خطة الهجوم ألف

في وسط الكوربة، أو في وسط البلد، أو في المهندسين و فلول من بقايا المعادي، و كمان في الحلمية و السيدة، و في حتت تانية من غير تفاصيل بقي و وجع دماغ؛ ح تلاقي بنات سكر بيمشوا بخفة و دلع، بيرقصوا فوق اسفلت شارعك رهوانات. قبل ما تتهبل و تروح تلزق كام حلم علي جيب بنطلونها الجينز الوراني اسأل نفسك سؤال: يا تري مين اللي طلق كل النكت دي-و انت طبعا طبعا وسطهم-فوق اسفلت الطريق؟
بنات اجانب حلوين زي طعم الرغيف الفرنساوي من غير غموس، بيطيروا فوق هوا مدينتك الزنخ و عينيهم الزرق الجميلة مرايا مختلفة تشوف وشك فيها تنبسط و تنجلي. قبل ما تروح ترمي حبة من غفلة و تطفل فوق مسقط جبالهم الناعمين اسأل نفسك سؤال: هو ليه كلهم كده-بالصلاة علي النبي-لازم تشوف بينهم بنت حلوة علي الاقل؟ فين السياح العُجر ابوس ايد المعاون؟
و في الكافيتيريات اللي بتسرق شوية نضافة من فلوس محدش يعرف منين جابوها تلاقي ألف تليفزيون يصب حور عين جاهزين من غير لا جنة و لا نار، التليفزيون بيصب بجشع تاجر نخاسة واخدله مطرح جنب الكولوزيم و فاتح جاعورته. اشفط الشيشة يا بطل و اسأل هم مين دول يا بو سماعين و ايه اللي جابهم هينيه؟!!!!
و بين كل بنت و التانية لازم تسأل نفسك ايه السبب في تقدم الغرب يا هندسة؟ اكيد ح تعرف ان السبب في النظام و التخطيط، فعند النقطة دي لازم تمنهج جهودك المقدسة يا بطل و تظبط حالك و ترسملك خطة هجوم تنطر عنك نفوسة و ست ابوها و فوتك بعافية. لازم من خطة للهجوم تدخلك عصر النسوان الديجيتال علشان تبقي ولد تكنولوجي مواكب احدث صيحة في سراير المتعة المتقدمة. خطة الهجوم ألف. يالا يا بطل. ربنا و تلاتة ملايكة و جوز صعايدة وياك. الله! بتبصلي ليه كده؟ واقف كده ليه زي العيل اللي امه رفضت تديله الباريزة؟! آآآه! لا يا سيدي.. الخطة دي انا نفسي مش عارفها! ربنا يعينك!