designed by: M. Aladdin & H. Fathy

Friday, April 07, 2006

www.alaaeldin.blogspot.com

من سنة واحدة بس مكنش العنوان اللي فوق ده موجود. و لا كنت اعرف كل الناس الجميلة اللي تيجي و تسلم و تمشي، أو حتي تمشي من غير سلام. عاش معاك البلوج ده سنة واحدة من حياتك، بس كانت سنة مهمة. عدت عليك سنة و اتنشرت اول رواية ليك، و بقي عندك البجاحة انك ترفض بيع سيناريو، و انك تحس ان فيه ناس ممكن يقولولك صباح الخير في الصبح اللي جاي. سنة كانت كفيلة بأنها تحسسني أن التمن اللي دفعته علشان اعيش زي ما انا عايز كان في محله.. و كان سليم.. و كان يستحق
عاش معايا البلوج ده الليلة اللي الاحباط ضربني فيها لغاية ما روحي نزفت فوق السرير، ساعة ما كنت ح ادلت كل اللي كتبته و ما اتنشرش. نشرت قبل البلوج ده 21 كتاب. اجزاء مهمة مني و ما انكرش، بس الدنيا و الناس علموني الطمع في كل فجر جديد
عاش معايا البلوج ده تعارفي علي ناس مهمين جدًا في الحياة، ما تتخيلش قد ايه مهم للواحد انه يفتح الكومبيوتر يلاقي حد يقوله ان اللي بيكتبه مصدر إلهام ليه. مكافأة فورية للكاتب قبل التوزيع و الجوايز و حسابات الفلوس و الخسارة.لما حد في نص الكورة الارضية التانية ينزل من بيتهم يجيب كتاب انت كتبت عليه. مستني ايه اكتر من كده؟
عاش معاك البلوج ده لما ناس انت اتربيت— و لسه بتتربي—علي كلامهم يقروك، و فوق كده يضحكولك و يقولولك كلام مش علي مقاسك
تفتح الكومبيوتر زي العصفور المدهوش اللي واقف فوق الشجرة يحرك في رقبته مستني حاجة الناس مش فاهمينها. تلاقي كلام كويس و تلاقي كلام وحش، و اهو افيه انك تلاقي شتايم عمر ما علاقتك بالناس قبل كده جابتها، بس عادي.. اهي هي دي الحياة من غير ماكياج
بتنام و تقوم، و تعدي الايام و تفوت، تاكل و تشرب، تروح و تيجي و انت مش حاسس ان في كل لحظة بيكون البلوج ده حتة منك. يخلص اليوم أو يبتدي تروحله و تحكيله حكايات يمكن ما تهمش حد، و يمكن كمان ما تهمكش بعدين
البلوج ده شاف معايا الايام اللي مكنش فيه كومبيوتر علشان اكتبه عليه. ايوة. يمكن تسعين في المية من اللي اكتب في البلوج ده كان في نت كافيهات بتسهر لغاية الصبح. بكتب و انا قاعد في دوشة ناس انت بتكتب عنهم. بتتنفسهم في اللحظة اللي بتنقر فوق الكي بورد بحتت منهم. دلوقتي انا بكتب اللي بكتبه ده من البيت، بقرقش حاجة في بقي و بابتسم
الكاونتر اللي تحت بقاله تلات شهور و اسبوعين، من 23 ديسمبر اللي فات، و مكنتش متخيل ان العدد ده ممكن يكون موجود. سيبنا من العشرين ألف و خمسميه.. من العشر تلاف و خمسميه، من الخمس تلاف من غير خمسميه. انا بس عايز اشكر كل اللي عدي، و لو من بعيد، و قالي: انت يا واد يا بقف؟ بتعمل ايه؟
و فوق كل ده و ده، للناس اللي عارفين نفسهم كويس، و اللي مش ح اقول اساميهم علشان ما انساش اسم فيهم، و اللي بيعدوا و يبصوا، ييجوا و لو من بعيد لبعيد، يقروا و ما يكتبوش، يبتسموا و ما يقولوش: ربنا اعلم بالمعزة

......................................
و علشان حبة ريفرش: دوس هنا

27 comments:

NYchick said...

كل عام و انت بخير

Muhammad Aladdin said...

ما تتصوريش فرحت بتعليقك قد ايه
:)
و انتي بصحة و سلامة يا إن

RAT said...

في النهاية هي معرفة بالناس من منظار آخر , تستطيع ان تراهم على حقيقتهم لانو كما يقول هلال : ما في وجه لوجه بالمسألة
عقبال المية يا عم
:)

Muhammad Aladdin said...

شكرا يا راتي العزيزة
عقبال ميتك يا ستي
:)

Anonymous said...

كل سنة وانت أجمل ومش هاقول أطيب لأني مش متصورة أنك ممكن تبقى أطيب من كده، كل سنة وانت علاء .
ومش محتاجة أقولك تاني ان لولا البلوج ده ماكنتش عرفت ناس كان نفسي أعرفها وأن المرور عليك أصبح عادة يومية لذيذة وانت عارف الباقي
:P
هبة

hillz said...

hahahahha
i'm being quoted a well? la222 hayda kteer 3layyeh ya rat..
3ala2... mabrook w yalla badna nshoof awwal scenario ma3mool film.. w ya waylak iza ma 3azamtna 3a awwal 3ard :P
3o2beil kill senneh
w haydeh ellink la ilak!!:
http://song.6arab.com/fayroz-sanah-3an-sanah.ram

ayman_elgendy said...

