اكسير البهجة

من غير تحذلق، محمد سعد بيسعدني
رحت مخصوص لصديق علشان اسمع تاني اغنية عوكالو، و علشان اشوف رقصه. بعيد عن طواغيت التنظير و الفن الهادف، اقدر اقول أن محمد سعد هو اكبر مُصدر للبهجة من ايام عادل امام، و بطعم متميز جدًا، و بتمكن حقيقي و بذكاء عظيم.. ده مش مدح مجاني لأن العبد لله شغلته الكوميديا (أو جزء من اشغاله بمعني ادق) و اقدر اقول أن الذكاء اللي بيبان في جاج كوميدي صغير بيقوله سعد مش حاجة تافهة و ببلاش كده، لأ.. فيه فهم و تمكن، و فيه فكرة، و فيه--مع كل ده--فطرة عفوية مهمة جدًا لأي شغل ناجح
مثال واحد علي ده، لما بيدخل فجأة في عوكالو مقطع من اعلان بسكوت و غريبة بسكو مصر، الحاسة المرهفة اللي بتقول قد ايه كانت سنين التمانينيات، و أول التسعينات، ملينة بالأفيهات و الحاجات اللي تخنق.. كل اللي عايزينه هي عين ذكية زي دي.. و افلام اجمل و اجمل كل يوم