خرابيش كلام

فوق المداين ألف علامة تعجب، و يجي كام علامة استفهام كده من ناس حكما قليلين الناس فاكرينهم كاوركات. فوق المداين بخار همسة حب، أو زفرة يأس، أو صرخة نصر أو هزيمة أو ألم. فوق المداين حبة كلام متبعترين، بيلفوا شوية قبل ما يتعبوا و يقعوا في بير النسيان الكبير اللي بيمشي ورانا زي العيل الرزل. اهو كلامي زعل البير اهه و قعد جنبي و زام و عينيه نظرة كلب مكسور الجناح. ما تزعلش يا سيدي. انت جميل و زي السكر و من غيرك الواحد كان ح يفتكر نظرة عين حبيبته قبل ما تسيبه، أو رعشة بق ابوه و هو بيضربه بالقلم، و حركة الايد المحتقرة من كائنات شايفة انها احسن منك. انت عسول يا سيد بير. كنا بجد ح نعمل من غيرك ايه؟! ما تزعلش بقي. ألا قولي صحيح: هو انت باعتبارك بير في الارض، يا تري بتبص لفوق المداين؟ و لا انت بير لفوق؟
فوق المداين روايح عرق تعب ايام طويلة، و مزيج البارفانات اللي بنخبي بيها ريحة جسمنا علشان لحظة رضا، و روايح متعة بتتقشر من فوق جسم الشباب و الصبايا علشان تكون طبقات تانية تتقشر بأمر ربك و حنيته علي عباده. فوق المداين صريخ و صداه بيضرب حيطان السما من غير رجا. فوق المداين شمس تبص لك و تغمز و تبتسم قبل ما تلبس وش القمر علشان تطاردك حتي في احلامك. جاسوسة مُلعب مزاجها مش لطيف، حريقة كبيرة في السما سموها شمس لأنها بتحترف حرقك من غير سبب. طيب ليه يا ست شموسة؟ تضحك و تقول: طب ما انا بصالحك بالقمر
فوق المداين احلام بتتشابك و تتلزق و تضيع معالمها في كتل بتزاحم نفسها علي جبين السما. احلام احنا بنسميها سحابات و فينا اللي بيعرف يقراها مركب أو شراع، طيارة أو جندي في ميدان. احلام سابت صدورنا ف زفير و سرحت تلعبها الريح بدلعها ساعة صفا، و تشوطها بغل ساعة غضب
فوق المداين خلايق زحمة و حاجات غريبة بتزاحم طيور السما، اللي بتشتمنا في كل يوم مليون شتيمة لأنها لو فلتت من الخرطوش اكيد ح تلزقلها ف حلم غريب أو في ريحة مش ولابد. علشان كده، وفر القرشين تمن الدكتور النفساني، أو اجرة الولية المُلعب علي باب هارديز، و ما تبصش لفوق، لأن عمك و عمي قالوا زمان: اللي يبص لفوق يتعب