designed by: M. Aladdin & H. Fathy

Wednesday, May 04, 2005

سهر الليالي

امبارح قعدت مع حاتم بوكره في مدينة نصر لمدة 15 ساعة متواصلة تقريبا.. كلام كتير.. أكل و شرب.. و سهر ليل طويل و قصير في دردشة فاضية و سكوت مليان
ليه السكوت مليان؟ لأننا غالباً كنا بنسكت و احنا بنتفرج علي تلات افلام في نفس الليلة، بدأنا بـ"جوست وورلد".. كنت مبهور بالكوميكس لما قريته من حوالي سنة، و حبيت الفيلم جداً كمان.. و ما يضرش لو اعربت عن اعجابي الدايم ب "تورا بيش"--من أيام امريكان بيوتي-- و طبعا "سكارليت جوهنسن"، و في الفيلم ده كان عندها 16 سنة بس.. عارف انا كده ابقي ايه! اخرسوا! :)





الفيلم التاني كان "أميلي" طبعا! و طبعاً لأن الفيلم ده فيه كمية صدق أنا مش فاهمها لغاية دلوقت.. اللي كتبه كأنه شايفني.. و شايفك.. و شايفها.. يعني كتير جداً من الأفكار اللي ف الفيلم ده كانت جوايا.. خصوصاً مسألة "كام واحد عنده اورجازم ف اللحظة دي؟" مثلاً
:)
أميلي بيجسد مشكلتنا كسيناريستات عايزة تعمل حاجة مختلفة، يعني حتي الحتة اللي فيها بتكشف علي كائنات خيالية أنا مش ح اخاطر مثلاً و اكتبها ف سيناريو ليا.. لأني عارف أن التنفيذ ح يكون وحش
أميلي تقريباً هو إنجيل المتوحدين اللي أنا بعتبر نفسي منهم



الفيلم التالت جه في الآخر خالص.. بعد اطباق الفول و الجبنة و الحلاوة و كمان البيض (تحية كبيرة للحاجة أم حاتم و ربنا يخليها يا رب) شربنا الشاي و كنت أنا بقي بقول يالال حسن الختام.. الساعة كانت سبعة تقريباً الصبح. قلت لحاتم لما شغل الفيلم أن الواحد يتفرج علي أوله و يبقي يكمله بعدين. قالي ليه يعني؟ ما نشوفه دلوقت..عادي يعني. و رغم التعب و قلة النوم، الفيلم ده عرف يشدني فعلا
كلوزر



كل الممثلين فيه كانوا ممتازين.. الكاستينج كان هايل، و اكتشفت منه ممثل جميل اسمه كليف أوين. السيناريو متاخد عن مسرحية، و ده طبعاً كان ظاهر في الحوار و طول المشاهد. الطريف أن اللي كتب السيناريو هو اللي كتب المسرحية، و قدر كمان انه يلعب ف شغله و يغير النهاية. تجربة طريفة فعلا
شفت نفسي في شخصية كليف.. مش بالمازوخية اللي هي فيه ساعات كتير، بس فيه شبه ما.. و يمكن كمان في طريقة غضب شخصية جود لو.. بس مش متخيل نفسي بضعفه، أو حتي في مكان الخاين... شخصية نتالي حاجة جميلة و عميقة بشكل كبير.. و في المقابل كانت شخصية جوليا محيرة و مربكة.. يعني مثال للشخصية اللي تكرهها و تتعاطف معاها ف نفس الوقت.. يمكن تقيلة تكرهها؟ طيب.. تتضايق منها
كان يوم حلو ، و سهرة جميلة.. متشكرين يا تيمو
:)

6 comments:

amrali2000 said...

انا شفت closer بس من دول وفعلا هوه فيلم حلو
على فكره انا عندى افلام كتير ومشترك فى منتدى اسمه http://www.dvd4arab.com
فى اقسام كتير منها قسم التبادل وانا ليا موضوع متثبت هناك لتبادل الافلام
لو عاوز اى فيلم انا موجود
بس ايه رايك فى موضوع الملكيه الفكريه وحقوق المؤلف بما انك كاتب
انا دارس حقوق مش محامى انا مصمم مواقع بس دارس حقوق وفاهم يعنى ايه حق المؤلف بس عاوز رايك فى الموضوع وبالتحديد فى مسالة الافلام الاجنبيه
وشكرا

Muhammad Aladdin said...

مشتكر جداً يا عمور علي كرمك
و بالنسبة لموضوع الحقوق، اكيد انت عارف القانون زيي، بس انا ليا وجهة نظر ما: احنا اتنهبنا كتير.. كتير جدا.. و بعدين احنا فعلاً فقرا.. مش مشكلة لما نشوف فيلم و لا اتنين.. ما هم سرقونا كتير يا عمور
جت علي دي يعني؟
:)

علاء

amrali2000 said...

طب والاغانى العربيه مش هينطبق عليها اللى انت بتقوله
بس انا شايف ان اللى حرام فعلا انى ادفع فلوس فى اغنيه او فيلم لانهم فى ذاتهم من الناحيه الدينيه حرام
وبالنسه لعرضى انا مش بعزم عزومة مراكبيه انا ايميلى amrali2000@hotmail.com
ضيفنى ماسينجر او ابعتلى ميل
فى انتظارك

amrali2000 said...

طب والاغانى العربيه مش هينطبق عليها اللى انت بتقوله
بس انا شايف ان اللى حرام فعلا انى ادفع فلوس فى اغنيه او فيلم لانهم فى ذاتهم من الناحيه الدينيه حرام
وبالنسه لعرضى انا مش بعزم عزومة مراكبيه انا ايميلى amrali2000@hotmail.com
ضيفنى ماسينجر او ابعتلى ميل
فى انتظارك

Muhammad Aladdin said...

مش عارف افتي بصراحة من الناحية الدينية.. بس رأيي عكس رأيك تماماً
و تأكد يا سيدي أن وقت ما احتاج أي فيلم ح ابعتلك علي طول

علاء

amrali2000 said...

انا مقصدش افتى بس اكيداغلب الافلام والاغانى بالذات للى زى روبى وهيفا حرام
والله اعلم
وانا اتمنى نتكلم عالماسينجر لو كنت بتحب تستعمله اساسا
وافلامى تحت امرك فى اى وقت