عيب يا لولو، يا لولو عيب

فوق السرير لولو بتقلع ماضيها و ايام سنينها اللي فاتت و محدش يقدر يقول لها عيب. لأن لولو طيبة و بنت حلال و كانت و ما زالت تتحط علي الجرح يطيب، بس اكتشفت ان حبة الدهون اللي عندها متوزعين كويس و أن فيه بياعين كرشة كتير و الحمد لله
محدش بيقول للولو عيب يا لولو لأن تقريبا ما بقاش حد بيستعيب حاجة، و تقريبا برضه كله بقي بيعمل نفس العيب فمبقاش عيب. لولو عن نفسها-بعد تفكير طويل و حبه زمزئة و شجون و بقايا هبل-اكتشفت ان كل الستات اللي بيقلعوا بقم حاجات مهمة خالص و ما بقوش يقفوا قدام الكبابجي زي كلاب السكك، و إن احلام العربيات و الهدوم و الروايح و السفريات و الفيكتوريا سيكريت خلاص ما بقتش احلام لأنها بقت روتين الحياة اليومي
اكتشفت لولو أن حراس الاحترام و القيم هما بياعين الكرشة و أن ذلك من فضل ربي و اللهم اجعله بلدا آمنا. طيب مين ما يحبش يكون محترم و التمن بسيط. بسيط لأنه بعد دوسة و التانية الاستوب ووتش ح تشتغل و تكتشف لولو أن المسائل كلها عشر دقايق تسوي حياة كاملة مليانة عبيد مخلصين، و لازملها حبة ذكاوة و تفتيح مخ علشان تعمل خميرة تكفيها بعد دوبان الدهن أو انفجاره
فوق السرير لولو عريانة من أي ذرة من الماضي الحزين و اللي كان. محدش يقدر يقول للولو عيب، و انا عن نفسي مش ح اقدر اقول عيب، لأني لو قلتها لولو ح تفقعني ضحكة تخليني استعيب روحي انا كمان