designed by: M. Aladdin & H. Fathy

Tuesday, May 24, 2005

نوجا

قطة صغنتوتة و غلبانة، جابتها عمتي من مدرستها، بعد ما زمايلها المدرسين قالولها أن امها سابتها من غير أكل لمدة 10 ايام بحالهم. انا مش عارف إن كانت المدة دي خيال علمي و لا لأ، بس القطيطة كانت هيكل عظمي. صحيت و عمتي بتزغطها اللبن من علبة نقط عيون فاضية احنا بنستخدمها للقطط الصغيرة. حصل امبارح أن عمتي وكلتها اربع مرات اربع علب لبن زائد اربع علب ميه
البنت كانت الصبح مفنيخة
كنت خايف عليها من كتر الأكل انا و عمتي، خصوصا انها كانت ف شبه غيبوبة.. كانت بطنها عاملة زي الكورة الشراب.. انا قلت لعمتي مية ايه اللي هي كانت بتشربهالها؟ عمرك شفتي قط بيشرب وسط الأكل؟! بس المطمئن شوية ان عملية الأخراج عندها اشتغلت.. ده لو محصلش كانت ح تبقي مشكلة.. انا امبارح سمتها نوجا.. من ناجية.. عمتي قالت ان ده كان اسم دلع جدتي، تقريبا 26 سنة و انا مسمعتش اسم الدلع ده. بس اصل نوجا ده دلع ناس كبار.. يالا ما علينا
:)
المهم انا خرجت ف مشوار الصبح، و عمتي خرجت شغلها، و قالتلي ابص علي نوجا كل شوية.. ممكن يعني يحصلها حاجة. و انا برضه انقبض قلبي، مش عارف ليه، بس حصل. رجعت جري علي البيت، علشان ابص علي نوجا--عمتي، و لا مؤاخذة، حاطاها ف الفرن مع فتح الباب فتحة بسيطة، لأن دي الوسيلة الوحيدة اللي بيها ممكن تنجو من نقابةالأشرار اللوكال بتوعنا: بوسي و لالو و ببوس.. ربنا يستر و ما الاقيش طاجن نوجا علي ترابيزة غدا عمتي و ابنها
جريت علي المطبخ، لاقيتها نايمة زي ما هي، بس بتتحرك اكتر. قلت الحمد لله. قدرت اني انام و انا بقول انها بتتحسن. و لما صحيت من شوية، عمتي قالتلي انها بقت زي الفل، و انها لعبت في الصالة شوية النهاردة
علي الله تكملي الرحلة معانا يا نوجا، و تفضلي علي طول كده ناجية

7 comments:

Omar Mostafa said...

على فكرة يا لول انت ممكن ربنا ينجيك من جهنم الححمرا اللي بسبب عمابلك اللي مش ولابد ويدخلك الجنة بسبب حكاية القطط دي.. بجد حاجة جميلة، وباحبها فيك، وبالنسبة لواحد ميعرفش يلمس قطة أصلاً (اللي هو أنا) فحكاياتك عن القطط بالنسبة لي في متعة فيلم كارتون، بغض النظر عن الأجزاء اللي فيها الأخ شادي، واللي كانت أفلام ميلودراما تراجيدية بمعنى الكلمة.. يخرب بيت فقرك يا شيخ :-)

Muhammad Aladdin said...

ههههههههههههههههه
يخليك ليا يا عمور
:)

Incomplete said...

:)
بحب القطط !

الست نعامة said...

سامحوني ولكن القطط بالنسبة لي عبارة عن حيوان غلس وده تقيل، باحاول اتعاطف مع أي قطة بس مش باقدر، تستفزني نظراتها لي، مع إن والدي يعشق القطط، ودائماً يحكي لي عن القطط بتاعته اللي كان بيربيها زمان.
وتاني معذرة على تعليقي هذا.

رحال said...

يا أبو علاء ربنا معاك بس أنا مش عارف أنتوا بعد كده حتلاقوا مكان تناموا فيه و لا لا لحسن القطط عندكوا أكتر منكوا بس علي رأي عمر علي الله القطط دي تدخلك الجنة لحسن أفتكر إنك قلقان من الموضوع ده أكتر مننا

Muhammad Aladdin said...

ورود
هي القطط تتحب فعلا
:)

الست نعامة
مفيش اي داعي للأسف يا فندم، و نورتي البلوج

هندزة
و النبي انت هندزة.. ما تيجي شاي؟

Anonymous said...

Looking for information and found it at this great site... Flutie evista Bentley breakers dereham evista rica Impotence electronic stimulator Off label drug use for neurontin Liste de saunas