طب تعرف تفهم دي؟

مش عارف.. الواحد يمشي يمين و لا شمال يلاقي جودزيلات ف وشه.. يعني حاجات كده كان ايام العبط فاكرها لا انسانية بس في الحقيقة و في الواقع بتطلع انسانية خالص، و في غاية اللطف المعنوي كمان.. يعني كل ما البني آدم يبطل استغراب الحياة تديلة شلوت كراكترات يتلهي فيها شوية، و لو مفيش كراكترات ح تبقي حاجات غريبة و عجيبة زي مثلا اعلان بسكوت و غريبة بسكو مصر، أو مثلا كلب عمال يهوهو في صفا نفس، و زي ما فسر حاتم الموقف بهدوء: ده كلب شارب و بيقولنا ملعون ابوكو

تلاقي عمارات شكلها غريب و تصميمات شوارع افتكاسية و خرايط طريق لماكياج مذيعات التلفزيون و عربيات بتجري هنا و هناك في حرب كلاكسات مقدسة و ولية لابسة اسود بتعدي الشارع جري و قطط بتناكف في عرس، و لا انت فاهم حاجة خالص

تقتنع انك مش ح تفهم و انك كده رضا و الف حمد و الف شكر ليك يا ربونا و بعدين تلاقي مانشيتات جرانين تقريبا اللي كاتبها عيل متخلف امه كانت بتعبطه كل يوم تلات.. و الافيه ان كل الناس برضه زيك بس عايشين في دور الفهيمة و بيطالبوك كل يوم انك ما تكونش كاورك، مش عارف ليه الواحد بيتبطر ع النعمة يا خوانا.. ممكن فعلا يجي يوم تفتح باب بيتك تلاقي واحد لازق في الاكرة و دايب من حواليها زي الجيلي كمان و بيبتسم ابتسامة لزجة.. طب لو جه اليوم ده.. ح تفهم ده ازاي؟

تيجي تقول عادي بقي و مش عارف ايه و الحريم الحمد لله و كله زي العسل تلاقي الحريم كائنات فضائية هربانة من مصحة نفسانية و بيقدسوا الحياة الزوجية و التورلي و شايفين ان اللي بيكتبوا دول عبط و ان الريس مفيش بعد كده و ان الماكياج مهم زي ما اي ست حلوة تبقي منفسنة و ان كل الفضائيات دي فراخ بلاستيك و هما الاصل زي الرشيدي الميزان كده. طب ليه الواحد يزعل من الحريم ما دام هو زعلان من نفسه اساسا، طب هما زنبهم ايه في اننا عايشين في خلاط بيحضرنا لدور مهم احنا مش عارفين هو ايه، بس عارفين انه اكيد مهم.. معلهش يا بنات.. هي مش غلطتكم.. يمكن غلطتنا بس ما اظنش.. طيب هي غلطة مين؟ انا عن نفسي مش متأكد من موضوع الغلطة دي، بس بحاول اتأقلم