..قلبي الليلة دي حزين

ساعات كتير الواحد بيكون مجبر ياخد قرارات ما و يحس برضه كتير انها اكبر منه. ساعات كتير الواحد يطوي نفسه علي نفسه و ينام. يلحس في جسمه زي القط الموجوع و يتأسي علي حاجات هو السبب فيها بدماغه اللي مش مريحاه. كتير اوي بيبقي علاج الوجع هو وجع اكبر و احمى. وجع كبير ياكل الوجع الصغير و مش مهم حبه عرق علي حبة دموع. ربنا مديني شوية ناس بيقولولي ان قرارات الوجع—و مفيش قرار كبير من غير وجع كبير غالبا—بتاعتي صح.بتبان لكل الناس غريبة بس هي ديتها يوم او يومين، سنة او سنتين، بس بتطلع صح. مش عارف ايه النقمة بالظبط، اني باطلع صح و لا ان ربنا مديني ناس بتفهمني اني صح. مش عارف. بس اللي اعرفه كويس ان لما تقفل البيبان و تمشي، سيجارة في طرف بقك و كتاف مرفوعين بيداروا الوجع، اوع تجرب تبص تاني وراك. سلم الحياة الحقيقي ضيق و من غير درابزين. حقيقة شخصية يوم موتي ساعة ما اتناساها.