لجوء سياسي

الوطن عندي يعني بيتك و شارعك و أصدقائك. بيتي الكبير اللي أتربيت فيه 27 سنة جه اليوم اللي اسيبه فيه. هي دي كانت الظروف القهرية اللي كتبت عنها لما قلت إني أتأخرت في بوست عيد ميلاد البلوج.

في بيت جديد، يعتبر آخر حلقة في لجوء سياسي طال انتظاره، كان عندي المساحة الفاضية بشكل مطلق. كنت في بيت القديم، بيت العيلة و الأجداد و الآباء، ناجح شوية في خلق عالم خاص ليا لوحدي. مساحة فاضية بشكل نسبي. دلوقت، مع المفتاح الجديد، و القط الجديد الأستاذ فستق الحمصاني، المساحة الفاضية دي بقت مطلقة، مع التمني إنها تكون نهائية.

أنا دلوقتي في وطن بصنعه، بعد ما سبت ورايا وطن صنعني.

لسه ملتزم بأعباء عائلية، مع مبلغ شهري لا يستهان بيه. تمن الحرية اللي مستعد لدفعه بنفس راضية، و اتمني أن ربنا—اللي نفذ لي كل أحلام حياتي تقريبا—يكمل وقوفه جنبي زي ما بيعمل من أول لحظة بصيت فيها بجد علي الدنيا، و من قبل كده كمان.

هو شعور عجيب، ما بين الفخر و الخوف، ما بين الراحة و القلق. فخر بأنك كملت لدرجة جديدة من سلم الاعتماد علي النفس؛ فلا الوالد و لا العيلة جابولي شيء. الفخر أني أكون جوه وطن صنعته بالكتابة و للكتابة. الفخر ده ممتزج بالخوف من أنك تطلع صغير بعد ما كنت كبير في عينك. الراحة في سرير جديد كان حلم اكبر في الحياة، و قلق من بكرة و من كل الالتزامات. طريقي اختارته بنفسي، و الحمد لله، و مفيش أي ذرة للندم تسللت جوايا، لغاية دلوقت.

مع كل حتة اكسسوار بجيبها للوطن الجديد بارتاح زيادة، و مع كل مكالمة تليفون هادية ما تقطعهاش خناقة بين اهل وطني اللي فات بانشرح. مع كل صديق يفوت يشرب معايا الشاي في فناجين اخترتها لنفسي انبسط. لما جاتلي صحفية لطيفة و عملت حوار صغير اتنشر في روزا اليوسف كانت اول صورة في الوطن الجديد، بس للأسف لسه ما بعتتهاليش. صورة شفتها مطبوعة و ابتسمت.

كل شيء ليه تمن. معلوم. لكن تاني، و باكررها، مش نادم علي شيء.

و مع القنديلين جنب السرير الواسع، بغمض عيني و استرخي و انام ببطء و انا بفكر في كوابيس بكرة. بالاقي نفسي بابتسم، رغم كل الخوف، لأنه دلوقتي بقي عندي وطن حقيقي، مش مستعار.

.........................................................

صورة1: من بلكونة الوطن الجديد.

صورة2: فستق باشا الحمصاني. رفيق الكفاح الجديد..برضه.