designed by: M. Aladdin & H. Fathy

Tuesday, April 10, 2007

..تنين أخضر نونو بشنب موف

لظروف قهرية انا مكنتش موجود هنا خالص لفترة كويسة، و غطت الفترة دي عيد ميلاد التنين الأخضر النونو ابو شنب موف، اللي كان المفروض اني احتفل بعيد ميلاده التاني كتنين محترم اهه و ح يتفطم المفروض.
:)
و ذات الظروف القهرية هي سبب لتميز البلوج ده في حياتي لأنه عاصر حاجات مهمة فيها، اول رواية منشورة و اول سكربت يتباع و اول شخصية كوميكس.. و ح يكون في خلال ايام فصيرة شاهد علي حدث مهم تاني، بس تعالوا نتكلم وقتها.
ما لاقتش احسن من اللي نشرته في عيد ميلاد البلوج الأول علشان اكرره في ذات المساحة الصغيرة هنا، و قبل ما انسي، لازم اقول أن البلوج ده كان سبب في تعرفي علي مجموعة من اجمل الناس اللي اتعرفت عليها في حياتي القصيرة. يا رب يكرمتي بصداقتكم لغاية اخر الحياة
.


www.alaaeldin.blogspot.com

من سنة واحدة بس مكنش العنوان اللي فوق ده موجود. و لا كنت اعرف كل الناس الجميلة اللي تيجي و تسلم و تمشي، أو حتي تمشي من غير سلام. عاش معاك البلوج ده سنة واحدة من حياتك، بس كانت سنة مهمة. عدت عليك سنة و اتنشرت اول رواية ليك، و بقي عندك البجاحة انك ترفض بيع سيناريو، و انك تحس ان فيه ناس ممكن يقولولك صباح الخير في الصبح اللي جاي. سنة كانت كفيلة بأنها تحسسني أن التمن اللي دفعته علشان اعيش زي ما انا عايز كان في محله.. و كان سليم.. و كان يستحق
عاش معايا البلوج ده الليلة اللي الاحباط ضربني فيها لغاية ما روحي نزفت فوق السرير، ساعة ما كنت ح ادلت كل اللي كتبته و ما اتنشرش. نشرت قبل البلوج ده 21 كتاب. اجزاء مهمة مني و ما انكرش، بس الدنيا و الناس علموني الطمع في كل فجر جديد
عاش معايا البلوج ده تعارفي علي ناس مهمين جدًا في الحياة، ما تتخيلش قد ايه مهم للواحد انه يفتح الكومبيوتر يلاقي حد يقوله ان اللي بيكتبه مصدر إلهام ليه. مكافأة فورية للكاتب قبل التوزيع و الجوايز و حسابات الفلوس و الخسارة.لما حد في نص الكورة الارضية التانية ينزل من بيتهم يجيب كتاب انت كتبت عليه. مستني ايه اكتر من كده؟
عاش معاك البلوج ده لما ناس انت اتربيت— و لسه بتتربي—علي كلامهم يقروك، و فوق كده يضحكولك و يقولولك كلام مش علي مقاسك
تفتح الكومبيوتر زي العصفور المدهوش اللي واقف فوق الشجرة يحرك في رقبته مستني حاجة الناس مش فاهمينها. تلاقي كلام كويس و تلاقي كلام وحش، و اهو افيه انك تلاقي شتايم عمر ما علاقتك بالناس قبل كده جابتها، بس عادي.. اهي هي دي الحياة من غير ماكياج
بتنام و تقوم، و تعدي الايام و تفوت، تاكل و تشرب، تروح و تيجي و انت مش حاسس ان في كل لحظة بيكون البلوج ده حتة منك. يخلص اليوم أو يبتدي تروحله و تحكيله حكايات يمكن ما تهمش حد، و يمكن كمان ما تهمكش بعدين
البلوج ده شاف معايا الايام اللي مكنش فيه كومبيوتر علشان اكتبه عليه. ايوة. يمكن تسعين في المية من اللي اكتب في البلوج ده كان في نت كافيهات بتسهر لغاية الصبح. بكتب و انا قاعد في دوشة ناس انت بتكتب عنهم. بتتنفسهم في اللحظة اللي بتنقر فوق الكي بورد بحتت منهم. دلوقتي انا بكتب اللي بكتبه ده من البيت، بقرقش حاجة في بقي و بابتسم
الكاونتر اللي تحت بقاله تلات شهور و اسبوعين، من 23 ديسمبر اللي فات، و مكنتش متخيل ان العدد ده ممكن يكون موجود. سيبنا من العشرين ألف و خمسميه.. من العشر تلاف و خمسميه، من الخمس تلاف من غير خمسميه. انا بس عايز اشكر كل اللي عدي، و لو من بعيد، و قالي: انت يا واد يا بقف؟ بتعمل ايه؟
و فوق كل ده و ده، للناس اللي عارفين نفسهم كويس، و اللي مش ح اقول اساميهم علشان ما انساش اسم فيهم، و اللي بيعدوا و يبصوا، ييجوا و لو من بعيد لبعيد، يقروا و ما يكتبوش، يبتسموا و ما يقولوش: ربنا اعلم بالمعزة

......................................
و علشان حبة ريفرش: دوس هنا

17 comments:

zordeak said...

حمد الله عالسلامة يا عم


انا قلت انت اتمسكت فى البيان اللى تحت ولا ايه


قانون ارهاب بقى وكده

:P


كل سنة وانت طيب يا جميييل

وكل سنة والمدونة اللى بعشقها دى بخيير

ودايما حساس يا لول

ودايما عبقرى ومبدع


باجى هنا دايما

مش مهم اسيب تعليق

المهم انى استمتع بوجودى معاك فى العالم بتاعك


قول للتنين كل سنة وهو طيب

كبر اهو وشنبه خط


:D


كل سنة وانت طيب يا لول

وعقبال منجيلك فى اليوبيل الماسى للبلوج


وانت ساعتها اللى هتكون بشنب مووف

مش التنين

:)

semsem said...

