designed by: M. Aladdin & H. Fathy

Friday, October 07, 2005

....كان يوم عيدك

كل واحد فينا ليه راس السنة الذاتية، اللي هي عيد ميلاده. كل يوم بيعدي علينا بيكون عيد و راس سنة. ساعات بيكون عيد للحزن و ساعات بيكون عيد للفرح. اهو علي حسب سن كل واحد فينا، جنسه، ظروفه و احواله، و الرقم الجديد اللي بيزيد علي التقويم

النهاردة راس سنتي. ستة و عشرين سنة و انا عايش فوق وجه البسيطة اللي ماهياش بسيطة خالص. ستة و عشرين سنة و انا بكاكي زي بطوط في مدينة البط الحقيقية اللي لاقيت نفسي فيها. ميلادي—زي ما هو ميلادكم—كان نتيجة متعة مختلطة بالألم، متعة كانت الالم او السبب فيه، و يمكن ده السبب ان الحياة كلها ما هي إلا صورة اكبر شوية لعملية خدت عشر دقايق—كل اب واحد فينا و شطارته بقي—و اتمددت علشان تصنع دستور مقدس بيحكمنا كلنا، تعب الحياة كلها تعب، و التعب مؤلم، بس—و ما نقدرش ننكر—اننا بنلاقي متعتنا في الالم ده

وجع يشيل و وجع يحط، و قلبك بيعدي الجسور و الحواجز و يسأل من بعيد لبعيد، بيسأل بخجل مكسوف من الضعف الطارح في عشوشه: يا تري مصايب ايه تاني ح نتعك فيها؟!

الحياة بتربي الخوف زي العبد الوفي، و دقة الباب و التليفون اللي كانت بتفرحك و انت عيل صغير دلوقت بتقول اللهم اجعله خير. صوت البني آدمين ونس و لمستهم حياة، بس الدنيا ما بتسيبكش تتهني و تعلمك أن البني آدمين حاجة رزلة و أن لمستهم سحر اسود. بتتولد مروي و الدنيا بتعطشك في كل لحظة عطش جديد، و كل ما تشرب تقول هل من مزيد؟!

ايام كتير بتعدي من حواليك بسرعة الخيل الاصيل، بس لما تقف في جنب، جنب صغير بتحاول تدفيه علي قد ما تقدر، تكتشف أن سرعة الخيل ما بتمنعش أن فيه وقت طويل عدي، وقت طويل أوي. وقت ساب جواسيسه في صور و روايح و لمسات و ملح بيدوب فوق وشك. المصيبة انك لما تكون زيي، ستة و عشرين سنة بقم قرنين في غفلة منك. لسه فاضل في العمر—لو ما قسمش ربك غير كده—كتير، ح تشوف ايه تاني يا سيدي؟ عطشك المرة دي ح يوديك لغاية فين؟!

ربنا كان كريم معايا و ألف حمد و شكر ليه، لما ابص ورايا الاقي حاجات كتير—من فضله—بتخليني ابتسم. يعني اعرف ابص في المراية و ابتسم. فضل و نعمة من رب غفور رحيم قدوس كريم. بس المشكلة في الخوف اياه اللي بيهمسلك بظرف إبليس عن اللي جي؟ يا تري ايه المستخبي جوا بطن الدنيا الحبلي دايما؟

اهي الدنيا كده. حبة ابواب تايهة من غير مفاتيح، و حبة مفاتيح تايهة من غير ابواب، و انت بقي يا حلو عليك تجمع البازل و تكسب صلاة النبي. و طبعا مش ح ننسي كام قفل متظبط علي كام باب، برضه من فضل ربك، بس خلي بالك لأن البايبان تحب التزييت علشان ما تزيقش، و تبقي حياتك فيلم رعب اصيل، و المفاتيح لازم تنقذها من الصدي، علشان ما تكونش حته حديدة من غير فايدة ممكن تفقع عينك بيها في لحظة يأس

