..الأصدقاء

الاصحاب و الصور، الاتنين مهمين، لأن ربنا بينعم عليك بالاصحاب و لكنه برضه بينعم عليك بالنسيان. الصور الحلوة بتفكرك بالتفاصيل اللي ممكن تنساها: هو انا كنت اهبل كده ليه؟ التي شيرت ده اتحرق صحيح! مش عارف مين شكله كان غريب اوي بالدقن! ياااه.. ده كان في بينوس.. مش كده؟ أنا بقيت شاب بكرش!!... علشان كل التفاصيل دي، الصور بتبقي حلوة، و ساعات، ساعات، لما بتكون مما بين الحبايب بتألم.
:)
و ما دمنا في الخل الوفي، يعني الراحة و الضحك و ايام العبط و لحظات الافكار الكبيرة فعلا أو اللي بتبان كبيرة ساعتها، كانت الصور دي..

صورة 1: حفلة تكريم أمنا الأولي ماما لبني في المجلس الأعلى للتقافة، محسوبكم في آخر الصورة في الوسط، و جنبه ياسر حماية علي يمينكم، و محمد منصور (المختفي) علي شمالكم، الاستاذ محسن الزيات اخونا الكبير في اقصي الشمال، بينما عم محمد فتحي في اقصي اليمين-- مبني المجلس الأعلى للثقافة بالأوبرا—القاهرة.

صورة 2: صورة مجمعة لأغلب اعضاء أول ورشة كوميكس مصرية في المعرض اللي اتعمل لألبومهم في التاون هاوس جاليري. التاني في الصف الخلفي من علي ايدكم اليمين حاتم، و محسوبكم في الوسط ، بينما الراجل الشيك الاسمراني ابو بدلة ده هو اشرف عبد العظيم، اللي هو في رأيي الشخصي واحد من أهم الرسامين في مصر حاليا، بس مضيع كل حاجة علي شغل الاعلان. اأما الجدع اللي علي ايدكم اليمين خالص ده، ايوة، اللي قافل عينيه ده، أبو شنب اشاوسي مغواري هو مجدي .. مظبوط.. مجدي الشافعي! هيهيهي! معلهش يا ابو المجد: خيانة.. خياااااااانة-- وسط البلد—القاهرة.
:P

صورة 3: عيد ميلاد مجدي، من اليمين للشمال: حاتم لما كان كلبوظ، محمد فتحي، محمد علاء الدين، باسم شرف، مجدي الشافعي و حرمه، من تحت فيه وائل سعد و تامر عبد الحميد، و علي الشمال محمد حماد و أحمد خالد-- مدينة نصر—القاهرة.

صورة 4: من عيد ميلاد مجدي برضه، محسوبكم مستكيف اوي من حاجة هو و تيمو (يمكن اغنية) و وائل شكله كويس و الله هنا، و تامر عينه علي التورتة.. يا دني--مدينة نصر—القاهرة.
:)

صورة 5: طارق إمام و وائل سعد و العبد لله-- باب اللوق.

صورة 6: محمد عبد العزيز متغاظ اوي من الحب الصافي بيني انا و فتحي--مشيخة الازهر.

صورة 7: من فرح صديقي و زميلي بلال فضل، بعض من العاملين بمكتب إم بي سي سابقا (ما عدا مطاوع بركات علي اليمين خالص)، مع نشوي الرويني مدير فرع القاهرة ساعتها، و ممكن تاخدوا بالكم من العايدي ورا خالص و الاخ المعجباني اللي بيبص للجنب. فيه طبعا حبايبنا علي عبد المنعم (موقع عشرينات دلوقت) و محمد مصطفي (الأخبار دلوقت) و القلب الطيب هشام توفيق مسئول الجمع و الصف في اقصي الشمال-- كونراد--كورنيش النيل.

صورة8: في قعدة صفا من اليمين : إبراهيم البطوط، طارق إمام، عمر خُضير، احمد العايدي، العبد لله، دارجانا-- كافيه ديلز—الزمالك.

صورة 9: محمد علاء الدين و حاتم فتحي و عادل سلامة--أطلال شالي—سيوة.

صورة 10: من حفلة خاصة للعايدي بمناسبة ترجمة عباس العبد، من اليمين للشمال: برضه إبراهيم البطوط، وائل و هو برضه جدو، برضه العايدي، برضه محمد فتحي، برضه محمد حماد، و برضه مجدي و حرمه، و برضه العبد لله -- روستري كافيه—الزمالك.

صورة 11: قبل ساعة من توجهنا لفرح الزميل عمرو سمير عاطف: برضه محسوبكم اللي هو برضه العبد لله و انتم عارفين الباقي-- كوداك بروفيشنال--وسط البلد.

صورة 12: فرقة الجميزة و عمر اللي يتحط ع الجرح يطيب قاعد تحت و اللي ما يتسماش—الأوبرا.

صورة 13: طبعا مش محتاجة تعليق غير اني اللي بقيت كلبوظ و حاتم خس و وائل لسه جدو--بجوار قلة قايتباي—اسكندرية.

صورة 14: طبعا تاني مش محتاجة تعليق غير اني اللي بقيت كلبوظ و حاتم خس و وائل لسه جدو--أتينيوس—اسكندرية

صورة 15: التريانون-- محطة الرمل – اسكندرية.