..تفاهات زي دي

امبارح كنت بجيب سجاير من كويك اللي جنب البيت. كويك جوا بنزينه، و يمكن البنزينه مكان لطيف اوي لتلاقي البشر المختلفين. لمحت من الباب الأزاز ضهر. يعني، مش مجرد ضهر، يعني ضهر اشقر فوقه فستان سهرة قصير اسود. ضهر طويل بديع، و شعر اصفر، و لما دخلت، و انا يعني زي ما انتم عارفين مش عايز اركز اوي اوي، خدت بالي أن العينين جميلة و زرق، و الملامح ملامح قطة، و تقسيمة الرجلين زي الفرس العربي الاصيل و تحتهم جزمه سودا بكعب عالي
البنت طويلة زي الفنار المنور كده، و انا بائس و قصير و بدقن و شايل كتب بتاع "سئافة" و العياذ بالله. حصل اني اتأخرت في شرا السجاير، لأنه ببساطة كان فيهراجل قصير--بس اطول مني--بيشتري كمية من المشاريب تكفي الحرب العالمية التانية، راجل لابس علي الاستايل الامريكاني، جاكيت بدلة و جينز، و برضه تقريبا لابس شعر ابيض قصير و ملامح مش محددة المعالم. يعني ميه في وسط الميه. بس اللي خلاني اشوفه بجد انه قال للولد اللي بيبيع
"ايوة ايوة.. ماغلبوغو ابيض"
طبعا فهمت أن الاتنين مع بعض، و برضه فهمت أن الجدع متوتر و عايز يخلع من البنزينة باسرع ما يمكن، لأنه فيه اتنين تلاته تانيين اكتشفوا فجأة انهم عايزين يشتروا حاجات، و قعدوا يرموا عينيهم علي الجسم الافروديتي اللي منتصب قدامهم. انا فضلت بارد و بتاع سئافة و حاولت ما ابصش، بس لمحت البنت بتبتسم، طبعا مش ليا ، بس لأنها خدت بالها من التتنيح اللي حاصل
الراجل استعجل علي الحساب و تقريبا الولد مش لاقي فكة كفاية، فطلع ازازه ميه معدنية و قال بتوتر
دي بكام؟""
قلت لنفسي خسارة انه ما قالش كلمة فيها راء
و بعد ما مشي، لاقيت الشاب ابو بدله و تسريحة شعر علي الجنب، و حبه سمار كده بيبص في اتجاههم و بيقولي
"مانيكان"
و لما ماردتش، و انا مديله الوش الخشب، بص للي جنبه، اللي برضه ما يعرفوش، و قال
"مانيكان"
و لما جبت حاجتي، و انتخت في البلكونة، مولع و في ايدي كاس، فكرت اني ما ردتش عليه من باب اني عايز اقنعه، و اقنع نفسي بالمرة، اني ما بيهمنيش التفاهات اللي زي دي