مع السنة الساتة و العشرين اعرف ان طريقي للسنة السابعة بعد العشرين فاضله 364 خطوة تانيين. تصدق يا علاء انك عجزت؟ بس برضه، تصدق، أن العطش جميل؟ و أن قلبك الهراب المتلاف حيفضل يعطش لكل بنت حلوة تطلع العصافير من العشوش، و لكل جملة تلف الراس من غير خمرة، و لكل ابتسامات الاطفال الصغيرين اللي بتطيّر الحمام في خرابة الدنيا الكبيرة، و لكل منظر من الطبيعة سبح بحمد الله و خلاك تسبح وراه من غير ما تحس. العطش هو روح دنيتك و عذابها الجميل. عطشان يا صبايا دلوني علي السبيل، و من كل شق اكيد ح تفضل مستني لمعة نور، بابتسامتك الغريبة و قُصرك المريب و نضارتك اللي بتحبك مع انك بتكرهها. عارف ان ايمانك ضعيف و عزيمتك رخوة، و ح تنخ لأي لحظة حلوة تمر جنب ضل باب بيتك.. بس يا اخي مين يقدر يلومك و احنا كلنا دراويش حضرة مباركة اسمها الدنيا. دنيا دفناها سوا، بس بيفضل سرها باتع عليك و عليا

كل سنة و انت علاء يا سيدي

ملحوظة: اجمل حاجة في الدنيا الرسالة اللي جاتلي النهاردة من صديقة عزيزة جدا.. متشكر بجد


Image Hosted by ImageShack.us

محمد علاء الدين—7 اكتوبر 2005

عدسة : وديد شكري /كوداك بروفيشنال

29 comments:

Bluesman said...

سلام
مبروك عليك حلول راس السنة الذاتية
اتمني لك سنة مليئة بالنجاح والسعادة

Muhammad Aladdin said...

متشكر جدا يا ريحان.. و اتمنالك انت كمان كل خير و سعادة
:)

AZ said...

كل سنه وانت انت

Muhammad Aladdin said...

كل سنة و انا انا يا فل سايح في الهنا
:p

Moia said...

كل سنه وانت طيب ومبسوط اوى

NYchick said...

ليك حق تبص في المرايا و تبتسم
هو حد يقدر يشوف الوش ده و ما يبتسمش؟
;)

عيد ميلاد سعيد
وكل عام و انت بخير

Anonymous said...

كل سنة وانت في وسط حبايبك مستمتع بألم الحياة
وبهذه المناسبة عندي اعتراف صوغنن خالص : رغم انني لا اعرفك ولم اقرأ - للأسف - مجموعتك القصصية إلا أنك أصبحت عادتي اليومية - ربنا ما يقطع لك عادة - واستطعت بأسلوبك الشيك والذكي جدا أن تجعلني زبونة دائمة لبلوجك أما سبب معرفتي بالبلوج اساسا فربما احكيه لك في رسالة خاصة طويييييييلة - بس قولي الايميل - يوما ما لكن الشئ المؤكد انني سعيدة جدا بمعرفتك واتمنى لك حياة ممتعة لدرجة الألم
هبة ربيع

Eve said...

Me, sing the birthday song again?
yalla, here it goes:

Sana helwa ya gameeeeeel,
Sana helwa ya gameeeeeel,
the cake, the cake...for God's sake, where's the cake?
Sana helwa ya Alaaaaaaaa!

Wishing you all the best on this day! :)

Nerro said...

Yoooopi....Hope your your birthday and the upcoming year ISA are made up of everything beautiful, happy, and special :))

ميشيل حنا said...

كل سنة وانت طيب وعقبال 126 سنة.
:)

Muhammad Aladdin said...

ميم
متشكر يا ستي، و كل سنة و انتي كمان مبسوطة و سعيدة

إن
اخجلتم تواضعي.. (هما بيكتبوا ازاي الوش الخجلان هنا؟)
:p

هبة ربيع
يشرفني يا فندم انك تزوريني هنا، و يهمني اقولك انك اشيك مني بمراحل (مش بكش، ده باين من كلامك )و إن شاء الله ابعتلك البريد الاليكتروني مع صديق عزيز
:)

إيف
يخليكي ليا يا رب، بجد مش عارف اقولك ايه

نيرو
شكرا يا قمر، و يارب نكون كلنا بخير

ميشيل
و عقبال مليون سنة ليك يا سيدي
:)

Anonymous said...

كل سنة وحضرتك طيب. وأنا بشكرك على هذا الاهتمام والشعور الحقيقي تجاهي. أخجلتني مقالتك عن عملي، وأنا أشكرك الا أنني أعتذر عن قبول هذا المديح، لأنني أقوم بواجبي ولربما مقصر قليلا.

