حاجات مالهاش لازمة..بس أهي بتتقال

اسمي محمد علاء الدين. اتولدت في باب اللوق من 25 سنة، و السنة دي، في أكتوبر، حاكمل السنة الـ26 بنجاح ساحق، أو كده بيتهيألي..
الحاجة الوحيدة اللي بعرف أعملها--ككائن مش متربي--هي الكتابة، بشتغل كفري لانسر ، يعني بالعربي متعاقد حر، و بالعامي كده "ارزقي"..بدأت الكتابة من و انا صغير جداً، كان عندي 11 سنة، كنت بنشر حوارات صحفية و اللذي منه في مجلة سمير بس، مش "سمير و ميكي" يعني
طلعت أول كتاب و أنا عندي 21 سنة..كانت سلسلة ساخرة اسمها مجانين، كنت بكتبها مع زمايل و اصحاب ليا، و كان بينشرها د. نبيل فاروق..
www.magnin.com
و بعدها طلعت من نفس الدار حاجة كده اسمها "آيس كريم" من نفس الدار..و حصل أن الهوا ما جاش سوا، فطلعت سلسلة تانية لوحدي من دار مختلفة، و بعدين في سنة 2003 طلعت أول كتاب "أدبي" في حياتي..مجموعة اسمها "الضفة الأخري"، قليت أدبي بعدها و كتبت تلات روايات قصيرة "نوفيلاز" لسه ما اتنشروش، و أول واحدة كتبتها ف حياتي خدت بيها التالت ع الجمهورية--كان اسمها "الدوائر". كان عندي 24 سنة..و يمكن ده كان إغراء أكبر أني استمر في طريق الهبالة اللي أنا فيه. فبقي عندي مجموعة قصصية غير منشورة برضه، بالأضافة للروايتين التانيين اللي اتكتبوا بعد الدواير
حياتي كلها يمكن تتلخص علي تلات أفعال اساسية: القراية، الكتابة، مراقبة وسط البلد. و علشان ما تبقاش محاضرة نحوي، مش ح اتكلم علي الكتابة دلوقت، احسن اكلمكوا عن وسط البلد..الحتة اللي اتولدت و اتربيت فيها. الحج اليومي من بيتي لقهوة "منه فيه" الزاهرة هي مناسبة لطيفة أنك تفكر قد ايه الحياة ف اللطيف الهادي، و أن الناس مهما بانوا غربا أوي ، فنسبة العيوب الخلقية قليلة مهما أن كانت. تكتشف كويس في حتة زي وسط البلد--بيجيها كل القاهريين تقريبا مرة في الاسبوع علي الاقل-- أن بلدنا دي كلها كاراكترات غريبة، بس في الغالب غلبانة جداً و مش لاقية حد تكلمه و تثبتله أن الغلبان ده--الكاراكتر--و الله يجي منه كتير

كنت ماشي من يومين في ميدان سليمان باشا..هبت ريح باردة و انا بعدي براحة جنب مجموعة سياح ناحية جروبي. الميدان شكله كان جميل بدرجة غريبة. نفس درجة الحلاوة اللي ممكن تقفشها بشكل عفوي و غريب في سلاسته لما تمشي في شارع قصر النيل مثلاً من ناحية ميدان مصطفي كامل، أو لما تمشي في ميدان الاوبرا الساعة تسعة أو عشرة الصبح، أو لما تاخد شارع محمد فريد من أوله عند مدرسة السنية (هو مش اسمه هناك محمد فريد، بس هو نفس الشارع طوالي) لغاية رمسيس..تفاجأ بأن كل تعدية ف الشارع ده ليها شخصية شكل..من المناطق الشعبية المتدنية فعلاً-- الناصرية، للمناطق الشعبية اللطيفة و شبه الشعبية-عابدين، للمناطق ذات اللفحة الأوروبية المميزة--وسط البلد. مصر جميلة جمال استثنائي فعلاً، بس نوعية من الجمال اللي بيلمع فجأة و يجري.
لما وسط البلد تعمل فيه كده بسأل نفسي أزاي الواحد ساعات كتير بيقرف من عيشته و يقول يا سلام يا واد يا علاء لو هاجرت..بسأل نفسي أزاي اسيب منطقة زي دي. ازاي ممكن اعيش بعيد عن مدينة جميلة بالشكل ده..بس برضه متوحشة بالشكل ده..
و أنا صغير، قررت فجأة أني امشي و ابص لفوق.. اكتشفت أني بامشي بمنظور افقي جداً، يعني عمري ما رفعت راسي و بصيت للعماير اللي منبته فوق كل المحلات و القهاوي و مداخل البيوت اللي عرفتها طول عمري..كانت النتيجة تخض.. أنواع من الجمال المعماري اللي تخليك تحس انك ضئيل جداً، و اللي تخليك تقول: هو الناس كانت أروق ايامها صحيح؟ و لا هي مسألة احساس بالجمال و الفخامة نسيناه؟
مش عارف.. بس عارف اني لو ماكنتش رفعت راسي شوية..شوية صغيرين.. مكنتش أنا بقيت أنا.. و لا كتبي بقت كتبي.. و يمكن تلاقي بدل شوية الكلام العبيط هنا كلام اهم بكتير زي موديلات العربيات البي أم دبليو..