designed by: M. Aladdin & H. Fathy

Tuesday, March 06, 2007

.. مكتبة ديوان: مدبولي فرع الزمالك

زمان كان فيه فرشة عند عم مدبولي في ميدان طلعت حرب، وكانوا رجالته يقولولك "ايووووة!" كانك حرامي غسيل لو وقفت و بصيت علي كتاب شوية.. كانت ايام الله ما يرجعها.. الواحد تفاءل لأن المحافظة شالت لمدبولي فرشته اساسا و لأن مكان زي ديوان فتح.. مكان كنت دايما متحمس ليه و مبسوط اني عرفت بعض الناس علي طريقه، و النهاردة علي بليل كده كنت موجود هناك، كزبون دائم من ساعة افتتاح ديوان من خمس سنين، بمارس عادتي المفضلة: ابص علي الكتب و اتحسر! حصل اني مديت ايدي لكتاب عن اقوال كافكا، كتاب جميل و رشيق، و حصل برضه ان عجبتني مقولة فبكل بساطة حبيت انقلها، اكتبها يعني علي الموبايل لأني كعادتي لا معايا لا ورقة و لا قلم و لا لاب توب. شوية—و انا بانقل—لاقيت بني آدم بقميص و كرافت طالعلي من العدم و بيقول "سوري بس ممنوع النقل سعادتك"(!!) اديته الكتاب كله طبعا مع انه مكنش قصده و مسحتله اللي نقلته كمان من نفسي. مش فاهم ديوان حصلها ايه؟ ايه الجو ده؟ قبلها بشهر او شهرين برضه قالولي التصوير لازم بتصريح من الادارة.. ماشي.. مع اني مش شايف ان ديوان منطقة عسكرية أو ان المشير طنطاوي نايم جوا، بس ماشي..كل مكان و ليه قواعده و هو حر.. بس يعني انا اظن انه اللي يحط قاعدة لازم ينبه الناس ليها..يافطة او ورقة او أي حاجة..مش فجأة كده حد يطلعله زي سنافور المحطة و يقوله كلام غريب زي ممنوع التصوير او النقل، مع اني شخصيا متصور في ديوان قبل كده، و ياما مسكنا كتب في ديوان قبل كده.. مش عارف الجماعة حصل لهم ايه هناك؟؟!! لاقيت نفسي بفكر هو يعني علشان اورهان باموق جه زار المكان بقت خلاص يعني الكعبة مثلا و لا المسجد الاقصي؟؟ بنفس المنطق ده يعني المفروض الحاج صاحب قهوة الفيشاوي يمشي يدبح في الناس علي اساس ان محفوظ بنفسه كان بيقعد علي قهوته اكتر من تلاتين سنة!

و بعدين انا الحمد لله لا ماشي عامل فيها كاتب.. انا مجرد زبون عادي جدا بالنسبة لكل العاملين بالمكتبة.. طيب ليه يعني ديوان تعامل زبونها كده؟؟ طيب يعني افرض الاستاذ ابو كرافت ده جه عمل نفس الفصل مع كاتب تاني طبعه غير طبعي، ايه منظر الادارة مع جو زي ده؟هل يا تري ده اسلوب؟ و لا خلاص ديوان بقت مؤسسة اليونيسيف و بتدي منح ثقافية و بتعلم الفلاحين في باريز و بقي ليها يعني بسم الله ما شاء الله برستيجها التنويري التثقيفي بين مؤسسات عصبة الامم؟؟

ديوان حرة و تعمل اللي تعمله، بس ارجوها تكتب يفط واضحة للفلاحين اللي زيي علشان نعرف ايه اللي ممنوع و ايه اللي مش ممنوع في رحاب المؤسسة الثقافية التنويرية الخطيرة دي، و إن شاء الله شكلها ح تقلب مدبولي او ممكن حتي مادبوليوو علي اساس انها مؤسسة هاي و في الزمالك و كده... و ربنا يوفق!

...................................................................

