designed by: M. Aladdin & H. Fathy

Tuesday, November 22, 2005

..زي لمسة دفا في غدر يناير

حوالي تسع ساعات قضيتهم النهاردة بورشة عمل خاصة بتقرير التنمية البشرية (الأنسانية) العربية الجديد، اللي متوقع صدوره في ربيع العام القادم. تسع ساعات--من الساعة 9 صباحًا إلي 6 مساءً--مروا بسرعة مش مستغربة، اجتمعت مع 11 شاب و شابة من الكويت--الامارات--لبنان--السودان--مصر--ليبيا. الهدف هو الاستماع من اعضاء محوريين في التقرير: د. نادر فرجاني، و د. إصلاح جاد--المحررين الرئيسيين للتقرير، و د.فريدة العلاقي عضو الهيئة الاستشارية للتقرير و منسق الورشة. بالاضافة لشخصيات بارزة في برنامج الامم المتحدة الانمائي: د. ندي الناشف رئيس قسم البرامج الاقليمية، و د. عزة كرم المستشار رفيع المستوي بالبرنامج
امبارح كلمتني الدكتورة فريدة و دعتني للأجتماع/الورشة، اللي بيهدف لرصد ملاحظات و أراء مجموعة منتقاة بعناية من الشباب العربي في مشكلة المرأة في العالم العربي، و علي تقرير التنمية البشرية العربية الجديد اللي قدملنا د.فرجاني تلخيص ليه، مع رجاء بعدم افشاء محتوياته قبل النشر الرسمي في ربيع السنة الجاية. ح يكون في الربيع لأن دي هي المسودة التانية،، و رغب مجلس مستشاري التقرير--في بادرة حسنة و نتيجة جهد عظيم من فريدة--في سماع اراء مجموعة من الشباب العربي اللي ممكن تساعد في الصياغة الثالثة، بالتعديل أو بالتأكيد
اللي عجبني هو مدي اخلاص كل شاب موجود في القاعة، و الرغبة الحقيقية من المسئولين عن التقرير ده--اللي احتل اهمية قصوي في الحياة العربية من ساعة صدور أول تقرير منه من تلات سنين فاتوا--في الاستماع و التفهم. عجبني مدي التحمس --و لكن بعقلانية--و الشجاعة من الشباب ، و الرغبة المشتركة من الطرفين في العمل و المحاولة، حتي مع التأكد التام من تجاهل نخب الحكم العربية ليه. عجبتني الجرأة اللي ابدتها زميلة مشاركة لما تلقت سؤال مباشر من د. إصلاح عن حل مشكلة تأخر سن الجواز و تأثيره علي المرأة: هل تعتقدي أن العلاقات بين الجنسين قبل الجواز علاج؟! الزميلة ردت بحسم: ايوة
ضحكت و همستلها ان من حظها أن مفيش اولاد كتيرفي القاعة.. اكيد كلهم ح يطلبوا التليفون!و بعد لحظة قلتلها : طب ممكن التليفون؟ ضحكت و ضربتني علي ضهري
مش من الضروري انكم تتفقوا مع الزميلة العزيزة، و لكني شخصيًا قدرت شجاعتها جدا
غطت الورشة ست محاور رئيسية مرتبطة بالنهوض بالمرأة في الوطن العربي، و انقسمنا لمجموعتين عمل، كل مجموعة قدمت تخيلاتها لما يمكن اعتباره حلول واقعية و استشراف للمستقبل، و تتجنب صيغة التوصيات بكل شكل ممكن
حصل اني لاقيت ناس عندهم الحد الادني من المظهرية، و شباب قدر يرسم نفسه بحد معقول جدا من المصداقية و الصراحة. استمتعت بالتسع ساعات دول--ضيف عليهم ساعتين تانيين في اجتماع خاص مع فريدة خارج اعمال الورشة--و لم اسمح بكل التشاؤمات العقلية--و بعضها منطقي و مفهوم جدا--انها تبوظ عليا يومي.. هناك شباب يستوعب ما حوله و يفهمه رغم كل التشويه و العشوائية من حواليه، و باحثين مش خايفين أنهم يقولوا الحق بعيدًأ عن موالسة السلطان و اراجوزاته و ألاعيبه. حاجة زي ابتسامة عيل صغير.. و زي لمسة دفا في غدر يناير
...................................................................................
الصور لاحقا

13 comments:

Alexandra said...

