..جلد ما بيلمسش غير نفسه

الوحدة مش شيء عجيب، و التوحد مش شيء اسطوري. الوحدة سور كهربا بيلطم اللي بيقرب، و التوحد كفن دافي، حضن أم مليان حنان و عرق. الوحدة سور سجن و خط دفاع، زي ما التوحد اشباح الميتين و جناحات الملايكة. الوحدة بتخليك تتأكد انك انت، و مش حد غيرك، بالظبط زي ما بتخليك بتتكلم و تسمع في نفس الوقت. التوحد روح ترفرف في سما فاضية، بس برضه جلد ما بيلمسش غير نفسه. الوحدة تتعب و تريح، و التوحد يسعد و يحزن.زي ما تكون الوخدة انك تبص في مرايا علي وشك، و التوحد هي صورتك اللي بتشوفها.. الوحدة و التوحد زي الحياة بالظبط: الشيء و عكسه، الأمر و نقيضه. الوحدة و التوحد بيقولولك ايه الحياة، في نفس الوقت اللي بياخدوك بعيد.. بعيد اوي عنها.