الجحيم في عينيك انت

كنت واقف في اوضتي، بحاول افتكر حاجة انا ناسيها، و فجأة، ضربني الاحساس ده

انا هو انا.. مش حد تاني.. انا هو اللي يعرف عني كل اللي ما يعرفوش عني حد تاني.. انا اللي عشت كل اللي انا عشته لوحدي.. مش اي حد تاني.. انا اللي بيرفع الورق ده دلوقت حالا، مش اي حد تاني.. انا اللي حاسس بملمسه.. دلوقتي.. مش اي حد تاني

انا اللي كنت صغير، و بيكبر، و لسه ح يكبر اكتر

انا اللي ح اسيب العالم لوحدي، انا اللي رحلتي هي سري، انا اللي بيبص للوحة دي حالا

و انا برضه، اللي مش ممكن يفهم، أو يتفهم، للحظة ان كل انسان فوق الكوكب ده--غير الحيوانات--حاسس باللي انا حاسه.. أن كلنا علي بعضنا مجرد اكوان بسيطة معقدة، ضخمة و ضئيلة، بتلف حوالين نفسها بس

قد ايه التفرد بالشكل ده مرعب..قد ايه الجسور اللي بتربطنا ببعض:سلام.. ابتسامة.. كلمة.. ليلة حب، هي جسور تبان هشة و بسيطة، بس من غيرها كان يبقي وجودنا مستحيل

الشعور ده بيطاردني زي ما السرطان بيطارد اللحم. بيزورني بعنفوان زي الموت.. بس زيارة الموت واحدة، و هو زيارته ملايين

.

.

.

"و تحسب نفسك جرمًا صغيرًا.. و فيك انطوي العالم الأكبر"