..تنين أخضر نونو بشنب موف

لظروف قهرية انا مكنتش موجود هنا خالص لفترة كويسة، و غطت الفترة دي عيد ميلاد التنين الأخضر النونو ابو شنب موف، اللي كان المفروض اني احتفل بعيد ميلاده التاني كتنين محترم اهه و ح يتفطم المفروض.
:)
و ذات الظروف القهرية هي سبب لتميز البلوج ده في حياتي لأنه عاصر حاجات مهمة فيها، اول رواية منشورة و اول سكربت يتباع و اول شخصية كوميكس.. و ح يكون في خلال ايام فصيرة شاهد علي حدث مهم تاني، بس تعالوا نتكلم وقتها.
ما لاقتش احسن من اللي نشرته في عيد ميلاد البلوج الأول علشان اكرره في ذات المساحة الصغيرة هنا، و قبل ما انسي، لازم اقول أن البلوج ده كان سبب في تعرفي علي مجموعة من اجمل الناس اللي اتعرفت عليها في حياتي القصيرة. يا رب يكرمتي بصداقتكم لغاية اخر الحياة.

www.alaaeldin.blogspot.com

من سنة واحدة بس مكنش العنوان اللي فوق ده موجود. و لا كنت اعرف كل الناس الجميلة اللي تيجي و تسلم و تمشي، أو حتي تمشي من غير سلام. عاش معاك البلوج ده سنة واحدة من حياتك، بس كانت سنة مهمة. عدت عليك سنة و اتنشرت اول رواية ليك، و بقي عندك البجاحة انك ترفض بيع سيناريو، و انك تحس ان فيه ناس ممكن يقولولك صباح الخير في الصبح اللي جاي. سنة كانت كفيلة بأنها تحسسني أن التمن اللي دفعته علشان اعيش زي ما انا عايز كان في محله.. و كان سليم.. و كان يستحق

عاش معايا البلوج ده الليلة اللي الاحباط ضربني فيها لغاية ما روحي نزفت فوق السرير، ساعة ما كنت ح ادلت كل اللي كتبته و ما اتنشرش. نشرت قبل البلوج ده 21 كتاب. اجزاء مهمة مني و ما انكرش، بس الدنيا و الناس علموني الطمع في كل فجر جديد
عاش معايا البلوج ده تعارفي علي ناس مهمين جدًا في الحياة، ما تتخيلش قد ايه مهم للواحد انه يفتح الكومبيوتر يلاقي حد يقوله ان اللي بيكتبه مصدر إلهام ليه. مكافأة فورية للكاتب قبل التوزيع و الجوايز و حسابات الفلوس و الخسارة.لما حد في نص الكورة الارضية التانية ينزل من بيتهم يجيب كتاب انت كتبت عليه. مستني ايه اكتر من كده؟
عاش معاك البلوج ده لما ناس انت اتربيت— و لسه بتتربي—علي كلامهم يقروك، و فوق كده يضحكولك و يقولولك كلام مش علي مقاسك
تفتح الكومبيوتر زي العصفور المدهوش اللي واقف فوق الشجرة يحرك في رقبته مستني حاجة الناس مش فاهمينها. تلاقي كلام كويس و تلاقي كلام وحش، و اهو افيه انك تلاقي شتايم عمر ما علاقتك بالناس قبل كده جابتها، بس عادي.. اهي هي دي الحياة من غير ماكياج
بتنام و تقوم، و تعدي الايام و تفوت، تاكل و تشرب، تروح و تيجي و انت مش حاسس ان في كل لحظة بيكون البلوج ده حتة منك. يخلص اليوم أو يبتدي تروحله و تحكيله حكايات يمكن ما تهمش حد، و يمكن كمان ما تهمكش بعدين
البلوج ده شاف معايا الايام اللي مكنش فيه كومبيوتر علشان اكتبه عليه. ايوة. يمكن تسعين في المية من اللي اكتب في البلوج ده كان في نت كافيهات بتسهر لغاية الصبح. بكتب و انا قاعد في دوشة ناس انت بتكتب عنهم. بتتنفسهم في اللحظة اللي بتنقر فوق الكي بورد بحتت منهم. دلوقتي انا بكتب اللي بكتبه ده من البيت، بقرقش حاجة في بقي و بابتسم
الكاونتر اللي تحت بقاله تلات شهور و اسبوعين، من 23 ديسمبر اللي فات، و مكنتش متخيل ان العدد ده ممكن يكون موجود. سيبنا من العشرين ألف و خمسميه.. من العشر تلاف و خمسميه، من الخمس تلاف من غير خمسميه. انا بس عايز اشكر كل اللي عدي، و لو من بعيد، و قالي: انت يا واد يا بقف؟ بتعمل ايه؟
و فوق كل ده و ده، للناس اللي عارفين نفسهم كويس، و اللي مش ح اقول اساميهم علشان ما انساش اسم فيهم، و اللي بيعدوا و يبصوا، ييجوا و لو من بعيد لبعيد، يقروا و ما يكتبوش، يبتسموا و ما يقولوش: ربنا اعلم بالمعزة
......................................
و علشان حبة ريفرش: دوس هنا