كل فمتو ثانية وانت بألف خير يا علاء يا عسل
:-)

shaimaa said...

كل بلوج وانت بخيير ياعم علاء وعقبال مليون بلوجايه كده
ويكبر البلوج في عزك وربنا يطرح فيه البركه


قلي امال فين التورته؟؟

:P

AZ said...

happy blogday to yoooooooou

أميرة حسين said...

كل سنة وأنت طيب يا لولو :)

تصدق ! أنا بقالي أد إيه بعدي على البلوج كل يوم و أدور على حاجة جديدة انت كتبتها النهاردة :) لكن عمري ما فكرت ابص على (بداية) البلوج ، بشكل ما كان فيه احساس ان البلوج ده هو (علاء) نفسه، موجود من 26 سنة و ماشي في السابعة و عشرين كمان :)

عقبال ما البلوج يبقى فعلا عنده 27 سنة و متتشغلش عنه يا لول

أحمد العايدي said...

ألف مبروك يا لو
وعقبال دشيليار سنة تشوف العداد الصغنطوط وهو بيقلب ويجيب اصفار من جديد
:)

NYchick said...

http://www.usatoday.com/life/movies/news/2006-04-07-casablanca-screenplay_x.htm?CSP=N014

Muhammad Aladdin said...

هلال
اكيد ح اعزمك.. بس انت تكون في مصر
:)
و شكرا علي الاغنية

ايمن
و كل نص قيمتو ثانية و انت بخير يا سيدي
:)

شيماء
شكرا شكرا.. و التورتاية اكلتها لوحدي
:P

آز
شكرا يا قمر
:)

اميرة
شكرا علي مرورك يا ستي و ح احاول ما انشغلش عنه.. ح احاول
:)

يودا
اهه.. نفسك معانا
:P
و متشكر يا جميل
:)

إن
"The requested document was not found."
ده اللي بيطلعلي لما احاول اشوف اللينك

طارق إمام said...

كل سنة و انت طيب يا جميل......................و الانين بتاعك أكثر خضارا و شواربه أكثر طولا...حبيبي

أبوعمر said...

كل سنة وانت جميل و مبدع وسعيد وساخر وقليل الأدب وصديق خفي وأديب جامد وسيناريست بلطجي ومنو فيه

Muhammad Aladdin said...

هبة
و النبي سامحيني فعلا ما خدتش بالي و انا برد.. متشكر جدا جدا جدا علي كلامك هنا
و اهلا بيكي في كل وقت

طروقه
بيخضر و الله بس بيقصر
:P
حبيب قلبي
:)

ابو عمر
و كل سنة و انت احسن و احسن، و كل سنة و عمر بخير و سعادة و جمال
:)

iDip said...

كل عام وانت بخير وصحة وعافية

اهداء متواضع:
كل يوم وانت في تميز لا ينضب
تسقينا من قطراته فلا نمل نشرب
ونعيد الكرة الفا ولا نعجب
ان جعلنا من مدونتك لنا مضرب*

========
* جمع مضارب مثل: مضارب بني عبس ;)

Muhammad Aladdin said...

يا سيدي ربنا يخليك.. مش عارف ارد اقول ايه طيب؟
مش لاقي غير متشكر بجد
:)

Nerro said...

Congrats ya Alaa...isa next year...the green dragon would have a second head...bas let it be pink ba2a...3ashan taghyeer w keda.

Muhammad Aladdin said...

الملكة النرنورية قررت ان التنين يكون بمبي و براسين.. غن شاء الله السنة الجاية
:P
شكرا يا نيرمو
:)

manora said...

كل سنة و انت بخير
و بلوجك متألق دايما يا علاء
عقبال5000 سنة جاين احسن واحسن و احسن

Muhammad Aladdin said...

و انتي بصحة و سلامة يا منورة
:)
خمسميت سنة دول كتير اوي!
:P

worood said...

متأخرة قوي..بس قهراً والله:(
كل سنة وانت وبلوجك بخير ياجميل..
مش هكدب لو قلت ان بلوجك ده غير في فكري حاجات كتير.. وانه المرور عليها بقى من أحب عاداتي
يكفي ان من خلاله تعرفنا اكتر على شخصك الكريم
عقبال اليوبيل الماسي في حياتك إن شاءالله..بس اوعى تاخدك الحياة وتنساه
:)

Muhammad Aladdin said...

متشكر اوي يا ورود.. و لعل تأخيرك كان خير يعني
:)
و ح اخاول ما انساهوش.. حاضر
:)

Anonymous said...

كل سنة وانت طيب يا محمد ، انا من الناس اللى بيعدوا وما بيقولوش حاجة بس كنت بستمتع دايما وانا بطلع على البلوج ، ومادام كتبت لازم اقولك مبروووووووووك على " انجيل آدم " انت روائى رائع .

Muhammad Aladdin said...

يا سيدي ربنا يخليك.. رأيك ده شرف ليا، و كويس انك قلت المرة دي علشان اعرف اشكرك
شكرا جزيلا
:)

Anonymous said...

كل عام وانت طيب يا لولو
فعلا الايام الحلوة عمرها ما تتنسي وانت حلو وكلنا حلوين وبكرة اكيد احسن طول ما الاصدقاء أوفى
واشوفك على منو
زيزو