كويلهو و ازمة الذكر المعاصر

النهاردة كان السيد باولو كويلهو-كويليو /كويلو في منطوقات اخري--في ساقية الصاوي. كنت أنا و العايدي مخلصين معاد شغل كله رطن بالانجليزي، و كان العايدي و صديق تاني متحمسين جدا انهم يروحوا يشوفوا كويلهو وجها لوجه.. أنا مش غاوي مقابلات المشاهير، بس تحمس العايدي ، و عربية الصديق التاني كانوا مبرر ما

و لما وصلت هناك اتضح ان كان فيه مبرر تاني مهم جدا

جيوش من النساء الجميلات

اي و الله، "معقولة كل دول بيقروا" علي حد السؤال المندهش من حمدي ابو جليل، و احنا واقفين نستعرض الجيوش الحافلة الخارجة من القاعة. حضر ابو جليل اللقاء، بس احنا جينا متأخرين . "هي القاعة اللي جوا دي قد ايه بالظبط؟" سؤال تاني متعجب من العايدي، و الجيوش لسه بتخرج

مصري علي لبناني علي اجنبي، و اغلب الحاضرين شايلين كتاب كويلهو الجديد بافتنان. العايدي كان متصور شعبية كبيرة، بس كل الشعبية دي؟ ده كان شيء محير بالنسبة له، أو--بلفظ أدق--شيء مثير. أنا كان عندي وجهة نظر تقليدية: أن الناس المفتونين بكويلهو دول مفتونين بيه علشان هو "طريقة لعيش الحياة"، مش فكرة مجرد أدب. أنا فاكر أن ستاد الدار البيضا اتملي عن آخره في استقبال كلمة البابا يوحنا، مع إن المغرب--علي حد معلوماتي المتواضعة--مفيهاش غير مسلمين و يهود., يعني الكلام ف الروحانيات و "النفوس القلقة" بيجتذب اغلب الناس، و اغلب الستات الحلوة، إن لم يكونوا كلهم

ظهر حاتم و انضم إلي "الركب"، و طبعا كان فيه مليون افيه علي كل اللي احنا بنشوفه ده، لدرجة أن العبد لله قال لحاتم

"تصدق كان نفسي احضر الندوة دي"

"ليه يعني؟"

"علشان اسأل سؤال واحد"

"اللي هو؟"

"يا تري يا استاذ كويلهو، مع كل الحاضرات الجميلات المبهورين بيك بالدرجة دي، يا تري حضرتك بتمارس العادة السرية؟"