..خدعة النهايات

واحد صاحبي قالي النهاردة انه خايف يكون اللي بعد الموت عبارة عن شاشة بتوش..حاجة كده بعد نهاية الارسال.. نغمشة سودا في نغمشة بيضا و شكرا. وش..وش..وش..

انا عن نفسي كان خوفي انه بعد الموت، يمكن تتعاد عليك كل المشاهد المؤلمة، واحد ورا التاني، واحد ورا التاني، من غير نهاية.. في كل مرة تقول ما انزلش.. في كل مرة تقول ما اقولش.. في كل مرة تقول ما ازعلش.. في المرة الجاية ح اعمل كده.. في المرة اللي بعدها اكيد كده.. في المرة اللي بعد كل المرات اكيد.. و اكيد.. و اكيد.

بس بيحصل، و بيفضل يحصل، و ح يحصل مش لنهاية العمر.. لأن العمر انتهي خلاص، و ما بقاش غيري انا و كل الكوابيس اللي كانت خنقاها جري حياة ما بتقفش.. و دلوقتي وقفت.. و ماتت.

يمكن خدعة الموت انه مش بينهي حاجة.. ده بيبتديها...