أنا قلت لك قبل كده ان أول حاجة بعملها الصبح انى أقرا البلوج بتاعك ولو ملقتكش كاتب حاجة جديدة بقراه تانى من أوله وبستمتع تانى وبقرب من حد جميل أوى زيك تانى
ياريت الدنيا تديلك اللى انت تستاهله بقى
كل سنة وانت وكل قراء البلوج طيبين

Anonymous said...

و اللي بيعدوا و يبصوا، ييجوا و لو من بعيد لبعيد، يقروا و ما يكتبوش، يبتسموا و ما يقولوش


كل سنه وانت جميل كده علي طول :-)

Khawwta said...

كل سنة وانت طيب

semsem said...

lolo heya sana wa7da wala 2?

nour said...

مبروووووووووووووك

mohamed kamal hassan said...

كل سنة وتنينك طيب
ويارب السنة دى تبقى أحلى وأصدقاؤه أكتر

Incomplete said...

يالول ياجميل
كل سنة وانت وتنينك بألف خير
ومبروك الفطام وعقبال مانفرح بيه كده في الكوشة
:p
لأ بجد ومش هقول لأن أكيد انت عارف
قد ايه تنينك ده مهم عند ناس كتير
ربنا مايحرمنا منه ولا منك أبداً
:)

Anonymous said...

Thank You Very Much Bcause You Are You !

It`s My First Visit And It Will Never Be The Last..

There Are Many Treasures, Pure Human`s Feelings, And Beautiful Thoughts Inside All Of Us, But Only Very Littile People Can Search And Find And Express Or Show It Very Well.. Just Like You !

I`m Really Impressed..

Yasser_best said...

مبروك يا صديقي
تستحق كل الحب والتقدير يا رفيقي ودليلي في شوارع وسط البلد

شيماء زاهر said...

تدوينة حلوة أوي يا محمد،
وإن شاء الله السنة الجاية تكون المدونة وصاحب المدونة في أحسن حال...

صباحك نادي و أحضر وموف :)

lolita said...

كل سنة وانت - التنين يعنى- ؛) بخير
انا اتكعبلت فى البلوج بالصدفة والجميل انى لسه مخلصة اليوم الثانى والعشرون طازة وقبلها انجيل ادم
حظى الحلو وقعنى فى المدونة بتاعتك عشان اقولك انت عبقرى
بجد
وكل سنة وانت -الروائى العبقرى صاحب التنين الأخضر أبو شنب موف- طيب

Anonymous said...

كل سنة وانت طيب يا علاء .. والله الوقت جري بسرعة جدا .. انا ما تخيلتش إن دي السنة التانية للبلوج ، استغربت وانا باقرا التدوينة ، قلت إزاي؟ ده عيده الأول كان من شهور بس! طلع إنه فعلا من شهور ، لكن 12 شهر بحالهم :)
كل سنة وانت طيب ومن نجاح لنجاح دايما يا رب . وكل سنة وتنينك بخير ، ويكبر يوم عن يوم ، لغاية ما تلاقيه في يوم بقى تنين عجوز ، سجل ضخم كبير لكاتب كبير معروف عجوووز اسمه محمد علاء الدين ، بيقعد قدامه ويتفرج على حياته فيه، كان بيفكر إزاي ويقول إيه ، وكسب محبة ناس قد إيه :)

انجي

بنت الحياه said...

كل سنة وانت أسعد بقرارك، كل سنة وكل تناقضاتك الداعية للتأمل، والمثيرة جدا في توغل وانتشار :)

Anonymous said...

video clip,funny video clip,clip hunter,funny clip,mini clip,great clip,free movie clip,free funny video clip,money clip,mini clip game,clip dump,كليبات,مقاطع فيديو ,بلوتوث,مصارعة,مصارعه,كليب,فيديو.افلام,video,free video.home video,فيديو كليب,كليب عربى,فيديو كليب عربى,تحميل فيديو كليب,
http://www.urclip.com

iDip said...

كل عام وتنينك وشنبه بألف خير
:)

متأسف جدا على التهنئة المتأخرة

Muhammad Aladdin said...

زورديك
يا عمي مش عارف ارد اقولك ايه.. بس منور دايما
بجد يعني
:)

سمسم
و انتي بصحة و سلامة يا سمسم، و ايوة، دي السنة التانية
:)

المجهول
و كل سنة و انت اجمل

خوتة
و انتي بصحة و سلامة
:)

نور
الله يبارك فيكي يا ستي

كيمو
ابعد عن تنيني ياد!
:P

انكومبليت
و لا يحرمني منك يا جميل ابدا
:)

المجهول
اخجلتني بكلماتك..متشكر جدا جدا جدا..و تنور في اي وقت

ياسر
ربنا يخليك يا ابو اليسر و ربنا يديم المعزة و الصداقة
:)

شيماء
مش ح اعرف اقولك صباحك موف.. اقولك صباحك بلون قلبك يا ست الكل
:)

لوليتا
الكاتب العبقري بيقول للقارئة العبقرية صباحك عبقري و مع مزيد من الكتب العبقرية إن شاء الله
:P

إنجي
و انتي بصحة و سلامة يا اميرة الامرا
:)

بنت الحياة
سأتوغل سأتوغل
:)

آي ديب
شنبه بيسلم عليك يا سيدي
واحشني يا واد.. احوالك ايه؟؟؟
:)
و كل سنة و انت طيب و جميل