ستضل شعلة يا محمد، وأتمنى أن أقف بجانبك يوما من الأيام وأنت تحاضر أمام الجماهير ك"نجيب محفوظ" في العصر الحديث.

ومرة أخرى، كل عام وأنت بخير

أخوك،

محمد الغانم

Muhammad Aladdin said...

محمد الغانم
شكرا علي الكلام ده يا محمد، و ما اظنش فيه داعي للخجل لإنك اللي كتبته و زيادة كمان، أما عن موضوع "الشعلة" فده بيثير اشجاني لإنه مقترن بمصيري المتوقع بعد الموت
:p
بجد متشكر علي كلامك و اهتمامك، و ربنا يديم المعزة و الاخوة

علاء

Shurouq said...

Happy Birthday and sorry I'm two days late :)

May all your wishes come true

Muhammad Aladdin said...

مجرد دخولك و تهنئتك كافيين يا شروق.. مفيش داعي للإعتذار
:)
و يا رب يحقق لك احلامك انتي كمان

amrali2000 said...

كل سنه وانت طيب مرتين ( عيدك ورمضان)
قولناانت راضى عن نفسك فى كام سنه من ال26 سنه دول؟
وايه اللى عملته فى حياتك ولو اتعادت الفرصه متعملوش؟
والسؤال التقليدى لو مكنتش بتحب الكتابه او التاليف كنت هتعمل ايه
او ايه تانى هوايه عندك فى الترتيب من حيث الاهميه

Ghada said...

كلامك فكرني بأغنية بنتولد بتاعة منير

بنتولد دافيانين، صافيين، صادقين، كما زرعة خضرة ف أرض طين
نكبر وتكبر بينا أعمار السنين
ونكره السنين وتكرهنا السنين
ونجرح البشر، ونجرح نفسنا

كل سنة وانت دافيان وصافي وصادق وان شالله ما تكره نفسك ولا سنينك أبداً :D

Anonymous said...

"يشرفني يا فندم انك تزوريني هنا"
ياريت تناديني من غير افندم وحضرتك وخلي البساط "أحمدي" :) ، الصديق العزيز ارسل لي بريدك الالكتروني في رسالة على المحمول ، وهو ما يعني ضمنا أنك تعرف " سبب معرفتي بالبلوج اساسا " ؛) فلا داعي ّللـ"رسالة خاصة طويييييييلة "واشكرك على " مجاملتك الشيك"
:D
هبة ربيع

محمد هشام عبيه said...

رغم أني قارئ شبه دائم لمدونتك المميزة بحق إلا أنها المرة الأولى التي أعلق فيها..
كل سنة وأنت طيب أولا..
ثانيا..مدونتك دي فكرتني بحاجة كتبتها لما وصل سني 24 سنة وكتبتها تاني لما وصلت 25 واخشى أنا اكتبها لما أصل للـ26 في مايو الجاي وعليك خير إن شاء الله..هو كلام عبيط عن النحلة التي تنتج خمسة جرامات فقط من العسل بعد أن تطير ثمانمائة كيلومترا طوال حياتها..كنت أحدث نفسي عن العسل الذي سأتركه خلفي فلم أجد سوى ولامؤاخذة ..هباب
متشغلش بالك يا أبوحميد..بس استناني لما أحصلك بس في مايو الجاي..أوعى تكبر لما أجي لك!
كل سنةوأنت علاء..وسعيد بأني وجدت من يجاهر مثلي بحبه وعشقه للبنات ألطف الكائنات دون أن يخاف من الاتهام بالزندقة والذي منه!
صباح الفل

Muhammad Aladdin said...