فكرة أستشارة الشباب عظيمة بجد. مفاجئة سارة جدا على بداية اليوم. بس عايزة أعرف الشباب الي تم أستشارتهم أختيروا على أساس أيه؟

Muhammad Aladdin said...

هاي إليكساندرا
لايحة المعايير كانت في الورقة اللي اتبعتت لكل واحد فينا قبل الاجتماع، و مش ح اصدع دماغك بالبنود الستة اللي فيها، بس المختصر المفيد انهم من مختلف الشرائح السنية، مختلف الاهتمامات و المشارب، ليهم نشاط سابق مع الامم المتحدة و عندهم دراية بمشروعاتها، و لازم يكون كل واحد فيهم متميز في مجاله.. باختصار

اتمني اكون جاوبتك اجابة وافية
:)

aMRALi said...

فكره ممتازه بس ايه الافكار اللى
لو اغلب اللى اختيروا بنفس افكار البنت دى اكيد هتكون مصيبه:) :) :)
انطرحت غير فكرة الانحلال الاخلاقى دى؟؟
انا مستغرب من ازاى نفكر ان الانحلال حل لمشكلة العنوسه
بالعكس
العلاقه بين الشاب والفتاه بدون قيود وانا بقصد علاقه جنسيه بين شاب هتسبب عنوسه اكتر
كل بنت هتحب اكبد الحياه بدون قيود نتيجة كبت مفروض عليهم فهيفضلوا فى علاقات غير شرعيه لحد ما يعنسوا وطبعا فى الوقت ده محدش هيبصلهم نبقى بكده زودنا العنوسه بين البنات محلناهاش
وبعدين البنت اللى عندها حرية انها تقيم علاقه مع شاب ممكن تستخدم نفس الحريه فى الجواز حتى لو ضد رغبة الاهل لو كانوا الاهل متعسفين فى شروطهم للموافقه على الزواج
ليه دايما بندور على حلول غير اخلاقيه

aMRALi said...

هتحط الصور امتى
ويا ريت معاها رقم التيليفون لو كنت خدته
:) :)

Muhammad Aladdin said...

عمور
طبعا هي مش بتعتبر ده "انحلال"، هي شايفة انه تعامل واقعي مع وضع استشري و لابد من تقبله، و برضه هي ما بتعتبرش الحل ده "لا اخلاقي" اكيد
وجهة نظر ما سمعتها، بس علي العموم كان رأيي هو أن حل اي مشكلة ما يكونش بأجراء واحد، و الافضل أنه يكون في العمق ، زي تحسين الحالة الاقتصادية المتردية اللي بتأدي للمشكلة دي، و زي اجراءات تمويلية لقروض المشروعات الصغيرة للشباب، و زي وضع حل لموضوع الجواز العرفي اللي احنا لا قفلنا الباب فيه و لا فتحناه، و زي اقتراحك انت لكل شابة بتحب شاب انها تتجوزه مهما كان التمن و الحياة--زي ما بيقولوا--كفاح
:)
بالنسبة لموضوع ان اقتراحها ح يزيد العنوسة، ما اظنش أن ده ح يحصل يا استاذ لأن برضه الجواز ماشي عندنا مع ان فيه ذات الحالة اللي وصفتها الصديقة بشكل غير معلن عن نسبة لا يستهان بيها سواء في مصر أو في الوطن العربي
(نسبة فقدان العذرية في المغرب بلغت 82% تقريبا في استطلاع رسمي)
بالنسبة للصور قريب جدا --اول ما توصلني--و مش ح اديك تليفونها لأنها ببساطة متجوزة
:)

Alexandra said...

