designed by: M. Aladdin & H. Fathy

Sunday, October 02, 2005

ألغاز صغيرة


كل ما أبص علي بطاقة جدي استغرب. مكان ميلاد جدي في بطاقته هو الحضرة في اسكندرية، و زي ما بيقول بابا انها مش الحضرة الشعبية اللي فيها السجن، لأ، جزء تاني منها ملتحم بباب شرق و المنتزة. جميل. بس انا عارف ان جدي بيت ابوه كان في درب سعادة، ورا قصر الخديو/السلطان/ الملك في عابدين. طيب ايه اللي خلاه يتولد في اسكندرية؟
اعرف ان جدي الكبير—منشيء العائلة يعني—كان ظابط بحري في عهد محمد علي، و اللي توفي في موقعة نافارين البحرية—بابا ما بيقولهاش بالواو ابدًا:نوارين—و اللي ممكن تلاقي اسمه في قايمة شهداء الجيش المصري في الكلية الحربية (أو في مكان عسكري تاني) علي كلام بابا. و ده لغزين تاني. مين فعلًا منشيء عائلتي؟! و هل يا تري فعلًا مات في نافارين و لا لأ؟! طيب: سي عبد القادر، جدي الطيب، اتولد في اسكندرية لأن والدته ولدته في اجازة؟ و لا هو اساسا كان عايش في اسكندرية قبل سفره لأوروبا و بيت درب سعادة ده عاش فيه جدي الكبير بس؟ و لا هما في البطاقة كتبوا أي كلام و شكرًا و لا فيه لا اسكندرية و لا حضرة؟ و لا هو ايه الموضوع اساسا؟
مش عارف، بس كل اللي انا عارفه ان ثروة عيلتي المتواضعة من بطايق و ورق رسمي و صور نادرة لازم احافظ عليها علي قد ما اقدر—عمتي، فاقدة الاحساس بالتاريخ، رمت صور تاريخية كتير!!!!—و أن الالغاز الصغيرة الكتيرة جدًا دي (انا ما قلتش غير اتنين تلاته بس) هي مادة خصبة جدًا لرواية نهرية ح تتكتب في يوم من الايام، و يمكن ساعة ما اكتب الرواية دي تتحل الالغاز دي بالمعلومات أو بخيالي، و يمكن تزيد اكتر و اكتر، علشان تحلي طعم الحياة شوية
:)

7 comments:

Anonymous said...

Can't wait to read your interesting novel to be ISA...and I think your imagination would make it even more beautiful...it is good sometimes when the documents and facts are kinda gone, 3ashan it gives us a space keda to make up a darn good story!!!

Anonymous said...

(Magdy ElShafee): See that I.D. ? it says alot..history sociology ..art..graphics.....I loved it

Muhammad Aladdin said...

شكرا يا نيرو.. بس مظنش اني ح ابتديها قريب، و فعلا مسألة إطلاق الخيال دي مهمة، و مهمة جدًا كمان لأن ها هي الحدوتة اساسا، و ما يمنعش تستعين بتاريخ و تفاصيل حصلت فعلا
:)

Muhammad Aladdin said...

شكرا يا مجود
:)

aMRALi said...

جميل قوى ان الانسان يدور على تاريخ عيلته
انا ليا اهل والدتى مكنتش اعرف عنهم حاجه لان والدتى اتجوز وسافرت الكويت من 25 سنه وانا اتولدت وعشت هناك
بس بدات من فتره ادور فى الموضوع ده ووصلت ان ليا خال عايش فى السعوديه وبدور عالباقى
بس فعلا ممتع قوى لما تكتشف حاجه بتتعب على ما تكتشفها بيكون احساس حلو قوى
ويارب نشوف قريب تاريخ جدك وعيلتك قريب
وكل سنه وانت طيب بمناسبة رمضان انت وكل الزائرين لصفحتك
عمرو على

Muhammad Aladdin said...

و انت بصحة و سلامة يا عمور.. ربنا يعيده بالخير علي الجميع
:)

Anonymous said...

best regards, nice info V40 volvo