محمد الغانم

من قيمة سنة، جاني تليفون من المجلس العربي للطفولة و التنمية، بيتي التاني و مكان الذكريات الجميلة. كان علي الناحية التانية من التليفون الاستاذ عمر درديري، مدير الشئون المالية و الادارية، و الراجل اللي بحترمه جدًا، طبعًا عاتبني باعتباري شاب هراب و كاوتش، و بعدين قالي فيه حد عايز يكلمك

و جه من الناحية التانية صوت منمق حميم ليه لهجة خليجية، قلي انه كان عايز يكلمني من زمن طويل، باعتباره اخويا الصغير

:)

اسمه محمد الغانم، شاب كويتي صغير--محمد عنده 21 سنة--و من اهم و انشط الشباب العرب للي شفتهم في حياتي، و من اكترهم حماسة و اخلاص. المسألة بدأت بتبني د.فريدة العلاقي--مستشارة الامير طلال و احد الديناموهات في العمل العربى الاهلي--لمحمد الغانم الصغير، و منها عرف العبد لله عن طريق السمع، لأن فريدة بتعتبرني ابنها الكبير، زي ما باعتبرها امي بالظبط

و محمد و هو في السن ده شارك في ما يزيد عن 12 اجتماع في الأمم المتحدة في بيروت، نيو يورك و نيروبي.و سفريات لأمكنة اكتر من الحصر ورا الشغل، ومن خلال عمله في الشبكة العالمية للشباب (ودي منظمة شبابية غير حكومية في نيو يورك وحاصلة على الصفة الاستشارية في الجمعية الاقتصادية والاجتماعية للأمم المتحدة) وبرضه كونه عضو مؤسس للهيئة الاستشارية الشبابية لصندوق الأمم المتحدة للسكان، بيشتغل وبشكل دايم مع برنامج الأمم المتحدة للشباب على متابعة مستجدات الحركة الشبابية في الدول العربية

محمد بيدرس في الجامعة الامريكية في بيروت، و طبعا كلية العلوم السياسية، و باعتبر أن مقابلته، و تليفوناتنا المستمرة ما بين بيروت و القاهرة، شيء جميل و مهم في الحياة، و بيخليني ابعت معاه السلام لأغلي الناس، خولة و فريدة، و المهم برضه اني اتابع مسيرة شاب عربي ناجح، بيعتبر--و هو في السن الصغيرة دي--فخر لبلاده من غير كلام، و باتمني انه يجي اليوم اللي يكون فيه محمد المتمرد الناقم عن حق--كانت ليه خناقة مشهورة مع جون نجروبونتي في الامم المتحدة--وزير لخارجية بلاده، و يمكن اكتر كمان، علشان ده اللي يستحقه فعلًا، و علشان يعني--و لا مؤاخذة--يجيب للعيال كام عقد عمل حلوين

:)

و إن شاء الله ح انشر هنا مقال ليه في تمام يوم 5 اكتوبر، متزامنة مع النشر في جريدة القبس الكويتية، و اظن انه بيطرح فيه مسألة هامة تخص وطنه الصغير الكويت، و وطنه الكبير اللي هي الامة العربية كلها، و اشكر محمد علي لفتته اللطيفة بالمقال، و اخد رأي لعبد لله المتواضع فيه، و الاهم من ده، اشكره علي صداقته و اهتمامه و اخوته الدافية ، و ربنا يوفقك يا محمد