باتشان الزمان

مكنتش من محبي لا الأفلام الهندية ولا افلام فان دام وتشارلز برونسون. ولسه مصر اني مكنتش اهبل.

بس لسه فاكر الافلام الهندية، واذاعتها في العيد، وكل القهاوي اللي بتعرضها. فاكر كويس اميتاب وهو شايل التمساح ودبابة بتمشي في ساحة مصارعة رومانية وحد مشدود بالحبال. فاكر انا حتى لما سمير صبري- أي والله سمير صبري- كان بيديله جايزة التكريم في مهرجان اسكندرية السينمائي الدولي وبيقوله فاكر يا راجل افلامك وتشيل التمساح وتشد الطيارة.. الجدع قاله ببساطة وبأدب شديد: أنا اسف..

فاكر ساعة زيارة اميتاب الاولانية للقاهرة الحمى اللي جت للناس وللستات خاصة، الصحفي اللي مش فاكر اسمه اللي كتب في مجلة صباح الخير اياميها ان مراته سابته وصارحت بالحقيقة المرة، انها اتجوزته علشان شبه اميتاب وادي اميتاب الحقيقي وصل اهه..

لسه برضه فاكر سلمان رشدي اللي قال مرة أن اميتاب هو كان ملهمه لشخصية جبريل فاريشتا في الرواية سيئة الذكر ايات شيطانية...

فاكر اميتاب باتشان وطبعا فاكر حمدي باتشان...

وهي دي ايام تتنسي يا راجل؟!