عمور
و انت كمان طيب :)
سؤالين مهمين، و اكيد بيدو المناخ المناسب للبارانويا بتاعتي علشان اقعد و اتفشخر و اقول عن سيرة العبد لله العظيمة الفخيمة.. و علشان كده بالذات ح اقول باختصار:
فيه حاجات وحشة كتير في حياتي، اتمني اني ما كنتش عملتها أو اتعرضت ليها.. حاحات بتختارها و حاجات بتختارك.. انت عارف.. بس رغم كل شيء، انا مجموع الحاجات الوحشة و الحلوة و المحايدة (و هي الاكتر بطبيعة الحال)و لو فيه حاجة واحدة ما اتعملتش ما كنتش انا هوه انا.. كنت ح ابقي حد تاني مختلف عني و انا مش حابب الفكرة دي حتي لو كان الحد ده احسن مني
مكنتش ح اعمل حاجة لو مكنتش كاتب.. فعلا انا ما انفعش غير لشغلانة العواطلية دي
:p
الهوايات هي الرسم و النحت (بطلت من زمان بدافع الكسل) و سماع المزيكا و طبعا القراية.. و هما دول المستمرين معايا
:)

غادة
شكرا جزيلا

هبة ربيع
يعني الرسالة الطويييييييييييلة دي كانت ح تبقي الجملتين اللي كتبتيهم هنا؟
:)
علي العموم انا حابب اقرا اي ميل منك، معاكي العنوان
:)
و ماشي يا ستي: خلي البساط "محمدي" و شكرا علي زيارتك فعلا
(و انا مكنتش بجاملك )
:)

Muhammad Aladdin said...

صباح العسل يا محمد و شرفتنا بالتعليق.. و ح استناك يا سيدي بس مش ح اوعدك بموضوع الكبر ده علشان ده مش بأيدي انت عارف
:p
و طبببببببببعا البنات البنات ألطف الكائنات.. مين يقدر ينكر؟
:)

AZ said...

واحنا صغيرين كانوا الولاد بيغنوهالنا البنات البنات صراصير البلاعات عشان يغيظونا... وكانوا بينفرسوا منى عشان كنت اغنيها معاهم صراصير البلاعات واضحك.... الافيه حلو برده... اراهن دلوقتى كلهم بيقولوا الطف الكائنات برده اهى اهى فرحانه فيكواااااااااااا

mindonna said...

و الله عجبني وجهة نظرك عن نفسك و انت بترد علي عمرو (أو عمور ؟)

فعلا الواحد برغم كل البلاوي اللي عمالها اللي ممكن يكون ندمان عليها في حياتها إلا ان البلاوي دي هي اللي كملت تكوين شخصيته و من غيرها مش هيكون نفسه

جميل جميل
كل سنة وانت طيب:)

Muhammad Aladdin said...

آز
اكييييييييييييد.. هو احنا نقدر؟!!
:p

مينادونا
متشكر جدا و كل سنة و انتي طيبة يا فندم

:)

tarooka said...

ايه الحلاوة دي ! نجم سينما يا خواتي !انا أخوك التنين الصغير (طارق امام )واحشني يا جدع ...و ماليش دعوة ,أنا عايز بورتريه زي الواد (نائل الطوخي) ,((على فكرة هو أساسا سعودي ,و اسمه :ناجل الدوخي ,من الظهران .....و عايز أسألك ,هم بتوع وسط البلد ينفع يعملو _ولا مؤاااخذه_مدونات ؟؟؟أمال اللي بالي بالك يعملو ايه ؟!!!! تحياتي يا حبيبي .

tarooka said...

:)

Muhammad Aladdin said...

طروووووووووووق

عامل ايه يا وله؟!واحشني كتير جدا! و طبعا بتوع وسط البلد يعملوا بلوجات.. امال مين يعمل؟
:)

Omar said...

جئت متأخراً..

عذراً يا يا ابو علاء، اكتشفت متأخر شوية، لكن ملحوقة طبعاً، ليك عندي حفلة

مش عارف يا علاء انت بتكبر بسرعة، ولا بتهرب من السنين وتخايلها، عموماً باشعر انك عندك توليفة حياة تربك أجدعها زمن، وأجمل ما فيك انك قادر تحب الحياة، وعشان كدة هى هترد الجميل أكيد، وتحبك.. وانا بحبك يا لول، عقبال 100 سنة

Muhammad Aladdin said...

و انا كمان بحبك يا عمور.. دي عشرة سنين يا ابني.. مش عارف اقول ايه لكلامك ده.. فعلا انا بكبر بسرعة يا عمور.. بس انا محظوظ اني عندي صاحب زيك في حياتي، و كل الاصحاب الجمال اللي بيساندوني و يدعموني في كل يوم بيعدي
بحبك انا كمان مع اني عارف ان عزومتك كلتش
:P

علاء