designed by: M. Aladdin & H. Fathy

Monday, March 20, 2006

..شيء غريب

شيء غريب لاحظته علي الاجريجتور بتاع منال و علاء، و هو تقسيم المدونات
العبد لله لاقى نفسه في قسم لطيف اسمه "إسهال"، و هو طبعا ليه مدلول ما يخفاش علي حد
اظن ده عيب فعلًا.. الواحد عمره ما طلب من حد يحط مدونته لا علي مدونات حد، و لا علي "المجمع" اللي عامله الاستاذة منال أو الاستاذ علاء، فبالتالي المسألة يعني بجد مش شايف انها تنم علي احترام أو تقدير لأنسانية البني آدمين اللي بيشخبطوا--لاقيت ناس معايا في فئة الاسهال المجيدة--و لا هي تعبر، مع احترامي و أسفي الشديدين، عن انسانية أو احترام اللي حط الفئات دي اساسا
يمكن انا اكون فهمت غلط مثلًا، فكده تكون الاستاذة منال و الاستاذ علاء ليهم عندي اعتذار عن سوء الفهم، أما لو كان عندي حق، فببساطة ما يشرفنيش ان الفراغ الصغير اللي عندي ده يتحط في "مجمع" الاستاذ علاء أو الاستاذة منال، و ياريت اي حد فيهم يرحمني من مروره، ده إذا كان بيمر
تحياتي و تقديري

10 comments:

Alaa said...

نشرح حاجتين، أولا أنت ليه في المجمع

أنت مشغل على مدونتك خاصية التلقيمة
atom feed

دي معمولة عشان الناس تقدر تتابع مدونتك و تعيد نشر التدوينة، أو جزء منها أو مجرد رابط ليها (دي أنت اللي بتتحكم فيها). لو مش عايز تبان على مجمع ألغى الخاصية خالص

ثانيا التقسيم
في الأول المجمع كان مش متقسم خالص، زاد عدد المدونات المصرية في سنة واحدة بشكل كبير جدا و عدينا ال700 مدونة، بقيت الصفحة الرئيسية للمجمع و العواميد الجانبية في موقعنا بتتحرك بشكل مجنون و صعب جدا متابعة اللي بيتنشر، فقسمت المدونات حسب اللغة اللي بيعتاد المدون استخدامها عربي ولا مش عربي و لا صور فقط، ده غير الصفحات اللي ليها تلقيمات لكن مهياش مدونات

لحد كده كويس، في ناس بقى بتيجي في يوم واحد تنشر تدوينات عديدة و تزق كل حد نشر قبلها من على الصفحة الرئيسية للمجمع، دول بيخلوا منتابعة باقي المدونين صعبة، ففصلتهم في تصنيف لوحده. اسمه اسهال

اسهال دي دعابة، لما الواحد بيتكلم كتر (زي مثلا) الناس بتقول عليه عنده اسهال كلام

كل الموجودين في التقسيم ده يا أما بيدوني كتير جدا، يا أما اعتادوا أن يجيلهم يوم ينشروا فيه تدوينات كتير ورا بعض.

فيه تصنيفات تانية و دي جاية من المدونات نفسها و لا دخل لينا فيها
http://www.manalaa.net/aggregator2/categories
لكن للأسف الغالبية العظمى من المدونين المصريين بيستخدموا بلوجر و بلوجر مفيهوش موضوع التصنيف ده و بالتالي ده ميساعدش

الاصدار الجاي من المجمع هيسمح للقراء أنهم يصنفوا التدوينات بنفسهم، و أملي أن ده يحل المشكلة و يسهل القراءة

طبعا لما يزيد عدد المدونات تاني التقسيم ده مش هيبقى حل

التقسيم بطبعه جزافي و غير ديمقراطي لحد ما ننفذذ موضوع التصنيف الشعبي في الاصدار اللي جاي

Alaa said...

الرد اللي فوق ده طبعا مش رد على اعتراضك في اختيار اللفظ، ده مجرد شرح لليه في تقسيم من أصله

يمكن يكون اختيار لفظ اسهال يدل على أني شخص مش محترم لكن تأكد أنه ملوش علاقة برأيي في المدونات اللي متصنفة تحته، متصنف معاك
AlienZero
و دي من مدوناتي المفضلة و نديميات و المدون صديق عزيز على و لينا شغل مع بعض و بأحترمه و أحترم عقله و كتابته جدا.

RAT said...

انا لم افهم حقيقة ما الذي اغاظك و انت القائل , ما معناه ان فور نشر الكاتب لكلماته تصبح ملكا للجميع ثم ان تعبير اسهال كلامي موجود و انا اعتبره تعبير مهضوم, افهم وجهة نظرك و لكن بسيطة يا شيخ امسحها في ذقن عالم التدوين, عم تفهم شو قصدي؟
:))

Muhammad Aladdin said...

"دي معمولة عشان الناس تقدر تتابع مدونتك و تعيد نشر التدوينة، أو جزء منها أو مجرد رابط ليها (دي أنت اللي بتتحكم فيها). لو مش عايز تبان على مجمع ألغى الخاصية خالص"
من حقي اني ما اشيلش الخاصية دي للي حابب يتابع المدونة أو يحط لها رابط ما عدا سموك، و اظن ان حضرتك جالك طلبات بشيل مدونة أو اتنين من "مجمعك" و حصل، فمن الاخر--و من غير تكرار كلام سخيف--اتفضل شيل المدونة دي من علي مجمعك
ده طبعا بعيد عن رأيي الشخصي في اللي انت كاتبه هنا، لأني تاني ح اقول كلام سخيف

العزيزة رات
اعتبر المدونة دي شيء شخصي مش "كتابتي"، ده واحد، التاني مين ادي الحق لأي حد و تحت اي مبرر انه يقسم كلام ناس بالشكل ده؟
متشكر جدا علي كلامك يا ستي، و الأهم اهتمامك بأنك تكتبيه
:)

Alaa said...

