designed by: M. Aladdin & H. Fathy

Tuesday, January 30, 2007

اجندة صغيرة..

الروائي الكبير بهاء طاهر يلتقي بقراءه و محبيه النهاردة 30 يناير 2007، في حفل توقيع تقيمه الجامعة الامريكية بجناحها في معرض القاهرة الدولي للكتاب من الساعة 1 للساعة 3 الضهر إن شاء الله


مكتبة كتب خان بالمعادي اقامت حفل توقيع للروائي الكبير صنع الله إبراهيم في يوم 28 يناير 2007، و كانت فرصه كبيرة و نادرة لمحبي الكاتب الكبير انهم يناقشوه في الادب و السياسة كمان، و غطتها الصحفية سلوى اللوباني في موقع إيلاف الاليكتروني (بص علي اللينك)-- الصورة: صنع الله إبراهيم و قفا محمد علاء الدين
:)
كمان تستضيف دار ميريت الكاتب الكبير في جناحها بمعرض الكتاب في حفل توقيع جديد للتلصص الساعة 3 الضهر


الروائي الكبير إبراهيم أصلان برضه عنده حفلة توقيع من الساعة 5 للساعة 7 بجناح دار الشروق في معرض القاهرة الدولي للكتاب النهاردة اللي هو برضه موافق 30 يناير 2007



محبة و معزة كبيرة جدا جدا جدا باحملها لرانيا امين، اللي ليها افضال كتير علي العبد لله كان نفسي اعدها لولا اني عارف انها ما بتحبش تقرا كلام زي ده--إن قرته :)-- بس فضلها الكبير اللي جر كل الافضال التانية انها صديقة حقيقية و ست جدعة بجد، في زمان بقت فيه الحاجات الجد اندر من البني آدمين. ذات الكسوف هو اللي منعني اني اكتب عن رانيا امين بس ما يمنعش اني ابلغ اي حد مهتم بيشوف الصفحة دي أن الكاتبة و الرسامة الموهوبة رانيا امين عندها حفلين للتوقيع بمقر دار إلياس (سراي إيطاليا) النهاردة 30 يناير و بكرة 31 يناير علي اصداراتها المتنوعة في ادب الاطفال و منها اكيد سلسلة فرحانة(برجاء رؤية اللينك)، و الاتنين في ذات المكان و ذات الوقت: من 3 الضهر لحد 5
كل التوفيق اللي تستحقيه يا رانيا
:)




كتاب أسامة الدناصوري الأخير العذب "كلبي الهَرِم.. كلبي الحبيب" في جناح دار ميريت بمعرض القاهرة الدولي للكتاب، سراي 4
.
.
و اخيرًا و ليس آخرا حصل أن نيرو كلمتني و قالتلي الكتاب ما نزلش ليه؟! و طبعا ده كان شيء مزعج جدًا لأن الكتاب نزل و الحمد لله بيبيع كويس.. لجميع الاصدقاء و المهتمين رواية "اليوم الثاني و العشرون" في جناح 4ب بتاع الناشرين العرب(سراي ألمانيا سابقًا) امام جناح السعودية. كمان ممكن تلاقوها عند جناح دار ليلى للنشر و التوزيع في سراي 4 و مدخل سراي كندا
...............................................................................
صورة بهاء طاهر: من ارشيف مؤسسة ورقة و قلم الثقافية--تصوير: مصطفي علي.
صورة صنع الله إبراهيم: نقلًا عن إيلاف
صورة غلاف كلبي الهرم: مدونة احمد العايدي

3 comments:

iDip said...

أنا عاوز أترك كل اللي كتبته واعلق على القفا

في فلم "الكيف" بطولة محمود عبدالعزيز
يغني ممثل ويقول
آه يا قفا آه يا قفا

و يرد عليه محمود عبدالعزيز
بحبك يا ستموني

تمنياتي لكتابك بأعلى المبيعات يا علاؤوني
;)

Anonymous said...

يا محمد باشا احب ااكد على كلام سيادتك ان كتابك نزل خصوصا انه والحمد لله في نسخة منه معانا في ورقة وقلم حت من المعرض امبارح فمن المتوقع انك تستقبل اليومين الجايين شوية تعليقات مننا
و يجعله عامر
وعقبال كل رواية جديدة ياباشا
( على فكرة ده مش هايعفيك من نسخة هدية )

Muhammad Aladdin said...

آي
تصحيح: آه يا قفا بيقولها فؤاد خليل علشان يغنيها عبعزيز و الكورس النسائي المكون من فراخ بلدي مصابة بالسعال الديكي، و بحبك يا ستموني مهما الناس لاموني
و تمنياتي ليك بأعلى مبيعات في كل حاجة بتعملها يا آيديبوني
;) ;)

عز
يا باشا و انا احب أأكد علي تأكيد سعادتك علي تأكيد سعادتي أن سعادة الكتاب اتنشر بسعادة علي سعادة القراء و مستنيين رأي سعادة ورقة و قلم علي سعادة روايتي بمنتهي السعادة
:P

و طبعا ليك نسخة
:)