تحديث لابد منه:

حدث منذ ايام قلائل ان اتصلت بي الاستاذة هند واصف مديرة او صاحبة مكتبة ديوان—لست متأكدًا الحقيقة—و قامت بكل ذوق بدعوتي إلي احتفال المكتبة بخمس سنين علي تأسيسها، و اضطررت للاعتذار عن الحضور، ثم قمت بالاتصال بالاديب الكبير و الوالد العزيز بهاء طاهر لتوضيح اسباب رفضي، لأنه الشخص الذي وفر رقم هاتفي للأستاذة هند، و لم احب ان اترك هذا الموقف بدون تفسير لشخص بحجم بهاء طاهر.

و منذ دقائق قليلة قامت الاستاذة هند بمعاودة الاتصال و عبرت عن اعتذارها و اعتذار ديوان عما حدث بكل ذوق و احترام، و تساءلت عن أي اقتراح اراه مفيدا للمكتبة، فما كان مني إلا تكرار ما ورد باعلي—في الموضوع الاصلي—و مفاده ان من حق كل مكان تحديد قواعده، و لكن لابد من اعلانها للمترددين حتي لا نواجه بموقف سخيف مثل هذا.

و للأمانة كانت السيدة متفهمة للغاية و بالغة الود و هي تعيد دعوتها لي بحضور الحفل، و لكنني اضطررت مرة ثانية للاعتذار، مع تأكيد تقديري الشخصي لاهتمامها و ذوقها و ادبها الجم. شكرًا جزيلًا.

7 comments:

Anonymous said...

تصدق بأة انك احبطتني ... انا كان نفسي اروح جدا من فترة..وماصدقت رتبت مع اصحابي اروح..بس جو الاكتئاب دا والتحذيرات والتنبيهات مش بحبة لأني ببقي في اي مكان فية كتب زي الطفل الصغير بنطلق جدا ومش ببقي عارفة اداري فرحتي ...ربنا يسامحك بجد ياعلاء كنت اجل الكلام دا شوية لحد ما اروح واجي :(

Anonymous said...

المشكلة ان مصر مكان إبداعى فى تحويل كل شئ جميل لشئ أقل جمالا من أول النيل والهرم وأبو الهول لغاية مكتبة ديوان يا سيدى معلش يا لولو بس باردو
ده وانتى مطلعة عينى بحبك مووووووووووووووووت:)

Dananeer said...

كنت متحمسه للديوان و كتب خان
كده انت نسفت واحده
:(

ألِف said...

تصدق أني أول مرة آخد بالي بشكل واعي أن مدبولي شالو له فرشته! أو بالأصح أنه كان له فرشة زمان.

طبعا دا بعد ما بلطوا الميدان و عملوا الحتة الرخام و الزرعتين.

أنا مش باعتب المكتبة دي من سنين بسبب المعاملة، و الصورة الأخيرة في دماغي هي الرجل إياه و هو بيقول: "أيوه!"

و خلاص..مدبولي هتفضل بالنسبة لي على الصورة القديمة دي.

Muhammad Aladdin said...

المجهولة
برضي روحي و جربي حظك
:)

سمسم
علي رايك
:)

دنانير
بس برضه جربي الاتنين بنفسك.. بس اوعي تنقلي حاجة
:P

ألف
اهلا بعد غيبة طويلة يا سيدي الفاضل
:)
فاهم اللي انت بتقول عليه كويس
:)

Anonymous said...

للاسف يا محمد
انا كنت من اهم المشجعين لديوان
بس للاسف طلبت كتب و انتظرته 3 شهور و تابعت معاهم و للاسف باعوها لغيرى و الاعجب ان هناك كتاب من 6 شهور كل ما اكلمهم عنه ما يردوش
للاسف الخدمة سائت لاقصى درجة و على وشك انى ما اروحش ثانى هناك
نهى حماد

Anonymous said...

يا جماعة مش عايزن نقسى على الناس دول متنسوش ان فى ناس كتير بتتعامل مع الكتاب كانو لعبة و بيتقطع و بتحط على الرف كانوهم معملش حاجة و ثانيا مش عايزن اى مشروع جديد ننسفة حتة لو فى عيوب نروح و نكتب ملاحظتنا للادارة هم ناس متافهمين من خلال كلام حضرتك يا استاذ محمد
وبالنسبة لاوردرات الكتب انا عن نفسى بطلب الكتب و بتيجى فى وقتها ولو الكتب اتاخرت بتكون اظن غزب عنهم بس المجمل انا بعشق الديوان