designed by: M. Aladdin & H. Fathy

Saturday, July 14, 2007

..تفاهات زي دي

امبارح كنت بجيب سجاير من كويك اللي جنب البيت. كويك جوا بنزينه، و يمكن البنزينه مكان لطيف اوي لتلاقي البشر المختلفين. لمحت من الباب الأزاز ضهر. يعني، مش مجرد ضهر، يعني ضهر اشقر فوقه فستان سهرة قصير اسود. ضهر طويل بديع، و شعر اصفر، و لما دخلت، و انا يعني زي ما انتم عارفين مش عايز اركز اوي اوي، خدت بالي أن العينين جميلة و زرق، و الملامح ملامح قطة، و تقسيمة الرجلين زي الفرس العربي الاصيل و تحتهم جزمه سودا بكعب عالي
البنت طويلة زي الفنار المنور كده، و انا بائس و قصير و بدقن و شايل كتب بتاع "سئافة" و العياذ بالله. حصل اني اتأخرت في شرا السجاير، لأنه ببساطة كان فيهراجل قصير--بس اطول مني--بيشتري كمية من المشاريب تكفي الحرب العالمية التانية، راجل لابس علي الاستايل الامريكاني، جاكيت بدلة و جينز، و برضه تقريبا لابس شعر ابيض قصير و ملامح مش محددة المعالم. يعني ميه في وسط الميه. بس اللي خلاني اشوفه بجد انه قال للولد اللي بيبيع
"ايوة ايوة.. ماغلبوغو ابيض"
طبعا فهمت أن الاتنين مع بعض، و برضه فهمت أن الجدع متوتر و عايز يخلع من البنزينة باسرع ما يمكن، لأنه فيه اتنين تلاته تانيين اكتشفوا فجأة انهم عايزين يشتروا حاجات، و قعدوا يرموا عينيهم علي الجسم الافروديتي اللي منتصب قدامهم. انا فضلت بارد و بتاع سئافة و حاولت ما ابصش، بس لمحت البنت بتبتسم، طبعا مش ليا ، بس لأنها خدت بالها من التتنيح اللي حاصل
الراجل استعجل علي الحساب و تقريبا الولد مش لاقي فكة كفاية، فطلع ازازه ميه معدنية و قال بتوتر
دي بكام؟""
قلت لنفسي خسارة انه ما قالش كلمة فيها راء
و بعد ما مشي، لاقيت الشاب ابو بدله و تسريحة شعر علي الجنب، و حبه سمار كده بيبص في اتجاههم و بيقولي
"مانيكان"
و لما ماردتش، و انا مديله الوش الخشب، بص للي جنبه، اللي برضه ما يعرفوش، و قال
"مانيكان"
و لما جبت حاجتي، و انتخت في البلكونة، مولع و في ايدي كاس، فكرت اني ما ردتش عليه من باب اني عايز اقنعه، و اقنع نفسي بالمرة، اني ما بيهمنيش التفاهات اللي زي دي

7 comments:

تامر said...

علاء الجميل

يا بختك بالتفاهات اللي بتيجي فطريقك يا عم، يا رب تفضل التفاهات دي تقابل واحد زيي، وأوعدك إني هاترفع عنها ومش هاهتم بيها خالص، بس بشرط
أتأكد الأول من مدى تفاهتها

بس أقدر أأكدلك إن التفاهات ما بتتجاهلناش زي ما احنا بنتجاهلها

إحنا بالنسبة للتفاهات أكتر من مجرد تفاهات

وسلملي على السئافة

Muhammad Aladdin said...

تامر البديع

اكتر من مجرد تفاهات بانهي معني؟
:P :P :P

صباحك فل

رات said...

يا مسئف إنت
:))

yasmeen said...

بردون يا افندى بالزمة ايه بس عيب المصرية ..الدنيا داقت بيك لما متعاكس غير أفرنجية ...افهم و اعقل يا اهبل يا أهبل أيه غيرنا يفرقنا دي المصرية تبيض وشك الأفرانجية عينها لقرشك يا جدع أنت


مع الأعتذار للشيخ سيد درويش

Muhammad Aladdin said...

راتي
وحشتيني جدا جدا جدا
:)

ياسمين
طب يعني فين المصري الفاخر يعني؟! مش فاهم انا!
:P

Anonymous said...

you know what, i think the feeling of superiority that we "arabs" give & create to those westerns is the point where we should feel sorry for them.. cause once they are respected due to their skin.. they cannot go back to what they were.. it even becomes harder to go back to their countries -where they worth almost nothing- .. if everyone acted like you did, this phenomena might come to an end.. maybe this idiot was pissed as you didnt give him the look of (here is my God shopping next to me) .. well done buddy..

Muhammad Aladdin said...

heh! it wasn't that code between Eastern and Western, it was, in my simple feeling, the matter of a guy who doesn't want to be into the circle of "hey yo pretty! let's bang!!". I do not know if it shyness or narcissism, maybe either of them.
Anyhow, thanks for your words.
:)