محمد شكرا على ردك على عمر أكتر من على ردك عليا. يا أستاذ عمر أولا مشكلة العنوسة مش سببها العلاقات قبل الجواز دي سببها أقتصادي بحت. يعني الزوجة في مصر ليها تمن يتمثل في مهر وشبكة وقايمة والذي منه. ودول بيتحددوا على أساس لا علاقة له نهائيا بمستوى الأجور. يعني الشاب علشان يقدر يتجوز من غير مساعدة بابا وماما حيكون وصل لمنتصف العمر ده لو عرف يتجوز في السن ده. فأحنا بنقول له وللبنت كمان الي ليها أحتياجات جنسية على فكرة لو ما كنتش درايان انكوا لازم تقعدوا تشربوا في زيت كافور وتعملوا نفسكوا مش شايفين الناس الي حواليكوا من الجنس الأخر لغاية ما تفقدوا رغبتكوا في الحياة كلها قبل ما تتجوزوا. على الجانب الأخر أحب أوكد لك انه في المجتمعات الي الجواز فيها مش شرط لممرسة حياة طبيعية بما في ذلك الحياة الجنسية فالناس بتتجوز برضه لأنه الأحتياج لتكوين بيت مشترك أحتياج طبيعي على ما أظن كده. يعني الجواز مش تناسل ولا أشباع رغبات جنسية وبس ولو أنت شايف انه الجواز هو في حقيقته وسيلة للأشباع الجنسي بس يبقى تلات ترباع المتجوزين مش محققين حتى الهدف من الجواز

Muhammad Aladdin said...

الله! انتي فعلًا زعلانة من موضوع كمية الرد دي؟
:)

aMRALi said...

انا مقولتش ان مشكلة العنوسة سببها العلاقات قبل الجواز ومانكرتش ابدا ان سببها أقتصادي
لكن رفضت فكرة ان العلاقت المنحله الغير شرعيه (مهما كانت نسبة انتشارها)من غير جواز تكون حل لمشكلة العنوسه وقلت انها ممكن تتسبب فى زيادتها
وبرضو مقولتش ان الجواز هدفه الجنس وبس
لكن الجنس جزء من اسباب الجواز
وقلت البنت اللى عاوزه جنس ومش قادره تستحمل تروح تتجوز انضفلها من علاقه غير شرعيه
واحب انبهك مش كل الشباب لازم يشربوا زيت كافور اوينسوا ان فيه جنس اخر المفروض انو جنس ناعم
بس الانسان السليم ربنا ميزه عن غيره من المخلوقات انو بيقدر يتحكم فى غريزته عشان لو بقت العلاقات الجنسيه من غير اطار شرعى يحكمها هيبقوا الناس اللى بيعملوا كده زيهم زى البهايم معندهمش تحكم فى غريزتهم
وبالنسبه لموضوع المهر والشبكه والكلام الفاضى انا قلت انى قلت البنت اللى عندها حريه تقيم علاقه غير شرعيه انضفلها ((وانا مصر على استخدام كلمة انضفلها)) انها تتجوز الانسان اللى اختارته حتى لو ضد رغبت الاهالى (((المتعسفين))) من انها تقيم علاقه بهيميه مع ذكر من جنسها
وشكرا

Alexandra said...

محمد أنت ضحكتني فعلا. أنا برضه حتكلم في كمية الرد! يا سيدي أنا كل الي قصدي عليه أني أقول أني قد ما بشكرك على ردك عليا بشكرك أكتر على ردك على عمر

Shurouq said...

علاء
قول لنا انت قلت ايه في الاجتماع


عمرو
يا ريت تستخدم لغة "أنظف" في شرح وجهة نظرك

aMRALi said...

بالعكس يا اخت شروق انا استخدمت انضف كلمات ممكن اوصف بيها الانحلال
واعتقد ان وصفى محترم ما فيهوش اى كلام خارج
وشكرا

Muhammad Aladdin said...

إليكساندرا
شكرا يا ستي علي التوضيح--انا برضه استغربت فهمي--و عفوًا عفوًا علي الشكر
:)

شروق
إن شاء الله في بوست منفصل

10860 nights of Tripoli said...

hey , very intersting blog ...
well i know Ms Farida ElEllaghi , i have met her once here in Tripoli in My house as she used to be my mum's dearest friend back in University time in the seventies .. she's so amazing , very intellegent and she's also soo charming .
keep doing the good work and i'll add ur blog into my Favourites ..
bye