ميرو.. مرمر.. سمسم.. سميرة

مش عارف ليه انا بعمل البوست ده، بس باعتباري مش عارف انا ليه عايش اساسا، فكله عند العرب صابون
بحب شكلها جداً، حتي لو كان ارتيفيشل انتيليجنس، و ارجوكوا ما حدش يبعتلي صورة ليها و هي صغيرة



ليها استراتيجية عظيمة ف الاستفزاز.. اغنية البومها الهيد دايما شوق و حنين و ضنين و حنيحة، لكن طبعا جوا ح تلاقي كلام زي " الله يسهلك" و "بالسلامة" و "انا كده".. و الذي منه
انا بسمع دلوقت اغنية من النوع البارانويدي آنف الذكر، اغنية اسمها ما خلاص
قال ايه بيهون عليك فراقي
هو انت يا عمر كنت لاقي
لو ناسي زمان افكرك بيه

يعني وصلة ردح من الاخر... بس برضه استايل التوزيع و التلحين (معلهش يا حماعة مشوها تلحين) عاجبني



بحب الصورة دي جدا.. عوجة الوش، البصة الشقية، لون الشعر و استايله.. كانت شبه واحدة اعرفها من زمان جداً، و كانت برضه من اسباب احباط البنت الوحيدة اللي ارتبطت بيها، لأنها مش شبهها خالص.. نهائي.. علي العكس تماما
:)

و عموما يالا مش حكاية
كل ده ح ارميه خلاص ورايا
و انا ح ارضي لقلبي يتوجع ليه؟



علي فكرة: نسيت اني اقول أن ضحكتها في نفس الأغنية ظريفة بجد
اهو اي ضحكة في وسط الدنيا دي و خلاص

دي حكاية ف منتهي البساطة
ح تعبلي يدوب يومين تلاته
و قلبي.. ح اقسي عليه

ربنا ما يجيب قسوة يا ست .. و أموت ف البربر
:)