المتاهة

كنت بتصفح من شوية تعليقات القراء علي اختطاف--اختطاف ايامها--القائم بالاعمال المصرية في العراق(علي موقع البي البي سي). مش جديد اني اقول اننا كلنا عندنا حالة سيولة فكرية رهيبة. مين ماشي يمين و مين شمال و مين بالورب. مش بقول ان المسائل لازم تكون ديكتاتورية و حزب الرأي الواحد.. بس التشرذم الرهيب ده شيء مقلق.. علي العموم إن كان الغرب نفسه عنده الحالة دي.. فما بالنا بالعرب

و شفت التعليق ده لأخ باين انه عراقي

كما أننا مللنا من المقولة التي تتردد على لسان المصريين ومفادها "إحنا جايين علشانكم". ابقوا في بلدكم ودعوا إعمار العراق للعراقيين أنفسهم، نحن لسنا الآن في سنوات الثمانينيات، والحليم تكفيه الإشارة.

الأخ اسمه ارا اوهانيس، و كاتب انه في هولندا. طبعا من حقه يكتب اللي هو عايزه، و من حقه يسكن في المكان اللي يحبه. و طبعا هو كلامه صح، بس ياريت نزود جملة تانية: حفظ الأمن و النظام مسئولية العراقيين. يعني لو فيه م الاخوة العراقيين زعلان حبتين من المصريين--و ده بجد ممكن يكون مبرر: امريكا و الذي منه--ياريت بقي يعمل حاجة علشان بلده و علشان حفنة الارهابيين الللي طايحة في البلد.. مش من حق العراقيين انهم يتباكوا علي شيء بأيدهم وقفه. فيه من العراقيين ناس كتير شكرت امريكا انها شالت صدام--مع ان رأيي اني دي حركة كانت كارثية و غير مدروسة: و ادينا شايفين الزرقاوي و الحمراوي--طيب يا ريت نفس الناس برضه تشد حيلها شوية كده و تقاوم الارهاب في بلدها و تبطل خوف و تشرذم و طائفية.. الامريكان مش ح يعملولكوا اكتر من كده، و اللي عملوه ليه طبعا فاتورة، الرهان دلوقتي عليكم انتم مش علي حد تاني.. يعني ياريت اللي في منتجعات هولندا و نازل جعجعة يجي بلده يبنيها، مش يلوم الشرير--بفرض ان مصر شريرة--علي شره، بينما هو قاعد بعيد بيتشمس

و ربنا يحفظ العراق و اهل العراق