designed by: M. Aladdin & H. Fathy

Sunday, July 27, 2008

.. جو مات يا خلف


يوسف شاهين

(25 يناير 1926- 27 يوليو 2008)

مشي اللي قلب كل الممثلين تهتوته وقلب كل المتفرجين عبط قدام سلسلة الاسكندريات.

مشي الجدع اللي ماكانش بيتكسف يقول انه له ف الخشن، ومكنش برضه يتكسف يشتم أي حد، بما في ذلك النظام، مع انه المفروض يهاود شويتين.

مشي اللي خد كل حاجة من اسكندرية من اول ريحة الكورنيش للشخرة الموسيقية، والوحيد اللي طلع فريد الاطرش بطبيعته غتت فنجح الفيلم، مشي اللي حب هند رستم فطلعها من غير برا في نفس الفيلم وخلاها بطلة احلامه الخيالية في باب الحديد..

مشي إله الدراويش ابو ليفة بيضا فوق دماغه، بتاع الأرض واسكندرية ليه وباب الحديد والاختيار. اللي

نيازي مصطفي بجلاله قدره قال عليه استاذه، وسامي السلاموني- بجلالة قدره برضه- كان من مريديه.

مشي الجدع اللي الواحد ممكن يشتمه اوي زي ما بيحبه اوي.. يشتمه بانفتاح يعني زي ما بيقدره.. وربنا يسامحه بقى.. طلق خالد يوسف علينا.. بس معلهش..

ربنا يرحمك يا جو.. ويرحم الملايكه من لسانك.

......................................

البلوج محجوب تلات ايام.

3 comments:

Anonymous said...

ان شاء الله ربنا يحشرك معاه

khalil said...

وانا كمان يا علاء
اوعى تنسى تنده عليا لما تتحشر معاه
هههههههه
مش عارف اكتب الموسيقى الجميله اللى كان بيعملها بمناخيره

Water Damage Restoration Detroit said...

Greatt reading your blog