ظل الأب

في يوم من الايام مريت علي ميريت علشان اشوف احمد العايدي هناك و بعدين نتحرك. لاقيت قعدة كبيرة فيها عم خيري شلبي، و لأن خيري شلبي شخصية متكلمة بشكل جذاب وساحر، ماملكناش غير اننا نقعد معاه شوية، و الكلام بيجر كلام

سأله العايدي سؤال محوري

"ايه الشخصية اللي بتطاردك، و معرفتش تكتبها لغاية دلوقتي؟"

"والدي"

قالها خيري شلبي بلهجة حاسمة، و بعدين رفع كفه المكلبظه و مشي بيها علي صلعته و هو بيتكلم بسرحان--انتم عارفين الكُتاب

"عمري ما عرفت اكتب ابويا.. كل ما افتكر اني عملتها و كتبته--كشخصية في رواية--اعرف اني ما عرفتش.. كل ما احاول اقرب من شخصيته تبعد عني.. كل ما اقرا اقول لأ.. ابويا مش كده.. الراجل ده غويط بشكل غريب"

فكرت في والدي انا و انا بسمع.انا عملتها بشكل سري قبل كده--الكتابة عن والدي--في مجموعتي الاولانية و بشكل تاني في اليوم التاني و العشرين، و دي اول مرة اقولها

يمكن هي حاجة كده عند الاولاد، الاب..حدوته الكائن متعالي القدرة ابو شخطة جهنمية، لغاية الراجل الرخم بطريقة مؤسفة، و ممكن يتقاطع معاها مرحلة انه اكذوبة كبري، و بعدين--لو احنا محظوظين--مرحلة الصديق ابو عين جريئة، و في الاخر: مرحلة ابويا البركة الجميل، الاب اللي بقي ابن

عارف اني ح اكتب بابا تاني، في رواية انا مخزنها لوقت جاي--لو ربنا ادانا عمر-- و عارف اني ح اكتبه هنا، في البلوج، بس في وقت تاني، زي ما عمل عمر، في واحدة من اجمل و ارق القطع اللي قريتها في حياتي، عن علاقة اب بأبنه

ح اكتب عن بابا، و يمكن كتابتي عنه ح تكون الحاجة اللي ح تخليني اقرب منه اكتر، و يمكن.. يمكن تخليني افهمه اكتر