designed by: M. Aladdin & H. Fathy

Thursday, May 03, 2007

لجوء سياسي


الوطن عندي يعني بيتك و شارعك و أصدقائك. بيتي الكبير اللي أتربيت فيه 27 سنة جه اليوم اللي اسيبه فيه. هي دي كانت الظروف القهرية اللي كتبت عنها لما قلت إني أتأخرت في بوست عيد ميلاد البلوج.

في بيت جديد، يعتبر آخر حلقة في لجوء سياسي طال انتظاره، كان عندي المساحة الفاضية بشكل مطلق. كنت في بيت القديم، بيت العيلة و الأجداد و الآباء، ناجح شوية في خلق عالم خاص ليا لوحدي. مساحة فاضية بشكل نسبي. دلوقت، مع المفتاح الجديد، و القط الجديد الأستاذ فستق الحمصاني، المساحة الفاضية دي بقت مطلقة، مع التمني إنها تكون نهائية.

أنا دلوقتي في وطن بصنعه، بعد ما سبت ورايا وطن صنعني.

لسه ملتزم بأعباء عائلية، مع مبلغ شهري لا يستهان بيه. تمن الحرية اللي مستعد لدفعه بنفس راضية، و اتمني أن ربنا—اللي نفذ لي كل أحلام حياتي تقريبا—يكمل وقوفه جنبي زي ما بيعمل من أول لحظة بصيت فيها بجد علي الدنيا، و من قبل كده كمان.

هو شعور عجيب، ما بين الفخر و الخوف، ما بين الراحة و القلق. فخر بأنك كملت لدرجة جديدة من سلم الاعتماد علي النفس؛ فلا الوالد و لا العيلة جابولي شيء. الفخر أني أكون جوه وطن صنعته بالكتابة و للكتابة. الفخر ده ممتزج بالخوف من أنك تطلع صغير بعد ما كنت كبير في عينك. الراحة في سرير جديد كان حلم اكبر في الحياة، و قلق من بكرة و من كل الالتزامات. طريقي اختارته بنفسي، و الحمد لله، و مفيش أي ذرة للندم تسللت جوايا، لغاية دلوقت.

مع كل حتة اكسسوار بجيبها للوطن الجديد بارتاح زيادة، و مع كل مكالمة تليفون هادية ما تقطعهاش خناقة بين اهل وطني اللي فات بانشرح. مع كل صديق يفوت يشرب معايا الشاي في فناجين اخترتها لنفسي انبسط. لما جاتلي صحفية لطيفة و عملت حوار صغير اتنشر في روزا اليوسف كانت اول صورة في الوطن الجديد، بس للأسف لسه ما بعتتهاليش. صورة شفتها مطبوعة و ابتسمت.

كل شيء ليه تمن. معلوم. لكن تاني، و باكررها، مش نادم علي شيء.

و مع القنديلين جنب السرير الواسع، بغمض عيني و استرخي و انام ببطء و انا بفكر في كوابيس بكرة. بالاقي نفسي بابتسم، رغم كل الخوف، لأنه دلوقتي بقي عندي وطن حقيقي، مش مستعار.

.........................................................

صورة1: من بلكونة الوطن الجديد.

صورة2: فستق باشا الحمصاني. رفيق الكفاح الجديد..برضه.

16 comments:

Incomplete said...

سعيدة لرضاك وسعادتك
ربنا يديمهم عليك
ويكون بكره أحسن إن شاء الله
مبروك الوطن الجديد
وكميييل قوي فستق ربنا يخليهولك
:) :) :)

بهجت said...

مكان جديد طريق جديد لاكتشاف الذات و العالم

محمد المصري said...

أنا دلوقتي في وطن بصنعه، بعد ما سبت ورايا وطن صنعني.
====

مش عارف بس غالباً مش بعرف أكتب كومَّينت لحد في أي مكان لمجرَّد إني أقوله إن اللي انتَ كتبته جميل ، هوَّ أكيد عارف إن كلامه جميل وإلاَّ مكنش نزله أصلاً ، بس ربما لحالة استقرار مع العالم خلال الفترة - أو اللحظة - الحالية رغبت فعلاً في إني أقولك إن البوست بتاعك جميل ، صادق وعميق وبيحمل امتنان حقيقي لوطن وبيت وأهل انتَ سبتهم وامتنان أكبر لمكان تاني بيمثَّلك حاجة بتتمنَّى تكون أحسن ..

