منك لله يا عمر يا خويا

امبارح شغلت 159 مقطوعة ادهالي عمر من مكتبته الموسيقية بقلب كريم و عامر و مفعم بالحاجات الانسانية الرفيعة. بجد منه لله لأنه خلي الملايكة تقعد في اوضتي.. خلي الزرع ينبت من اسمنت الحيطان.. 159 مقطوعة موسيقية صوفية فارسية و تركية خدوني من نفسي و من الزهق و من القرف اللي البني آدم بيعيشه كل يوم لمكان تاني بعيد جداً جداً.. جوا قلب كل واحد فينا.. بس الجزء ده بيدفن من كتر التراب اللي بيتحط عليه، و ساعات بنقتله احنا بضمير بارد علشان نستحمل نعيش من غير ما نتجنن.. و ساعات كتير كمان هو بيستعبط و بيعمل نفسه مش موجود و خلاص
كان مع المقطوعات ام بي ثري صغير لكولن بارتس، و هو بيقرا من شعر مولانا جلال الدين الرومي بالانجليزي

مولانا جلال الدين الرومي اللي قال مرة : " الطرق إلي الله بعدد البشر".. و اللي قال في يوم من الايام "إن كان صنم الحجر ثعبان.. فصنم الفكر تنين"..و من المزيكا لمولانا جلال، و من مولانا جلال لمولانا محيي الدين أبن عربي--و علي فكرة محيي الدين ده لقبه-- اللي قال مرة في تفسير كلمة "الله أكبر": "ليس المقصود بأن الله أكبر أنه أكبر من غيره.. لأنه لا يوجد غيره.. المقصود أنه أكبر من أن يدركه غيره".. الله عليك يا مولانا

و علي فكرة ، ابن عربي من اكتر الناس اللي عليهم تضارب في الاراء في التاريخ الاسلامي كله--يمكن اكتر بكتير من ابو نواس كمان-- فالأمام السيوطي كتب كتاب في فضايله، بينما كان فيه ناس تانيين بينعتوه بالكفر

هيييه.. دنيا

و قبل ما نفتكر كمان عمر الخيام، و ادوش دماغكم زيادة و زيادة، يهمني اقول لعمر--صاحبي المرة دي، و الشاعر كمان--منك لله يا اخي ... منك لله

:)