... اتاري قلبي حبك موت

"حاولت".. عمرو دياب لما كان بيعمل حاجة ليها معنى، مش مهم عظيمة ولا ساذجة، بس حاجة، حاجة تعرف تسمعها، وتتكلم معاها كمان.

"حاولت" فيها حاجة مش عارف هي ايه، حاجة مهما بعدت عنها بتلعب في قلبي، يمكن آخر مزيكات عمرو الشيك اوي والصادقة اوي في وقت واحد، يمكن تكون فيها ريحة القديم، الستينات، منطقة الزمن اللي قفشت منطقة مزيكا في مصر ليها طعم تاني..

"حاولت كتير.. لكن قلبي بكى مني.. وجنني".. كل ما بسمع الجملة دي، جملة الكلمات وجملة اللحن، بحس بشئ أجمل من أني احطه في جملين تانيين..

الاغنية من ألبوم راجعين، سنة 95، الالبوم اللي طحنه فيه فؤاد بأغنية ح اودعك لو الذاكرة لسه بخير. حد فينا كان بيتهيأله وهو بيتريق على "راجعين إن شاء الله" أن ده يمكن يكون اخر البوم لعمرو فيه الحاجات اللي بجد؟!

يمكن المسألة، أو اكيد فيه في المسألة، نوستالجيا.. أكيد، نوستالجيا لعمرو دياب بتاع بتقولي نرجع للمكتوب، وحبك ده شيء اتولد جوايا من صغري (عرفتي مين حبك)، ويا عمرنا، ومالهاش حل تاني، وعن حبك مش ح نتوب، وشوقنا، وماتخافيش، وما بلاش نتكلم ف الماضي، وبلاش تكلمها، واحلف بالليالي، وصدقتني، وراحل، وحكايتنا، ولا الليالي تهون، ولما كان، وح اتمرد، ورصيف نمرة خمسة، وذكريات، وحبيبي، وويلوموني، وكان عندك حق، وضحكة عيون حبيبي، وغلاوتك، ونفس المكان.. وطبعا: وايه يعني؟!...

عمرو، الشاب الرفيع، ابو شعر طويل من ورا. عمرو، الشاب اللي تتبضن منه زي ما بتتبضن من نفسك، الشاب اللي بيحاول وبيبرم وبيلعب ميلودراما فتقوله ليه كده يا عم؟! عمرو بتاع البنات العسل فوق كوبري ابو العلا، بتاع كوز الجيلاتي في مناخيره..

عمرو الشاب اللي بيحاول يستروش، مش عمرو الروش بتاع الليلة ديه..

يمكن ورا "حاولت"، ورا "حاولت" بالظبط، عمري اللي فات، النواصي وكورنيش اسكندرية والجينزات الـ"لي" و "الريفل" والقصة الانجليزي، البنات اللي اتهيألي اني بحبها والبنات اللي اتهيألهم انهم بيحبوني، الهبل والعباطة والقناة التالتة لما كانت بتفتح الساعة خمسة. عمري، عمري انا، عمري اللي يمكن يكون ضاع مني ويمكن لأ، والشيء اللي يلفت اني مش عارف.

غالبا انتوا عندكوا ألبوم "راجعين"، بس من باب الحرص، ممكن تضغط هنا.

......

وبعيد عن وجع القلب ده، وبما أني كائن سو، ممكن اوريكوا اللي اتكتب عن عمرو في الويكي العربي:

"تعاون الهضبة مع مجموعة من الشعراء والملحنين منهم:

الكابو حميد الشاعري أكثر موزع تعامل معه الهضبة منذ البوم خالصين حتى نور العين ونتمنى رجوع التعاون من جديد بين العملاقين."

واللي مش مصدق يبص هنا.

:)