ايام زمان

زمان، من يجي اتناشر سنة، في يونيو من سنة 1993 بالظبط، كانت هي مليانة شوية، و انا كنت اقصر كتير. هي حبوب وشها خفت، و انا لبست نضارة
قضينا مع بعض اسبوع شغل متعب، بس كان شغل بطعم الفرحة. كنا بنمثل وطنا العربي في مؤتمر فيينا بتاع حقوق الأنسان. و بعدها--زي العادة--كل واحد فينا اختفي و راح ف حتة. انا كتبت كتب صغيرة، و هي بقت نجمة سينما و تليفزيون معروفة
بسمة


و لما كان واحد صاحبي رايح العرض الخاص بتاع فيلمها "النعامة و الطاووس"، قولتله يسلملي عليها. مكنتش متأكد--مع كده--انها ح تفضل فاكرة علاء من وسط السبعتاشر شاب من كل الوطن العربي، اللي كلوا عيش و ملح مع بعض من سنين طويلة
بس لما صاحبي كلمها، و علي حسب ما بيقول، قالها بس اسمي،راحت قالتله "علاء! ازيه؟! اديله نمرتي!" فعلا كلمتها، و كانت مكالمة لطيفة جدا، الحياة و العيشة و اللي عايشينها، و كعادة كل الحاجات اللي زي دي، اتفقنا نتقابل و محصلش. حصل بس بالصدفة لما كانت في بيتي الأول، دار الهلال، و كانت طالعة من عند محمود سعد. عرفتني ف لحظة
"علاء.. انت كبرت قوي"
و لما كتبت البوست بتاع امبارح، عن الفيلم و جيهان عبد الله، فكرت في ان بسمة هي حد مناسب جدا للدور النسائي، بس يا تري ده ممكن يحصل، و نرجع زمايل زي زمان؟
:)
سؤال بسيبه للزمن، و لغاية ما يجاوبه، انا فعلا نفسي اقولها أنها--زي ناس نادرة في حياة كل واحد فينا--بتفكرني بأجمل ايام حياتي