designed by: M. Aladdin & H. Fathy

Thursday, May 05, 2005

ابناء الرجال الذين ماتوا و هم يتكلمون

انهي ضمير اللي سمح لينا بأننا نيجي الدنيا؟
و ليه كل ما نمشي في الاركان الكئيبة نفتكر قد ايه احنا لوحدنا، و قد ايه احنا مش مبسوطين، و لما نيجي نهون علي نفسنا، ح نحس اننا بنهون علي نفسنا، فنزعل زيادة، لأننا تحولنا لكائنات تستحق الرثاء
ليه كل الأيام زي بعضها و التغيير حتي ما بيكونش مهم.. ليه كل الاحلام الكبيرة مصيرها زي الاحلام الصغيرة؟ نومة لطيفة و سيجارة و فيلم يضحك عليك زيادة
و تضحك
ليه نكتشف، في لحظة فارقة في حياة الصراصير، أن البني آدم أن كان طيب، أو أن كان ابن (...)، فكله زي كله.. مفيش فرق..
ليه فجأة تكتشف أن ابليس كان كائن رومانسي جداً، و صدق الوعود و المبادئ زيادة عن اللزوم، لحد ما اتصدم، فثار، فتحطم
ليه تكتشف أن ابليس هو صديقك الوحيد ف الدنيا دي؟
و انه هو الوحيد اللي ممكن تمشي معاه ف شوراع وسط البلد، متأبطين، مقتسمين السيجارة و الضحكة، و تبقي ح تسمع صوته بيقول
" شايف الفقع؟ بذمتك مش حياة بنت (...)؟"
ليه هو الوحيد اللي ممكن يغطيك كويس بالليل، و يهمس ف ودنك
"معلهش.. الحياة وحشة.. بس ده قدرك"
هو اللي ممكن تدخل عليه المطبخ و انت لسه صاحي من النوم، ح تلاقيه بيقلبلك الشاي و هو مبتسم. هو الصديق المثالي أنك تشاورله علي بنت جميلة و انت متغاظ فيضحك و يرجع راسه لورا لغاية ما الناس تبص عليكوا يمين و شمال
ابليس هو النسخة المتناهية لفشلك، و هو غالباً لسه محافظ علي وسامته و شياكته، لأن دي لزوم شغلانه الاغواء
فيه ايه اسوأ من ان يكون ابليس صاحبك؟
مش ممكن تكون انت ابليس نفسه... و انت مش واخد بالك؟

9 comments:

aMRALi said...

اهو ابليس اللى بتدور عليه دخل حط اللينك اللى فات وخرج
يخربيتك يا ابليس

Muhammad Aladdin said...

بيتهيألي ده كان اعلان عشوائي
يالا خير
:)

Anonymous said...

واضح إنك فى مزاج سىء جدا. خير؟؟؟؟

Muhammad Aladdin said...

مفيش يا فندم.. ربنا يخليكي ليا.. انا كويس.. انا زي الفل
:)


علاء

Muhammad Aladdin said...

هههههههههههههههههههههههههههههههههههههههههههههههههههههههههههه... يا بنت بطلي تماحيك بقي
خلاص خلاص.. مش ح اكون وقح و اكيد ح اقولك حاجة زي : هو انا اطول
:P

علاء

Muhammad Aladdin said...

هممممممممم... هي البنت دي طولها كام؟! أنا 167 سنتي! أنما 167 سنتي! أنا 167 سنتي!
:P :P :P

علاء

أحمد said...

أولاً
انا بشكركم على الكلام الجميل دا
و مش عارف حقيقى اقول ايه ... بس حقيقى نادر لما الواحد يلاقي ناس زيكم يقدروا جمايله

-----
على كل حال
أنا كنت عندى سؤال لمحمد علاء الدين صديق التنين الاخضر
هل أنت محمد علاء الدين الذى كان يكتب في سلسه مجانين و الذى اصدر رويه بعد ذلك اسمها (( اربع و عشرون ساعه )) - على ما أذكر و اتمنى ان لا يكون الاسم خطأ - و الذى عمل في فترة في احد الورش في الاسكندرية لتعليم الاطفال الكتابة؟؟

ام انك محمد علاء الدين بتاع المصباح السحرى الذى تجوز بنت السلطان ؟؟

ام ان كل ذلك تشابه في الأسماء؟؟

Muhammad Aladdin said...

ايوة يا سيدي.. أنا محمد علاء الدين اللي كان بيكتب ف مجانين، اللي "كتب" رواية اسمها "اليوم الثاني و العشرون"--لسه تحت الطبع، و اللي عمل ورشة ف مكتبة اسكندرية لتعليم الأطفال الكتابة الأبداعية-- مش شغلانة يعني و لا وظيفة
:)
تشرفنا و نورت البلوج يا سيدي


علاء

Anonymous said...

You have an outstanding good and well structured site. I enjoyed browsing through it Online university course australia Reconditioned ionic breeze air purifiers st louis celebrex lawyers