designed by: M. Aladdin & H. Fathy

Saturday, April 23, 2005

لابد من خيانة

النهاردة فرح اخت واحد صاحبي
مش ح اعرف اخلع
مابحبش اروح افراااااااااااااااااااااااااااااااااااااااااااااااااااااااااااااااااح
بس لازم اروح.. ما رحتش كتب الكتاب و دي الدخلة. طيب. امري لله. لبست البدلة اللي مابحبش البسها كتير، بدلة سودا العايدي بيقولي اني بابقي مافيوزو صغير--قصير الأدق--فيها. القميص الأبيض (أوف: الكوي!)، و الكرافات الارجوانيأم نقط صفرا صغيرة جداً. حلقت دقني (أوف تاني!)
حضرت الفرح، و استحملت كل الضرب و الزمر و الضحك و "صقفوووووووووووووووولووووووووووووووووه" و اللذي منه. شربت البيبسي و كلت الجاتوه و سلمت علي صاحبي و مشيت. الحسنة الوحيدة ان العروسة و العريس حلوين فعلاً. بجد و الله شكلهم لايق عريس و عروسة. مش عارف ليه كل ما اشوف عروسة أو عريس اليومين دول بلاقي واحد فيهم ضاربه السلك، و او حد ضربه ببلطة و هو صغير.. أو هما الأتنين من الاخرعاهات و تبقي عائلة آدامز جديدة
الحمد لله البنات ف الفرح ماكانوش حلوين.. يعني ما اجهدتش نفسي في اني اخمن: دي قريبة مين؟ دي يا تري مرتبطة و لا لأ؟ أنت عارف: كل التساؤلات اللي ملهاش اي فايدة، و اللي انت بس بتسألها من قبيل الفضول الغتيت.. الحمد لله كانت كل التساؤلات من باب: ليه الضب ده طيب؟ أو مين وقع عليكي البلكونة؟ أو تمساح اهبل مين اللي تف ف خلقتك؟ و طبعا كل دي تساؤلات لطيفة زي ما انتوا شايفين
بس الاقدار كانت ليها حكمة تانية
( أورشاليم يا اورشاليم)
ماشي مروح ف امان الله من جنب الجامعة الأمريكية ف سكتي المعتادة جدا للبيت.. تقولش يا حبيبي بقم بيوزعوا البنات الحلوة علي البطايق الشخصية؟ كانت حفلة عمرو دياب و رميت الورد طفيت الشمع يا حبيبي
مشيت بهدوء.. لمحت كل بنت ممكن المحها برصانة--اكره شيء عندي ف الدنيا ان بنت تقفشني و انا ببصلها.. و يا سلام لو كانت ف عينيها نظرة فوكسي زي "أخص عليك يا ميدو".. أنا ممكن جدا احط راسي في اقرب مدفع-- و فيه كام بنت برضه بصوا علي الواد القصير أبو بدله و وش خشب اللي ماشي جنبهم و عامل نفسه مش واخد باله
شفت جماعة اصحابي في عربية، كان المرور بطئ جدا رغم اننا الساعة 12 و نص بليل--من الزحمة طبعا، واحد منهم سألني "الله! أنت كنت جوا؟" ضحكت و شاروتله لأ.. عديت الشارع من قدامه و هو بيبص علي صاروخ حريمي بيعدي و بيقول "يا لهوي!!". ابتسمت و انا ببص علي المشهد، و البياع بيناولني علبة سجاير و ضحكة عريضة متعلقة ف عينيه

2 comments:

semsem said...

enta lessa bta3 banat?!:)

Muhammad Aladdin said...

HAHAHAHAHAHAHAH!
wallahy el nas wa7'da 3any fekra 3'alat khales!

:P

Al