برافو

والسلام ليسَ الختام ....
محمَّد المصـري

RAT said...

علاء
أنت الآآآآآآآآن
حرّ و حرّ و حرّ
بالاذن من محمود درويش يعني
مودتي

Anonymous said...

علي فكرة يا علاء انت جميل اوي

Muhammad Aladdin said...

أنكومبليت
شكرا شكرا شكرا شكرا.. و فستق بيبوس الايادي
:)

بهجت
اتمني ذلك.. و اهلا مجددا يا بهجت
:)

محمد المصري
اشكرك و طبعا السلام ليس الختام
شكرا مجددا علي التعليق
:)

راتي
محمود درويش يأذن لك
:P
مودي و احترامي و اعجابي
:)

المجهول
و الله رغم اني مش عارف انا جميل ليه أو مين حضرتك بس انا متشكر جدا علي العموم
:)

metkazy said...

ألف مبروك الوطن الجديد

ويخليلك فستق

لأول وهله قلت ان البيت اللى فى الصوره بيتك

منظر يساعد على التألق فى الكتابه اكتر واكتر

أنهو مكان فى المحروسه ده يا علاء؟؟
:)

مبروك مجددا

mohamed kamal hassan said...

مبروك يا لول
أنا مبسوط إنى قفشتك وانت بتجين أطباق الوطن الجديد
بجد يا لول كنت مبسوطلك جدًا
وكمان ساعتها واحنا ماشيين سوا
صحيتلى أحلامى بسرعة الاستقلال
أكيد مش هاقدر اكتب كويس فى بيت مش بيتى
ربنا يوفقك
وقريب اشوفلك بوست جديد بتكتب فيه عن وطن أحسن

شيماء زاهر said...

بوست جميل..ربنا يجعل كل مكان تروحه وطن جديد بس عارف هنا متيهألي مفيش مشكلة في تعدد الجنسيات، لأن كلها أوطان جوا وطن واحد والأوطان بتنفد لبعض :)

Nerro said...

ألف مبروك عليك الوطن الجيديد، ولازم يبقي في بندقة هانم مع فستق افندي و كده.ربنا يباركلك فيها يا لولو

iDip said...

نقول في الكويت لمن ينزل منزلا جديدا: منزل مبارك

وأقول لك: وطن مبارك
مش مبارك إياه
;)

Reham said...

دى اول مرة اكتب فيها لبلوج بس موضوعك عجبنى جدا وحبيت اقولك مبروك الوطن الجديد بتاعك بس انا رايي ان الوطن القديم اللى عشت فيه السبعة وعشرين سنة دول هو اللى عمل روائى هايل كده ....بس برضه مبروك الوطن الجديد

THE 1 & ONLY ME said...

و برضك(بالكاف) تفضل فى حاجة ناقصة..
الوطن الانسان..
و انزل بأغنية يعنى ايه كلمة وطن للكتكوت الجامبو اللى مع ايمان الطوخى:)

Brava Valentia said...

منزل مبارك يا علاء
يالله زي ماتفقنا, تملي البيت ده بشوية مواطنين...بالتحديد بعد سنة انشاءالله

;-p

Maat said...

:) mbrook ya basha your new home :)

Muhammad Aladdin said...

متكاظي
الله يبارك فيك.. و مش ح اقولك فين
:P

محمد كمال
ربنا يخليك يا كيمو و ربنا يقدرني املا الاطباق قريب!
:P

شيماء
ما تنفد.. فيها ايه يعني
:)
متشكر اوي يا شيماء

نيرو
لا.. مادام انا لسه مفيش مرجانة يبقي مفيش بندقة
رزالة بقي
:P
ربنا يخليكي يا نيرو..وحشتيني يا بنت علي فكرة
:)

آي ديب
ههههههههههههههههههههههه
علي كده نقول احسن : وطن مبروك
:)
نورت البلوج بطلاتك الخاطفة السعيدة
:)

ريهام
متشكر جدا و اخجلتم تواضعنا
:)

ذا وان
ابعتيلي انتي بس ايمان الطوخي و مالكيش دعوة
:P

بريما
بذمتك الحق يعني املاه في سنة واحدة؟؟
:P

ماعت
شكرا شكرا شكرا
:)