designed by: M. Aladdin & H. Fathy

Wednesday, April 13, 2005

الجنيه الخامس

لسه جاي حالاً من أول عرض عام لفيلم صحابي الاتنين "محمد حماد" و "أحمد خالد".. الفيلم روائي قصير، أول تجربة أخراج لأحمد خالد--لو محسبناش فيلم اولاني كليب آرت-- و أول تجربة برضه لحماد في السيناريو--لو محسبناش فيلم اشترك في كتابته مع اتنين كمان اصحابنا
الفيلم اسمه : الجنيه الخامس
الفيلم اتعرض في المركز الثقافي الروسي.. كنت مبسوط جداً اني أخيراً بشوف الفيلم ده.. أولاً لأنه فيلم لأتنين اصحاب
اعزاء، كافحوا لغاية ما نفذوه--هو من انتاجهم هما الاتنين، و ثانياً لأن الفيلم ده واجهته عقبات متخلفة: المركز الثقافي الفرنسي و مركز الساقية الثقافي رفضوا يعرضوه.. المركز الفرنساوي لأنه استشعر حرج من موضوع الحجاب (قصة الفيلم عن اتنين شباب بيمارسوا سوفت كور في كراسي الاتوبيس الخلفية الفاضية--خدمة السي تي آيه المميزة هنا في مصر: و البطلة محجبة زي اغلبية البنات المصريين دلوقت) و الساقية قالوا باختصار : الفيلم ده حرام
ببساطة كده
يعني المسألة مسألة رعب.. أي حد عايز يناقش أي حاجة بجرأة هيكون فاسق و قليل الحيا.. النوعية دي من التفكير بتعكس ان لسه فيه منا اللي بيفكر بحاجات تانية غير دماغه.. و أن الجنس كمعادل موضوعي بيكشف علاقات معقدة جداً في الحياة عامة و المجتمع اللي طالع منه الابداع ده خاصة ما بيعنيش ليهم حاجة غير الممارسة ذاتها.. الحمد لله أن عقليات زي دي ما نقدتش رواية الطيب صالح العمدة : موسم الهجرة إلي الشمال.. لأن مصطفي سعيد مش ح يكون في نظرهم غير بني آدم منحرف مستثار بيضايق الاوروبية الجميلة
برضه ببساطة كده
علشان كده كنت فرحان جداً اني بشوف الفيلم ده اخيراً بمبادرة جميلة من "شريف جاد" مدير المركز.. الراجل ده
اتعرفت عليه من زماااااااان في مهرجان سينما الطفل لما كنت عضو لجنة تحكيم.. كان الكلام ده من سنين طويلة بس فعلا الراجل قدر يحافظ علي احترامي --و احترام الناس--ليه بصدق بقي نادر انه يتكرر
زي ما انتوا عارفين.. الحياة بتغير
و برضه كان رائع أن محمود حميدة يكون حاضر للعرض.. بني آدم جميل و فنان حقيقي قدر انه يتجاوز مرحلة ف حياته اتسمت بأفلام المقاولات منخفضة المستوي علشان يقدم سينما جميلة.. سينما بجد .. ده غير انه كان الناشر لأقوي مجلة سينمائية في رأيي و هي الفن السابع
(و هو من اكتر السينمائيين اللي اتعاملت معاهم احتراماً و أمانة..حصل ان كان فيه كلام ما عن سيناريو ليا.. و رغم ان المشروع مامشيش "لأن الفيلم ناقصه حاجة كده" علي حد تعبير حميدة، بس انا فعلا اتذكرله أنه الوحيد--فعلاً-- اللي اداني ميعاد و رد عليا فيه ")
و كان جميل منه انه يشيد باصحابي.. حسيت و انا بصقف انه فعلا اكنه بيهنيني انا.. كأنه بيهني كل مجموعة الاصحاب اللي دماغهم بايظة اللي بيتقابلوا ساعات علي قهوة منه فيه و في اماكن تانية
وارد ان يبقي فيه جوا كل مجموعة جروبات صغيرة بتستريح لبعض اكتر.. بس بيفضل نجاح حماد و احمد شيء مشرف لينا كلنا
طبعاً انا مش بقول ان الفيلم من كتابة "ارسطو" و اخراج "دافنشي".. اكيد فيه ملاحظات كتير-- علي الاقل عندي أنا شخصياً-- علي الفيلم، لكن لازم نفتكر أن ده الفيلم الاول.. التجربة الأولي البكر الجميلة
أنا بشكر حماد و احمد من هنا علشان حاجات كتير.. بس اهمها انهم اثبتوا فعلاً أن البني آدم لو حط ف دماغه حاجة، و تعب علشانها بجد.. مهما كان التمن أو التضحيات.. أكيد أكيد ح ينولها

5 comments:

Mohammed said...

ازيك يا علاء
لون وولف كتب عن الفيلم و في نفس الموضوع كتب فعلا عن موسم الهجرة و سحبها من التدريس

http://stillalonewolf.blogspot.com/2005/04/blog-post.html

Muhammad Aladdin said...

شفت الموضوع قبل كده يا محمد، بس انا كنت بقصد بشكل أعم استقبال الفيلم في مؤسسات المفروض أنها مستقلة--الساقية ، ممكن مالومش المركز الفرنسي كتير لأنه مكان مهما أن كان ديبلوماسي و متقيد بأولويات معينة، بس الساقية المفروض أن هدفها الاساسي الفكر و الثقافة، و ده بعيد عن مؤسسات التعليم اللي ممكن نتفق مع سياستها أو نختلف، بس يفضل من حقها أنها تختار اللي هي عايزاه--مع احتفاظنا بحقنا ف الاعتراض طبعا

تحياتي

Anonymous said...

Looking for information and found it at this great site... Canon camcorders infrared system

Anonymous said...

Wonderful and informative web site. I used information from that site its great. http://www.volkswagenbodytuning.info/truck-running-board-step-treads.html http://www.faucets-delta.info/Nexium.html Mazda miata emission control culinary schools in pennsylvania data recovery tutorials 99 jeep engine compressions Vacuum cleaner cyclone Samsung ml 1710 toner cartridge web development Bargain rent a car los angeles luxury www maternity clothes com Nexium hair Bmw m3 csl

يوسف عطا said...

قصة فكرتنى بنفسى من 7أو8سنين
هههههههه


ممكن حد يرفع الفيلم على موقع شير

يا جماعة إنتو عاملين الفيلم علشان محدش يشوفه ؟؟
قعدتوا تدوروا على مكان يوافق على عرضه ونتوا ممكن تعرضوه على النت بكل بساطة ؟؟؟
أنا فى إنتظار موقع لتحميل الفيلم منه

ياريت حد يرد عليا
youssef_ata@maktoob.com