كل النهايات سيئة.. و إلا لما انتهي شيء

لما دخلت البيت امبارح، سمعت صوت بوسي، ففرحت.. نزلت علي ركبي و طبطبت عليها و انا مبسوط.. أم العيال كانت بتصيع بره البيت مدة 6 ايام بحالهم، عمتي قالت انها اكيد ماتت.. و مادام هي بتنونو في وشي كده، يبقي اكيد ما ماتتش
بس صوت عمتي جه من جوا و هي بتنادي اسمي بتون انا عارفه كويس
الخبر جه بعدها طوالي: نوجا ماتت
انحشرت في محاولاتها المستميتة للخروج من الفرن ف ما بين بابه و جسم البوتاجاز.. قعدت تنونو في يأس، محدش رد
مكانش ف البيت غير ابن عمتي، اللي افتكرها بتنونو كعادتها، علشان تخرج أو علشان تاكل
ماتت
ماتت وحيدة زي ما كل مخلوق في البيت ده بيموت
الموت ببطء.. الموت من غير ماحد ياخد باله
قبل ما اخرج كانت بتجري هنا و هناك زي شارلي شابلن.. سعرها الرمادي المنفوش و عينيها الزرقا.. جسمها اللي كان بدأ يتختخ من خمس وجبات لبن يوميا
كل ده عدي قدام عيني، و انا بشوفها ملفوفة في كيس بلاستيك، و محطوطة جنب الباب الوراني بتاع الجنينة
و زي كل مرة، خدت الكيس و طلعت بالفاس، عملت حفرة صغيرة و بعد ثانية، كان الجسم اللاهي بتاع كام ساعة عدوا مدفون تحت التراب و الطين
مؤلم انك تبص ف عينين القطط بعد ما تموت.. البريق الزجاجي و البق المفتوح
وقفت قدام القبر الصغير و زي عادتي--كل ما ادفن قط--قريت الفاتحة
مش عارف أن كان ده صح و لا لأ--و ياريت محدش يقولي بنبرة حكمة ايه الصح--لكني كنت دايما بحس ان القطط دي روح، و الروح تجوز عليها الرحمة.. تجوز عليها اننا نودعها بمحبة، و بدعاء
كانت ليلة طويلة
بس اللي هونها، كلمة بيقولها المصريين دايما
"ما تعزش علي اللي خلقها"