اعتذار متأخر إلي محمد ناجي

في يوم من الايام نصحني منير عامر بقرايته، مكنتش لسه قريته و مكنتش اقدر استوعب معني أن الكلام عليه مش كتير زي كتاب تانيين. عادة بيبقي للموضوع ده معنيين، يعني يأما الراجل كاتب علي قده و خلاص، و الناس بطلت تتكلم عنه لأنه ببساطة مات، يأما هو كاتب كويس أو متميز أو حتي استثنائي بس فيه ناس نسيوه عن عمد. بصراحة بعد ما قريت لحن الصباح من قيمة ساعتين—آخر روايات محمد ناجي—و انا فعلًا مش عارف افهم الراجل ده، الكاتب العظيم ده، ازاي ما حدش بيتكلم عنه زي ناس كتير جدًا هو بيفوق اغلبهم من غير جدال. موهبة الكاتب ده استثنائية، و كتابته البسيطة اللي بتبان هشة بتحوي خلاصة حياة كاملة، و عين شاعر موهوب حساس خافت الصوت. كتابة عاملة زي حته الحرير، كتابة تشدك و تهزك و تحضنك و تزعلك و تضحك عليك و بعدين تصالحك. باراجراف واحد من محمد ناجي ممكن يخليك تفكر في انك ازاي بقيت كاتب و انت مكانك الحقيقي وسط السبرسجية و البوهيجيه و تباعين المكروباص . محمد ناجي واحد من اعظم الناس اللي قريت ليهم و واحد من الناس القليلين اللي بيهزموا بارانويتي و غروري بمجرد جملة واحدة. كاتب تقعد تحت رجليه و انت بتتمني نسمة هوا شاردة تشيل من روحه نتفاية تدفي قلبك البارد
عمي محمد ناجي، باعتذرلك عن كل يوم انا مقريتش فيه شغلك، و باعتذرلك في كل مرة جبت فيها سيرة كُتاب مصر الاستثنائيين و مجبتش سيرتك عن جهل و غباوة و قلة عقل

للمهتمين: رجاء قراءة الروايات الاتية لمحمد ناجي؛ خافية قمر، لحن الصباح، العايقة بنت الزين