...كل سنة و احنا طيبين

اول مرة اقولها النهاردة لناس لا يعرفوني و لا اعرفهم. يمكن جنونة البلوج دي نفسها كده: التواصل بيني و بين ناس ما اعرفهمش. يمكن ده حصل عبر الكتب، بس اكيد ده كان بيحصل بين حكاياتي و الناس، مش ما بيني انا و الناس.. صحيح الكاتب حكاياته جزء كبير من حياته، و ساعات كتير كمان تكون اصدق من الكلام المرسل علي لسانه كشخص، بس اني اتكلم، و اهني ناس بجد ما اعرفهاش ده شيء غريب
شيء غريب ليه؟ لأني ساعات اتكسف—فعلا اتكسف—اهني اي حد اعرفه بأي حاجة، مش عارف ليه، بس اهي حاجة غريبة زي انك تشوف حد تعرفه من بعيد و فعلا تكسل تروح تسلم عليه..لا تعرف ليه و لا هو يعرف هو كمان
يمكن البوست و التهنئة اللي هنا زي الاعتذار المتأخر لكل الناس اللي اعرفها و ما سلمتش عليها، و زي كل الناس اللي تعرفني بس ما سلمتش عليا. بجد كل سنة و انتم طيبين، و بلاش تسمعوا ندا الكآبة اللي بيصطادنا كلنا، في ليالي زي دي