designed by: M. Aladdin & H. Fathy

Thursday, September 06, 2007

كلاكيت تاني مرة-- بمناسبة الاشاعات الدنيئة ضد رئيسنا المحبوب



تتقدم محافظة المنوفية و مركز محلي منوف و السادة اعضاء المجالس المحلية و البلدية و كبار رجال هيئة الصرف الصحي و التأمين الصحي و علي و محمود صحي و جميع ابناء المنوفية في عموم الجمهورية بالتهنئة الحارة و الدعاء المستجاب لخفي الألطاف و لبيب الألباب كبير كبراء المنوفية و مهندس محو الأمية إمبراطور الضربة الجوية و معالج النزلة المعوية نصر عبده و جل حمده و هزم الاحزاب وحده سيد الحناكش و عم الشباب و عميد عمداء الجمهورية حسونة الفطاطري الشهير بالحنكوش المخيف ذو الفتوة و المنعة ذو الثمانين ربيعا و الخمسة و العشرون بديعًا علي خطبة جلالته التاريخية التي فيها وعد و اوفى، و قدر و عفى، و اخذ و اعطى، و قدر و لطف، و صال و جال، و اعتدل و سدد، فكانت في تمانيات الوطن هدفًا غاليًا و أملًا مبتغى و مرحلة جديدة من مراحل العمل الوطني علي هدى خطة تلاتة خمسة اتنين و افتح ع الونجين يا حلبسه، مواصلًا مسيرة المستقبل بمسئولية و أمانة وسيادة و استقلال و ارادة و صمود بروح العبور و ايطاليا تسعين، مادام في الصدر حليب و مادام الخال والد، بلا اهتزاز أو زعزعة أو معمعة أو شخلعة، بلا ابطاء و لا إنحناء و لا لين و لا هوادة و لا ضغوط و لا تحاليل و لا حجوزات. نسأل لكم المولى مصر بلا سكان و أمن بلا احزان و بحر بلا شطآن و ايكش تولع، ادامكم الله حنكوشًا مخيفًا تهابه كتاكيت الظلام و عششه إلى ابد الآبدين و إلي أن تحترق النجوم و حسادك يموتوا بغيظهم، وفقكم إلي ما فيه خير المنوفية، و عشت يا غالي جبينك عالي.

إمضاء

جمعية زهور المنوفية الاهلية بالاشتراك مع كوافير الأموّر (سعيد بوستيج) و فرن بحبك يا ريس للحاج ابو سماعين و ابنه مخلوف الشهير بالاهبل

10 comments:

Anonymous said...

عنصرى
من المعروف علميا ان الشعب المنوفى هو شعب الله المختار
:(

Anonymous said...

حرام اللي بيحصل لنا دة ،هوة باين إن الراجل دة هيقعد فوق قلوبنا عشان يكفّر عن سيئاتنا إللي عملناها و إللي برضو ماعملناهاش

فتاة عشوائية said...

ههههههههه
حلوة أوى
:)

Anonymous said...

كل اللى ممكن يكون لفت انتباهى عنوان المدونه اللى فوق دى

باسم said...

مات ايه يا باشا ؟
هوا فيه رئيس بيموت ؟

عادل إمام - مسرحية الزعيم


قد يتبدل أسمك و رسمك
لكن جوهرك الفرد لا يتحول
فالصمت وشمك , و الصمت وسمك
و الصمت حيث ألتفت يرين و يسمك
و الصمت بين يديك المصمغتين المشبكتين
يلف الفراشة و العنكبوت

أمل دنقل - قصيدة صلاه

Anonymous said...

بص يا حبيبي تتريق برحتك وتستعبط باردو بارحتك
ماتنساش يا سياده كاتب القصص البتكتبها ع ورقه بفره بتقول عليها روايه
متنساش سعد مكاوي ومحمد كامل حسين و عبدالرحمن الشرقاوي واحمد عبد المعظي حجازي من المنوفيه يا وااد يا جامد

fawest said...

اسمع دى نكتة سمعتها من رواية 22درجة
استطاعت المخابرات الامريكية ان تحصل على رقم الموبيل الخاص بربنا و اتصل بية بوش و سألة أمتى ستنتهى دولة امريكا كقوة عظمى
قال بعد خمسين سنة
وعدما سألة بوتين متى ستعود روسيا قوى عظمى قال بعد خمسين سنة
وعندما سألة حسنى مبارك متى ستنتهى ولايتى على الشعب المصرى
فكر قليلا وقال مش فى عهدى
ههههههههههههها
عذرا للمتمسكين بالاديان اصل حسنى بيتحدى الشعب
فلو عدكو غيرة على دينكو فين غيرتكو على البلد
كما قال العقاد الشعب الى بيسمع الكلام دة يستاهل ينضرب بالجزمة
عندما قال عبد الناصر انا الذى علمتكوا الكرامة
والظاهر أن الجزمة مش نفعة معانا علشان نفوق

Mother Courage said...

علاء ... كيف حالك؟

سؤال بسيط... هو الذات الرئاسية غير محصنه وفقا للقانون المصري؟

مصطفى محمد said...

أنا شايف ان الحالة الغريبة الفريدة اللي احنا عايشنها حتخلص طبقاً لنظرية : التنين خلصوا على بعض .. و ذلك عن طريق تضخم سلطات و نفوذ موالي مبارك الأب مقابلها موالي مبارك الابن حتي يفتك كل فريق بالآخر .. كده مع نفسهم .. و ساعتها المجتهد في الشارع و الأقوي تأثيراً هو ( من المنطقي ساعتها) هو اللي ساعتها هيمسك البلد من غير قلق .. و لا انا بخرف؟

Muhammad Aladdin said...

المجهول 1
هيهيههيهيههيهي

المجهول 2
كل بلد يستحق حاكمه للأسف

قياس المعرفة
اسمك احلي
:)

حد غيره
طيب

باسم
يا عميىىىىىىىىىىىى!

منال
صوت المنوفية البار
:)

فاوست
وضعنا بجد عبثي اكتر من النكتة دي

برافا
ازيك يا استاذة..ليكي وحشة
:)
انا كويس الحمد لله
الذات الرئاسية في مصر ليها تهمة لوحدها كده زي العيب في الذات الملكية ايام جدي و جدك

مصطفي
محدش يقدر يقول انك بتخرف لأنه اظن ان العقل و الخرف بقم مجرد اسامي مالهاش اي ظل علي الواقع المصري الحالي