حذاء راندا الجميل

الساعة 8 و تلت النهاردة الصبح.. اصحي من النوم، الحمام، مج الشاي و ساندويتشين و سيجارة. افتح الكومبيوتر و اقعد قدام رواية راندا--خريطة الوطن، كتبت عنها قبل كده هنا--فضلت قاعد لغاية الساعة تمانية و نص بليل

فعلا.. مش هزار

شربت بس تلات مجات شاي، و عشرين سيجارة، و اربع ساندويتشات، و جعت فانتزعت نفسي بالعافية علشان اعمل اسباجيتي

الرواية 328 صفحة.. كنت قريت منها 60 صفحة من حوالي اسبوع أو اكتر.. و بعدين اتشغلت بكتب ورايا لازم اخلصها، و لما خلصت، كنت مستعد أني اقرا الباقي

بس ما تخيلتش اني ممكن اخلصها، و خصوصا أني بقراها علي الكومبيوتر

لكن راندا عملتها.. و شدتني من قفايا

رواية جميلة و كبيرة و عظيمة تحت أي مقياس.. اسلوب راندا اعتمد علي تكنيك الشخص الأول--بمعني انها تقول: رأيت من يقترب من بعيد، عبرت الردهة-- و كمان اعتمدت في فصل رائع( و يعتبر مثال حقيقي علي حرفية تضمين القصص القصيرة داخل نسيج الرواية) علي تكنيك الشخص الثالث و تفريعاته-- بمعني انها تقول: رأت من يقترب، عبرت هي الردهة--اسلوب غير مترهل اطلاقا، حافل بالسخرية و الكوميديا السودا، و العين الذكية اللي بتلتقط اصغر الأشياء، ده غير لغة رفيعة بشكل محبط، لغة تحس أن صاحبتها بترسمها و تشكلها زي ما هي عايزة بالظبط.. الرواية بتاخدك من مستفي ف بوسطن لمدينة الكويت و حي الجابرية، للأسكندرية و الشاطبي و المعمورة، للأراضي المحتلة و قرية جنين، للعراق و القري اللي اختفت بعد تحرير الكويت، مرورا بالأردن، انتهاء بتسكاس.. عالم غني و ساحر بتتردد فيه اصداء الحرب اللي صنعت مصاير الشخصيات الأساسية في الرواية: عائلة البنت الصغيرة

هي كانت بتحلم بأبن ما يشكلش مصيره الحروب.. يا رب يكون ده حصل يا راندا.. يا رب. و في حتة تانية من الرواية، بتشكي ازاي هما--العيلة--مكتوب عليهم أنهم يجروا حافيين بين البلاد، لغاية ما الأرض تصنع لهم احذية من الطين و الأعشاب، و ساعتها، و ساعتها بس، ح يكون ليهم فعلا وطن

حذاء راندا الحقيقي هو الكتابة.. الكتابة هي وطن راندا الدافي، و ياريت راندا ما تنفيش نفسها من وطنها، وطنها الحقيقي اللي بيحضنها كل يوم زي الأم الحنون.. ممكن تكون أم قاسية ف احيان كتير.. بس هي بتفضل أم مثالية

الأنسان مش بيختار وطنه، و مش بيختار أمه، لكن راندا، براويتها الأولي المذهلة، قدرت انها تختار

راندا: بحبك جدا يا سندريلا

علاء

ملحوظة صغيرة ما بيني و بينها: يا تري الرواية وصلت لفخر الدين و لا لأ؟

:)