الشنب الموف

مفيش حد ممكن يفهم عادات الكُتاب الغريبة في مسألة الكتابة
يعني مين بيحب يكتب بقلم اسود بس، و مين بيحب ساعة ايه ف النهار أو بالليل، و مين بيفرق معاهم المود و الحالة المزاجية--أنا فاكر إن صديقي العزيز مصطفي ذكري (هراء متاهة قوطية--الخوف يأكل الروح) قالي أنه لازم يكتب و هو رايق ع الاخر.. و انه "نمكي" بشكل يغيظ.. يعني لو شطب شطبة في الورقة ممكن يعيدها من تاني.. أنا عن نفسي ما بتفرقش معايا، بديها شخبطة و خبط و زمر و بحول ورقتي لعشة فراخ من غير ما اهتم. الحاجة الحقيقية ساعتها هي اللحظة اللي انت بتكتب فيها. مفيش حد ضامن إن كانت ح ترجع و لا لأ. و لما ابص ورايا و احاول ما اندهش، لكمية الكتب و السيناريوهات اللي كتبتها، فعلا ما بفهمش غير حاجة واحدة: اني بسيب نفسي أكتب ، و زي ما تيجي تيجي.. تداعي حر يعني
هيمنجواي قال مرة نصيحة ذهبية : ادخر بعض العصارة للغد



هي نصيحة مهمة من كاتب مهم و كبير، بس للأسف أنا مش بطبقها بشكل فعلي.. يعني سبب توقفي ما بيكونش الحكمة و بعد النظر.. مجرد التعب. أما أغرب عادة شفتها ف حياتي، فهي ما يروي عن كاتب عملاق زي جراهام جرين. قريت أنه--و ده مش هزار--كان بيعد الكلام
ايوة.. مغلطتش ف القراية
كان بيعد الكلام، و أول ما يوصل للكلمة 300 يطبق الورق و يشوف هو وراه ايه.. يعني وقف عن لفظ "إن".."لكن".. أو حتي "و".. برضه كان بيقف، و بيكمل ف اليوم اللي بعديه




شيء مُلك.. علي العموم خيري شلبي مثلا كان بيفضل لوقت طويل أنه يكتب ف المدافن، لأن ده بيهيأله "الصفاء النفسي"..و فيه كمان اسلوب الكتابة المقنن شوية عن غرابة جرين، زي مثلا نجيب محفوظ، اللي كان بيعامل الكتابة بكل احترام، و بيخصصلها وقت في جدول حياته محسوب بالدقيقة و الثانية



علي العموم طبعا الناس فيما يكتبون مذاهب، و في كيفية الكتابة فرق، أنا شخصياً مش بوهيمي و لا كاتب التزامي دقيق.. يعني الكتابة بالنسبة لي مش مسألة "نظام"، قد ما هي "اصرار".. و أنا فاكر أن الحظ اسعدني مرة برؤية رائعة كارلوس سورا "تانجو"، و كان المشهد فيه البطل الرئيسي، ماشي في وسط ديكورات مسرحه الميلنة مرايات لوحده.. و بعدين راح هامس لنفسه
"الموهبة هي العمل المستمر"
و بعدين وقف و سأل نفسه
"يا تري مين اللي قال العبارة دي؟"
(اللي قالها هو تشيكوف)
و بعدين بيكمل مشي و هو بيهمس تاني
"اكيد زعيم نقابة عمالية"