسقة جدًا، و مكملة للي محمد عايز يقوله جدًا. سعادة المخرج تايه خالص. بيبص في المونيتور، تركيزه كله في اللي بيحصل ورا الكاميرا و طبعا في الـ 4500 جنيه اللي دافعهم من لحمه الحي (يحمد ربنا ان الكاست ما خدش فلوس.. و دي شجاعة تانية). الناس بتتحرك يمين و شمال. فترة تأهب. حماد لسه ح يقول أكشن و....
"يا جماعة عايزين ننام حرام عليكم.. انتم بتعملوا ايه هنا؟"



نفذ شكشك وعيده و رمي الميه. طبعا حركة هيستيرية من الكرو علشان يحاول يحمي الكاميرات المتأجرة، و شوية فيهم بيزعق لشكشك اللي ساب خرطوم الميه راقد علي سور البلكونة و شكله كان فخور جدا بنفسه كجنرال نازي. بعد كده حماد قالي--لما الفيلم خلص، و بقي فيع نفس يضحك طبعا--أن الراجل جاله تاني يوم و سألهم ببراءة
"انتم بتصوروا فيلم؟؟ مش حد يقولي بس يا جماعة؟!"
طبعا حماد ماقلهوش اللي قالهولي ساعتها : الراجل ده شيروفرينيا!!ا


طبعا صديقنا العزيز "محمد عبد العزيز"--زيزو--فقع حماد مقالة معتبرة في مجلة جود نيوز تحت عنوان خرطوم ميه، و صحيح أن شكشك بوظلهم اليوم فعلا (ليكم انكم تتخيلوا أن الفيلم ده اتصور في يومين بس)، لكن المهم أن الفيلم اتصور فعلا، و في انتظار العرض قريبًا بإذن الله، و الأهم أن "محمد حماد" و كل من شارك في إخراج الفيلم القصير الصغير ده للنور، ح يفضلوا بسمة أمل، صغيرة ايوة بس مضيئة، في وسط كل القبح و الجنان اللي احنا عايشين فيه.
........................................................................................


سنترال

محمد حماد . انتاج و سيناريو و اخراج

محمد الشرقاوي . مونتاج

مهاب مصطفى عز . تصميم شريط الصوت

أحمد حجازي . موسيقى تصويرية

الممثلون

تامر عبد الحميد . نهى فؤاد . شريف زكي . حسام عز

قام بالأداء الصوتي

دعاء طعيمة

وليد فواز

انتاج العام 2006.


.....................................................
صورة (1): تامر عبد الحميد-- نهي فؤاد.
صورة (2) و (3): نهي فؤاد.
صورة (4): محمد حماد.

Tuesday, August 01, 2006

.. نور التي تبقي غامضة

النهاردة ح تم ست البنات نور الشهيرة بإيف و علي طريقتي الخاصة إيفو سنتها الساته و عشرين و هي لسه متربعة في مكان مهم جدا من فضاء البلوج سفير. صعب البني آدم ما يتأثرش بكتابة إيفو التي هي لئيمة و غنوجة كتير علي حد وصفها الخاص، و موهوبة بجد علي حد وصفي الخاص (و وصفها الخاص برضه بس هي ما بتجيبش سيرة اوي اوي يعني).
كل سنة و انتي "صوت للبنان" زي ما بيوصفك واحد من قراءك اللبنانيين يا إيفو، كل سنة و انتي إيفو زي ما كل سنة و لبان يكون احسن و احسن.. و كل سنة و انت غامضة و انتي في عز الافصاح، و كل سنة و احنا بنقراكي من غير ما نضرب راسنا في الحيط...

:P :P :P :P :P