نوجا

قطة صغنتوتة و غلبانة، جابتها عمتي من مدرستها، بعد ما زمايلها المدرسين قالولها أن امها سابتها من غير أكل لمدة 10 ايام بحالهم. انا مش عارف إن كانت المدة دي خيال علمي و لا لأ، بس القطيطة كانت هيكل عظمي. صحيت و عمتي بتزغطها اللبن من علبة نقط عيون فاضية احنا بنستخدمها للقطط الصغيرة. حصل امبارح أن عمتي وكلتها اربع مرات اربع علب لبن زائد اربع علب ميه

البنت كانت الصبح مفنيخة

كنت خايف عليها من كتر الأكل انا و عمتي، خصوصا انها كانت ف شبه غيبوبة.. كانت بطنها عاملة زي الكورة الشراب.. انا قلت لعمتي مية ايه اللي هي كانت بتشربهالها؟ عمرك شفتي قط بيشرب وسط الأكل؟! بس المطمئن شوية ان عملية الأخراج عندها اشتغلت.. ده لو محصلش كانت ح تبقي مشكلة.. انا امبارح سمتها نوجا.. من ناجية.. عمتي قالت ان ده كان اسم دلع جدتي، تقريبا 26 سنة و انا مسمعتش اسم الدلع ده. بس اصل نوجا ده دلع ناس كبار.. يالا ما علينا

:)

المهم انا خرجت ف مشوار الصبح، و عمتي خرجت شغلها، و قالتلي ابص علي نوجا كل شوية.. ممكن يعني يحصلها حاجة. و انا برضه انقبض قلبي، مش عارف ليه، بس حصل. رجعت جري علي البيت، علشان ابص علي نوجا--عمتي، و لا مؤاخذة، حاطاها ف الفرن مع فتح الباب فتحة بسيطة، لأن دي الوسيلة الوحيدة اللي بيها ممكن تنجو من نقابةالأشرار اللوكال بتوعنا: بوسي و لالو و ببوس.. ربنا يستر و ما الاقيش طاجن نوجا علي ترابيزة غدا عمتي و ابنها

جريت علي المطبخ، لاقيتها نايمة زي ما هي، بس بتتحرك اكتر. قلت الحمد لله. قدرت اني انام و انا بقول انها بتتحسن. و لما صحيت من شوية، عمتي قالتلي انها بقت زي الفل، و انها لعبت في الصالة شوية النهاردة

علي الله تكملي الرحلة معانا يا نوجا، و تفضلي علي طول كده ناجية