جاتلي طلبات قبل كده و رديت نفس الرد و محصلش أني شيلت حد (غير مرة واحدة في الأول خالص قبل أصلا ميكون الهدف تجميع كل المدونات المصرية و غالبا المدونة أضيفت تاني)، أنا مش مستني اذنك عشان أضيف مدونتك

أما رأيك في كلامي أنه سخيف براحتك، أنا بسرد وقائع و قلت لك عملت كذا و كذا ليه و ناوي أعمل كذا و كذا و بس

مين اللي نزع حقي في تقسيم كلام الناس بالشكل ده؟ و ايه بالظبط المشكلة في التقسيم؟ أنت مش واخد بالك أن الناس ماشية تصنف الانترنت يمين و شمال؟ من أول المجمعات الشخصية و خاصية المفضلة في متصفاحتنا لحد مواقع زي ياهو و مواقع التصنيف الشعبي زي ديليشيوس؟ وجود تكنولوجيا تسمحلنا بتقسيم و تصنيف الكلام هو اللي أدانا الحق نصنف و نقسم الكلام.

أنت مضايقك فكرة التصنيف؟ ولا أسلوب التصنيف ولا اختيار اللفظ؟

Muhammad Aladdin said...

واضح ان فيه ناس مصرة تسمع كلام سخيف

بص يا سيد علاء، انا معنديش مانع تاكل عيش و تستفيد اعلاميًا من مسألة "اللي مجمع بلوجات مصر كلها" دي ، و بالنسبة لموضوع انك مش ح تستأذني فس موضوع ادارج البلوج فأنا احب اقول لحضرتك انك مش الانسكلوبيديا بريتانيكا أو المجمع العلمي المصري، حضرتك عندك مساحة علي النت و ربنا يوفقك فيها و قضي الامر الذي فيه تستفتيان، انت فاتحها بقي دكان تسترزق منه اعلاميًا--ما اظنش ماديًا طبعًا-- فأنا تاني معنديش اي مانع، بس تكلمني باعتبارك جهة توثيقية مثلًا فأسمحلي اقولك أن دي--في ظروف الوضع الحالي--نكتة كبيرة، يمكن ربنا يوفقك انت و الاستاذة منال و تبقوا فعلًا شيء مهم
و بيني و بينك، طول ما انتوا ممكن تصنفوا الناس علي انهم "إسهال" عمركوا ما ح تبقوا شيء مهم، علي الاقل بالنسبة لي و رأيي يهمني جدًا لو حضرتك معندكش مانع
قلت ابتداءً اني معنديش مانع في انك تعمل اللي تعمله، تصنف أو ما تصنفش، تكون وظيفتك في الحياة أو لأ، انت حر

بس حضرتك مش حر ابدًا انك تكون متجاوز و غير محترم للأسف، يعني اي حد بمنطق سعادتك ممكن ياخد اللي انت بتعمله ده و يحطه تحت اسم اوسخ بمليون مرة من اللي انت حاطه ده و اخبط راسك في الحيط--ده بنفس منطقك يعني--و إذا كنت انت معندكش مانع في انك تتصنف تحت اسم عيب اكتبه هنا فأنت ببساطة حر جدًا ، لكن انا الحقيقة--تاني--ما يشرفنيش تكون مساحتي دي مدرجة عندك

انعدام الاحترام بينفي عنك اي حق مكتسب إن وجد

ممكن حضرتك تعند زي العيل الصغير--أو حتي ببراجماتية السبوبة الاعلامية--و تصر علي وجود البلوج ده عندك، الخيار التاني اني اغير خواصي علشان خاطر سعادتك؟ مش ح يحصل للأسف

خلاص عايز تعند اعند، لأني لا بوليس و لا سلطة، بس اظن انك في الحالة دي انسان مزيف بشكل مريع، و تفتقد لأبسط قواعد اللياقة

الموضوع في ايديك دلوقت، و ارجو اني ما اشوفش هنا اي تعليق من سعادتك تاني لأن الموضوع خلص.. عايز تعند تاني زي العيل الصغير و تجعجع يمين و شمال--و انا آسف اني بسئ الظن بيك، بس انت ما سبتليش خيار تاني--فاتفضل برضه براحتك اهلا و سهلا، بس انا عن نفسي مش ح ارد عليك

نورت و اهلا و سهلا!

ِAhmad said...

هناك خطأ في
atom feed
يا علاء الدين
ياريت لوكنت الغيتها ترجعها

Muhammad Aladdin said...

لم اغير شيئًا في الاتوم فيد، ربما كان خطًأ من موقع بلوجر ذاته

Ahmad said...

حاولت فتح
http://alaaeldin.blogspot.com/atom.xml
في المتصفح
ظهر الخطأ التالي
XML Parsing Error: prefix not bound to a namespace
Location: http://alaaeldin.blogspot.com/atom.xml
Line Number 443, Column 68
وقارئ ال آر آر اس الذي استخدمه لم يستطع معالجة الملف أيضا

الخطأ عند تدوينة أي كلام 2

Muhammad Aladdin said...

احمد
في الحقيقة ليس لي أي تعامل أو دراية مع مثل هذه الفنيات.. لم اعدل شيئًا في خواص المدونة حتي الآن، بالنسبة لهذا الخطأ فربما استشير صديقًا ممن يفهون في تلك الامور.. و بيني و بينك، انا من النوع الذي رأي صفحتة ظاهرة في المتصفح العادي ينسي ماعدا ذلك
:)
شكرا لإهتمامك يا سيدي