designed by: M. Aladdin & H. Fathy

Wednesday, May 11, 2005

انهزامات يومية

شعور عامل زي لملمة الورق بعد اجتماع فاشل، أو زي آخر رشفة نسكافيه في آخر معاد مع حبيبتك اللي كانت، أو زي آخر سيجارة في العلبة ف ليل طويل
العظمة وهم خلقته اللحظة، و ح تكتشف، بعد سنين طويلة أن كل المعاني النبيلة ف ساعات كتيرة.. ما بتعنيش حاجة. الحب.. الحنان.. الأيثار.. الذكريات.. الدفا..الوفاء.. سهر الليالي
حاجة كده زي ما تكون في علاقة مع واحدة من سنين، و بعدين تشوفك صدفة ف مكتبة.. تهز راسها بالراحة في تحية ارستقراطية عابرة.. و انت مضطر تهز راسك انت كمان بأدب و بابتسامة محايدة، و بعد ما تسيبك و تمشي، ح تبص علي ضهرها و تستغرب: أن كل اللي ما بينكوا كانت نتيجته معرفة ما بين اتنين اتقابلوا صدفة و شربوا نسكافية من سبع سنين و خلاص.. مجرد فنجان نسكافيه عابر
الكدب علي النفس حرفة قديمة، و لولا أن ربنا خلقه كنا اتجننا، علشان كده انت ح تنام و تقول لنفسك أن كل حاجة ليها معني
كل حاجة ليها معني
و تنام

15 comments:

AZ said...

فى حاجات فى الدنيا لازم تتحس وتتعاش زى ماهى بدون محاوله اضفاء اى معنى او رونق ليها من اى نوع....... كتير اوى بنفسد على نفسنا متع بمحاولتنا البحث عن معانيها
ش كل شىء ليه معنى وبعض الاشياء عظمتها فى خلوها من العمق

نعناعة said...

الحنين للحظات الحلوة .. الرغبة الطفولية أحينا في أن يتوقف الزمن عند لحظه حلوة لا يغادرها غير مدرك أنها ستصبح ممله بعد قليل وأن حلاوتها فى مرورها ومجيء غيرها ...

تعرف الحديث الذي يقول "كثرة الضحك تميت القلب " أعتقدقلة اللحظات الحلوة هو ما يبقي القلب حيا

Muhammad Aladdin said...

موافق علي كلامك جدا يا آز.. بس انتي برضه "بتفكري".. ده كان تدفق شعور، مالوش أي علاقة بالتفكير ف حد ذاته

مينت
اعرفه جداً.. و قلة اللحظات الحلوة هو فعلا اللي بيخليها "حلوة"
:)

علاء

Lasto-adri *Blue* said...

كنت قاعدة اسمع حبة
richard marx 3ala jose feliciano..
و الصراحة كنت فى موود اللا موود أو بمعنى آخر.. لا أنا عارفة اضحك ولا أعيط.. أذاكر ولا أشخبط

و بدأت أتجول ع البلوجز كالعادة..
عارف انت البلوجز تمام زى الجزر.. كل جزيرة تحس انها بعيدة قوى.. تسافر عشان تروح لها
و لما توصل.. تحس بشئ أشبه بالغربة.. و تحن ترجع لجزيرتك تانى.. و تكمل وحدك

لكنى أول مرة أسافر لعندك.. و احس انى عايزة ارجع و أبحر فى تاريخ فاتنى
و عايزة أغنى الجزء دا من أغنية..

For they could not love you,
But still your love was true.
And when no hope was left in sight
On that starry, starry night,
You took your life, as lovers often do.
But I could have told you, Vincent,
This world was never meant for one
As beautiful as you.

Portraits hung in empty halls,
Frameless heads on nameless walls,
With eyes that watch the world and can't forget.
Like the strangers that you've met,
The ragged men in ragged clothes,
The silver thorn of bloody rose,
Lie crushed and broken on the virgin snow.

و صدقنى.. ما عندى اجابة لسؤالك.. إشمعنى الجزء دا؟!

Muhammad Aladdin said...

يااااه يا لست ادري
ده انتي قلتي كل حاجة.. متشكر جدا جدا جدا
يا ريت تكرري الزيارة

علاء

Muhammad Aladdin said...

يعني مرة بآي دي و مرة بآي دي؟ ايه الرضا ده؟
:)

AZ said...

ياعم لست ادري يا جامد
جبتيها منين الاغنيه دي يا أروبه؟؟؟؟؟

Muhammad Aladdin said...

اه صحيح يا أروبة: جبتيها منين؟
:)

Muhammad Aladdin said...

ههههههههههههههههههههههه
ده انتي مصيبة

unknown said...

اممممممممممم..هو لازم يكون نسكافيه
؟؟؟؟؟؟؟؟؟؟؟
لووووووووووووووووول

Lasto-adri *Blue* said...

mosiba leh ba2a ya ostaz mo7amd?!!

wala di mn aroba wa a5awat-ha ;-)

Muhammad Aladdin said...

طبعا لازم يكون فيه نسكافيه!
:P

لست ادري
مصيبة دي مدح يا فندم
:)

علاء

yasmin said...

...........................

Lasto-adri *Blue* said...

tab shokran

Muhammad Aladdin said...

العفو!