designed by: M. Aladdin & H. Fathy

Thursday, July 10, 2008

باتشان الزمان






مكنتش من محبي لا الأفلام الهندية ولا افلام فان دام وتشارلز برونسون. ولسه مصر اني مكنتش اهبل.

بس لسه فاكر الافلام الهندية، واذاعتها في العيد، وكل القهاوي اللي بتعرضها. فاكر كويس اميتاب وهو شايل التمساح ودبابة بتمشي في ساحة مصارعة رومانية وحد مشدود بالحبال. فاكر انا حتى لما سمير صبري- أي والله سمير صبري- كان بيديله جايزة التكريم في مهرجان اسكندرية السينمائي الدولي وبيقوله فاكر يا راجل افلامك وتشيل التمساح وتشد الطيارة.. الجدع قاله ببساطة وبأدب شديد: أنا اسف..

فاكر ساعة زيارة اميتاب الاولانية للقاهرة الحمى اللي جت للناس وللستات خاصة، الصحفي اللي مش فاكر اسمه اللي كتب في مجلة صباح الخير اياميها ان مراته سابته وصارحت بالحقيقة المرة، انها اتجوزته علشان شبه اميتاب وادي اميتاب الحقيقي وصل اهه..

لسه برضه فاكر سلمان رشدي اللي قال مرة أن اميتاب هو كان ملهمه لشخصية جبريل فاريشتا في الرواية سيئة الذكر ايات شيطانية...

فاكر اميتاب باتشان وطبعا فاكر حمدي باتشان...

وهي دي ايام تتنسي يا راجل؟!

3 comments:

Anonymous said...

الراجل دا كان ممثل لذيذ بجد ومختلف بحسه هندى بس مطور شوية

و صدمتى الوحيدة ف اميتاب باتشان انه مش هو اللى كان بيغنى ف افلامه

طول عمرى بمل م الافلام الهندى وطولها وتكرار القصص لازم امه تتعمى ويتوه منها وابوه يتقتل قدامه ويكبر هو لينتقم

بس بحب اغانيهم اوى وموسيقتهم المميزة
:)

nice topic

Anonymous said...

والله العظيم الافلام الهندى مبقتش زى زمان , شوفوا افلامهم دلوقتى و كم الامكانيات الى عندهم و اد ايه التطور فى الافكار الى بيطرحوها و الاخراج و التصوير و السيناريو و هتقولوا يا حسره عليكى يا مصر
وعلى فكره يا ina nonita
اميتاب باتشان يعتبر هندى دقه قديمه مقارنه بالممثلين الهنود الى فى الساحه دلوقتى

Anonymous said...

ايوة كلامك صح هم اتطوروا ف الافلام والاغانى الفيديو كليب .بس كمان فقدوا كتير من اصالتهم ..بقوا شبه الامريكان اكتر منهم هنود

دا غير الموضة الغبية اللى خلت ستاتهم يقصوا شعرهم !!!! اتفرست منها اوى

,,

اخراج وتصوير وامكانيات ..عندك حق
هو احنا فى زينّا !!وفيها احسن ناس بتشتغل جرافيكس ..بعيدا عن الفن كمان الهند دلوقتى بيروحوا يعملوا فيها عمليات القلب حسب ما سمعت