designed by: M. Aladdin & H. Fathy

Sunday, March 05, 2006

...منه فيه


زي الحاجات الحلوة دايما القهوة دي مرتبطة بذكريات. عشر سنين من عمري و انا قاعد فوق كراسيها، باستمتع بضلها في الصيف و بتكتك من هواها في الشتا. قهوة منه اللي اسمها اساسا قهوة حسن سرور و النوبة و غيره من الاسامي، بس معايا انا، و مع "مشروب المنه فيه الساحر"—شوب شاي بحليب صافي من غير نقطة ميه—قررت تسميتها "منه فيه". هو نفس الاسم اللي كان اصحابنا الصحفيين و الكتباتيه—اللي اتجرت رجلهم للقهوة—محرجين جدًا لما يوقفوا حد من معروف و يقولوله "قهوة منه فيه منين و النبي يا ..". طبعًا بصة الراجل ح تكون مش و لابد
حربي و اسعد و عشري تلات اخوات قهوجيه من سوهاج بيبدلوا في اللايام.. طبعا كان معاهم ثروت—الله يرحمه—و علي النصبة ممكن جدًا تلاقي "نجيب" اللي ايده تتلف في حرير، و تتلف في كلبش برضه، لأنه ممكن يعملها مع اي كائن حي اكبر من 13 سنة، و اسمه الحركي كان "لص بغداد"—علي رأي صاحبنا ريتشارد—لأنه كان اقرع و اهتم إلا من نابين بيبانوا لما يضحك
سيبك من أن حربي اسمه الاصلي ممدوح و مراته ماتت بعد عدد مش بطال ابدا من العيال. ده غير طبعا جنان "عشري" بالنادي الأهلي نادي القرن. هرشة اسعد علي نتايج و نوت شركة مجدي الشافعي و شنط وائل و مجلات عبد العزيز و كتب العبد لله. الميكانيكي عصام و خردوات عم سيد و فول محمد ابو بيض مسلوق. برضه ممكن تسيبك من حبه صبيان الشيشة اللي بيروحوا و بيجوا كل شوية، بس اوع يغرك عقلك و تحاول تلاقي شيشة عالمية في "منه فيه"، لأن ده واقعية سحرية أو خيال علمي—أيهما اقرب
خناقات الكوتشينة بين الرجالة العواجيز تبان حامية و لكنها ودية جدًا، و اصوات النوبيين العسل العالية و الخبط و الرزع و شويتين الزعل الطايرين، كل ده، ح ينزل علي مفيش. سيبك من دي كمان
فوق الكراسي دي كنت باقعد و بحلم و الغريبة انها فضلت معايا لغاية ما الحلم اتحول لحقيقة. شيء غريب بجد أن نفس المكان يشهد عليك و انت من حال لحال. قبل "منه" كانت قهوة "شمس" في التوفيقية، و "زهرة النيل" في باب اللوق، و كافيتريا فندق في 26 يوليو. فضلنا نتنطط من مكان لمكان لغاية ما "منه" لمتنا، و بعدها افترقنا. كله راح في حتة و انا فضلت في ذات المكان. قعدة الكوتشينة بقت قعدة و تمطيطة و احلام عبيطة. بعد صدور مجانين—سلسلة كوميدية كنت بكتبها مع زمايلي اللي منهم فتحي و العايدي—اختارت الشلة "منه فيه" علشان تكون المقر. محاولات من ناس ناحية الندوة الثقافية باءت بالفشل الذريع. كنت قاعد و سيجارتي في بقي و بابتسم زي شرير جيمس بوند. "منه" يا ارض العروبة
ميزتها الحقيقية انها قهوة مش ثقافية، و حتي لما غزاها الصحفيين و الكتباتية اندحروا امام البرد المنه فيهي العظيم. يعني مش ح تلاقي حد ماسك ودان امك و عمال يطرطر فوكو أو لوكاتش لغاية ما تتشرنق و تتحول لتهييس متشنج مصاب بالحصبة أو شقة صالتين من غير حمام. كل الناس هناك عالم لطيفة و بتحب الناس غالبا و بتبص علي النسوان و بتتاوب و بنج سه و جوهر يك و يالا يا بربري
"منه فيه" في وش اعلان كبير لروتانا علي حيطة برج معروف، و جنبها معروف العشوائية و معالمها السياحية المهمة زي ابو طارق دوت كوم و "كفتجي" ابو خالد الشهير بهوهو في شامبليون، و من الناحية التانية ميدان عبد المنعم رياض و من بعده الرعمسيس هيلتون و ملحقه و ملحقاتهما من نسوان وظاويظ و شباب حايرة رايحة هنا و هنا، و من ورا ده كله النيل.. بتوع الببس و السميط و الحبيبة و المراكبية و اغاني سعد الصغير و حسن الاسمر و عمرو دياب بتلعلع في عز الليل
مليون سيجارة شربتها علي "منه".. و الله ممكن.. مش مبالغة.. ممكن فعلًا. مليون ساعة قعدتها علي "منه".. و الله ممكن. مليون خطوة من "منه" للبيت و من البيت لـ"منه".. من محطة المترو و من سلانترو و من ديوان و من ميريت لـ"منه". و اهو كله منه.. و منه ليه

8 comments:

worood said...

جميـل إنك تلاقي مكان مرتبط بوجدانك و ذكرياتك وأطوار مختلفة من حياتك..ويكون مع مرور الوقت لسه موجود مش بعيد..وتلاقي وقت كمان تزوره..
حضرتك محظوظ ياأستاذ!

hesterua said...

انه العبق سيدى الفاضل
مش لازم يكون تاريخ بس ممكن قوى يكون تاريخك انت لما كنت وما ذلت جذىء من الكيان ده
ترس فى عجلة احداثه واساميه وملامحه
صعب انك تنفصل عنه
ولو حصل وانفصلنا بنحس قيمته اللى ممكن نكون مش حاسيين بيها
ونذداد ارتباط بيه

ETFOKHS said...

عبرني يا محمد

Nerro said...

نفسي أقعد علي قهوة يا علاء :(..

Muhammad Aladdin said...

ورود
فعلا جميل.. و اظن اني محظوظ بالمكانت ده فعلا
:)

هيست
عندك حق

اتفوخس
اديني برد اهه يا عم
:)

نيرو
تعالي اقعدي علي قهوة يا نرنر و جيبي معاكي كل الحاشية من النرانر البمبيون
:P

Anonymous said...

علاء
انت جميل في كل حاجة
اخويا الصغنن
بحبك جدا
وبحب وسط البلد
حنان

باسم شرف said...

ايه يا عم علاء هتلم علينا الناس مش اتفقنا نخليها سر لحد مايكون سننا اربعين سنة ولكن هنيئا لمنه فيه بكراسيها وناسها بيك وبينا
باسم شرف

Anonymous said...

ايام جميلة يا لولو بجد اللي قضيناها هناك .. منساش انك الي جمعتنا ولسة بتجمعنا هناك ياسر حماية