حوش آدم

عم احمد فؤاد نجم ح يعملوا فيلم عن حياته
:)
مسألة صعبة شوية، و محتاجة ممثل استثنائي.. ده رأيي اللي قولته النهاردة لعم فؤاد. ابتسم و قالي : هما اختاروا اشرف عبد الباقي، هو ممثل كويس و انا بحبه
السيناريو كتبه محمود الجندي--في اول تجربة كتابة ليه علي ما اظن-- و علي بدرخان اللي ح يخرج برضه، عم فؤاد شكرلي في السيناريو جدا: محمود دمه خفيف، و قرالي النسخة الأولانية لاقيتها هايلة
اسم الفيلم حوش آدم.. ده اسم الشارع الشعبي اللي ساكن فيه عم فؤاد.. سألته: انا سمعتك مرة بتقول ان حوش آدم اصلها يعني خوش قدم
مظبوط! قالي و هو بيولع سيجارة ميريت ازرق من بتوعه، و بعدين تابع: ده اسم تركي لمملوك قديم، معناه قدم الخير.. كانوا بيقولوا انه عنده ولع ببناء البيمارستانات و المدارس يوميا.. اي و الله.. يوميا.. يعني فعلا قدم الخير.. بس هو مش مشهور.. اصله ما عملش الضربة الجوية

الحوار ده حصل بعد ربع ساعة من دخولي ميريت (دار النشر) علشان اسلم آخر نسخة متراجعة من إنجيل آدم.. لاقيت عم فؤاد قاعد مع هاشم و ماسكين خلق ربنا تريقة كعادتهم.. عم احمد بجلابيته و قفطانه المعتادين، و كلمته المشهورة "الترماي".. يعني ممكن جدا جدا يقول "انا لازم ارجع دلوقت علشان الترماي"-- و اللي ما يعرفش عم احمد ممكن يقول : ترماي ايه بس؟ هو بقي فيه ترميات؟ الترماي هو الأسم الحركي للست حرم عم احمد

في الأول لاقيته ماسك الجرنال بيحل الكلمات المتقاطعة و نضارة القراية فوق عينه، رحت عامل فيها الواد ابو دم خفيف و سألته: هي الكلمات المتقاطعة لسه كويسة زي زمان و لا باظت مع اللي باظوا؟

تؤ! قالي و هو بيطوي الجرنال شوية: لا! دلوقتي اي كلام.. زمان كنت اكتب للواد (....) -- اسم مشهور في الصحافة المصرية-- الكلمات المتقاطعة المطلوبة منه للشهر بحاله، يروح باعتلي وقيه حشيش

:)

يديك الصحة يا عم احمد