designed by: M. Aladdin & H. Fathy

Wednesday, June 01, 2005

كل النهايات سيئة.. و إلا لما انتهي شيء

لما دخلت البيت امبارح، سمعت صوت بوسي، ففرحت.. نزلت علي ركبي و طبطبت عليها و انا مبسوط.. أم العيال كانت بتصيع بره البيت مدة 6 ايام بحالهم، عمتي قالت انها اكيد ماتت.. و مادام هي بتنونو في وشي كده، يبقي اكيد ما ماتتش
بس صوت عمتي جه من جوا و هي بتنادي اسمي بتون انا عارفه كويس
الخبر جه بعدها طوالي: نوجا ماتت
انحشرت في محاولاتها المستميتة للخروج من الفرن ف ما بين بابه و جسم البوتاجاز.. قعدت تنونو في يأس، محدش رد
مكانش ف البيت غير ابن عمتي، اللي افتكرها بتنونو كعادتها، علشان تخرج أو علشان تاكل
ماتت
ماتت وحيدة زي ما كل مخلوق في البيت ده بيموت
الموت ببطء.. الموت من غير ماحد ياخد باله
قبل ما اخرج كانت بتجري هنا و هناك زي شارلي شابلن.. سعرها الرمادي المنفوش و عينيها الزرقا.. جسمها اللي كان بدأ يتختخ من خمس وجبات لبن يوميا
كل ده عدي قدام عيني، و انا بشوفها ملفوفة في كيس بلاستيك، و محطوطة جنب الباب الوراني بتاع الجنينة
و زي كل مرة، خدت الكيس و طلعت بالفاس، عملت حفرة صغيرة و بعد ثانية، كان الجسم اللاهي بتاع كام ساعة عدوا مدفون تحت التراب و الطين
مؤلم انك تبص ف عينين القطط بعد ما تموت.. البريق الزجاجي و البق المفتوح
وقفت قدام القبر الصغير و زي عادتي--كل ما ادفن قط--قريت الفاتحة
مش عارف أن كان ده صح و لا لأ--و ياريت محدش يقولي بنبرة حكمة ايه الصح--لكني كنت دايما بحس ان القطط دي روح، و الروح تجوز عليها الرحمة.. تجوز عليها اننا نودعها بمحبة، و بدعاء
كانت ليلة طويلة
بس اللي هونها، كلمة بيقولها المصريين دايما
"ما تعزش علي اللي خلقها"

12 comments:

SaSo said...

تعليقا على العنوان
"Everything is ok in the end.if itsnt ok ,its not the end"

القطط
المخلوقات الفرويه التى خلقت لنتعاطف معها من دون الحيوانات الاخرى تنتزع الشفقه فى حياتها وموتها.

Muhammad Aladdin said...

تعليق فيه وجهة نظر محترمة افهمها، بس مش قادر اتفهمها
شكرا علي زيارتك يا ساسو
:)

Guevara said...

شد حيلك يا محمد..انت راجل و تستحمل

Muhammad Aladdin said...

:)
شكرا يا جيفو

نعناعة said...

:(

Eve said...

"ماتت وحيدة زي ما كل مخلوق في البيت ده بيموت. الموت ببطء.. الموت من غير ماحد ياخد باله"
!
That hurts!

Muhammad Aladdin said...

Truth hearts, Eve

Muhammad Aladdin said...

شكرا يا إن

Incomplete said...

مؤلم مؤلم..
:(
:(
:(
:(
بس ربنا عايز كده...
البقاء لله..

Muhammad Aladdin said...

فعلا يا ورود

Anonymous said...

This is very interesting site... Acne forehead cadillac ambien sale laptop apple Internet fax canada Flash cards driver

سالي محمد said...

عارف كنت بعمل كده برده مع الفراخ اللى كانت عايشه فوق سطوح عمتى بس الفرق انى كنت بحلم بيهم بالليل الفرخه البيضا ام نقط سودا كتير جاتلى يوم ما ماتت فى الحلم وقعدت تجرى جنبى زى ماكانت بتعمل
كنت بدفن الفرخه بايدى واحفرلهم تحت اوى عشان محدش يشوفهم وهما مايتين كانت ماما تضحك عليا بس لما كانت تلاقينى بعيط تاخدنى فى حضنها وتقلى بكره تحبى غيرها
فعلا..تانى يوم حبيت غيرها:)