designed by: M. Aladdin & H. Fathy

Saturday, May 14, 2005

بالأمس حلمت بك

حلم غريب جداً
علشان كده أول ما صحيت قلت ادخل و اكتبه هنا
انا رايح لبيت والدتي--و انا مابرحش هناك إلا نادرا--بطلع فوق، والدتي تقابلني، و تقولي أنها كانت عايزة تشوفني قبل ما يحصلها حاجة، أنها دي راجعة إلى جدتي، اللي راقدة في الصالة و حواليها العيلة كلها--غريب أني اشوف جدتي و والدتي مع بعض--جريت عليها و بوستها، باستني هي كمان و هي بتقول انها بتحبني .. و عيطنا أحنا الأتنين.. بعد كده مش عارف حصل أيه، و شفتها قدمي، قاعدة، وشها ابيض زي عادته و متفجر بالحيوية، كانت قاعدة بتخيط، بتقص القماش بالمقص و بتخيط فيه.. كان شكلها تمام جدا.. لا ضعف.. لا وهن.. لا موت
دخلت تنام و كنت خايف عليها أنها يحصلها حاجة و هي نايمة
فقت من النوم مذعور، و بعدين طمنت نفسي أنه حلم، و بعدين عضيت علي شفتي
جدتي توفت في ليلة 27 رمضان--21 نوفمبر 2003

9 comments:

Anonymous said...

انا متهيألى إنك ما تستهونش بالحلم ده انا اعرف والله أعلم ان لما حد يشوف ميت فى الحلم بتبقى رؤية ويمكن هى عايزة توصلك رسالة من الافضل انك تروح تسال شيخ بيفهم يفسرلك الرؤية دىو بالمرة عايزاك تقوللى ازاى نجيب الروايات بتاعتك لانى عايزة اقراها اوى
وشكرا

Muhammad Aladdin said...

شكرا يا فيوليت
ممكن تجيبي مجموعة القصص القصيرة بتاعتب "الضفة الأخري" من أي منفذ لتوزيع الأخبار، أو هيئة قصور الثقافة، في لمعرض الجاي إن شاء الله

فيه رواية ح تصدر قريبة إن شاء الله، و لما يحصل ح انشر هنا
:)

شكرا جزيلا علي مرورك


علاء

Anonymous said...

ولا يهمك انا بصراحة كنت هموت واكلم حد من كتاب مجانين علشان اسال ليييييييه بطلتوا تكتبوا فيها وليه توقفت السلسلة عن الصدور احنا اساسا انا و اصحابى كان هيجيلنا تخلف عقلى من كتر ما احنا بنحبها وزعلنا جدا ده احنا حافظين كل الاعداد وكان نفسنا فى زيادة

AZ said...

ماهم بطلوا عشان البنات الحلوين اللى زيك مايجيلهمش تخلف عقلى هىهىهىهى

لامؤاخذه يا اخمحمد القافيه تحكم :)

AZ said...

بس ايه ده مكنتش اعرف انك كاتب محترف
يعنى اقول لصحابى بقى وبتاع انى اعرف حد مشهور نياهاهاها

Muhammad Aladdin said...

معلهش يا آز.. بس أنا محمد مش "اخحمد"يالا خير
:)

فيوليت
يعني.. كل حاجة و ليها نهاية، و دي فترة انتهت بكل جمالها
تحياتي و متشكر علي اهتمامك و كلامك الرقيق

علاء

نعناعة said...

لا غريب ولا حاجة أنت مفتقد وجودها جنبك و يمكن لسة ما اتعودتش علي غيابها
لو كانت مسافرة كنت قلتلك ربنا يقرب البعيد .. ربنا يرحمها ويهدي بالك

نعناعة said...

لا غريب ولا حاجة أنت مفتقد وجودها جنبك و يمكن لسة ما اتعودتش علي غيابها
لو كانت مسافرة كنت قلتلك ربنا يقرب البعيد .. ربنا يرحمها ويهدي بالك

Muhammad Aladdin said...

ربنا يخلي نصايحتك و دعواتك يا حاجة
:)

بس بجد متشكر

علاء