..الوش و المزاج

"معلهش القهوة دي مزاج.. يعني لما تشربها في بلكونة.. مع حد بتحبه.. اكيد الموضوع ح يفرق خالص".

دي المسألة زي ما بيشرحها الاستاذ "محمد السيد"، العقيد المتقاعد، و صاحب محل البن البرازيلي (سيموندس) في اسكندرية.

" طب تعرف؟ انا بخلط البرازيلي بالروبوسوتا، و الروبوسوتا دي زبالة القهوة، لكن بتدي الوش علشان البرازيلي بيدي طعم بس".

لو انت غاوي اسكندرية تبقي غالبا ح تقف تشرب قهوتك في المحل ده. شارع صفية زغلول. وسط بلد اسكندرية. فتارين الملابس و المحمول و الاندر وير و ستاندات الاحزمه الرخيصة.

آخر مرة زرت فيها اسكندرية، آخر السنة اللي فاتت، خدت بالي من التغيير اللي حصل. الحيطان الصفرا و العواميد الفسفوري. صور لاعيبه كورة في المنتخب البرازيلي.

"لكن المكان اتغير خالص".

قالي و هو بياخد نفس من سيجارته

"ايوة ما احنا جددناه"

لسه فاكر المكان ده كان عامل ازاي. الدهان القديم. صندوق القهوة الخشب. الكاوننتر القديم ابو صوت معندي و زراير بارزة. البوفيهات الخشب اللي واخده شكل مستطيل، و بتلف مع اركان المحل.

هنا ممكن تقابل بنات زي السكر، و رجالة متشككين، و ست عينيها حلوة تحت النقاب، و د. شهيرة خليل—رئيسة تحرير سمير—اللي كلمتني بسرعة عن الموضوع اللي كاتبه فتحي في الدستور. شربت قهوتي بالبندق و انا ببص علي الناس من غير ما احدق. واضح ان جودة الطعم تغلبت عن اثر التجديد، و يمكن الموضوع مشي علي نظرية "الوش و الطعم".

محل البن البرازيلي ما يفرقش عن ريستورانت زي "اتينيوس"، اللي بيكتب في بروشوره "المكان المفضل لكبار رجال الدولة"—طبعا زمان—و بيعلق صور قديمة علي الحيطة. الفارق الوحيد أن اتينيوس بيستغل العراقة، و البن البرازيلي بيغازل الجديد. تحت دهان الجدران الجديد ده فيه طبقات من بني آدمين. يا تري كام قصة حب كانت هنا؟ كام ضحكة؟ كام تبويزة و كام دمعة؟ غضب و لا احباط و لا رضا و لا تسليم؟

تاني يوم رجعت و شربت قهوة البندق، و اشتريت منها كمان، الاستاذ محمد قالي أن فيه فرع جديد ح يفتح. ربنا يوفقه.

"بُص.. انت تملا الكنكة مية متلجة. تحط معلقتين بن.. معلقتين و نص لو كييف اوي يعني. تقلب كويس.. تستنتي لغاية ما الميه تغلي.. تصب نص الكنكة.. تقلب تاني.. انت عارف ساعات البن لو كتير يكلكع.. النص التاني يغلي.. تصب.. كده يبقي عندك وشين".

قالها الاستاذ محمد و هو بيبتسم ابتسامة العارف.

وقفت علي البنك، الفنجان التاني قدامي، باحضن الطعم بطرف لساني. الناس واقفة و مبسوطة. المهم الطعم، جودة الصنعة، مش تخاريف متثاقف زيي.